¹ Jedi apekah nyo haros kito gerako? Apekah kite nak teros bebuat doso empoknyo anugerah semaken belimpah? ² Tentu sajo hopi! Upamone mungken kite nyo lah mati bage doso maseh hidop de delomnye? ³ Atau hopi kah kowe tahu bahwa kito segelo nyo lah de baptes ke delom Yesus Kritus lah de baptesko ke delom kemation-Nye? ⁴ Ulenyo iye, kite lah de koborko besamo-samo Enye pado waktu kite debaptes kedelom kemation-Nye; empoknyo samo upah Yesus nyo de bangketko deri antaro urang mati melalui kemuliaon Bepa, kite jugo boleh bejelon delom pembaruon hidop. ⁵ Sabab, munye kite lah de persatuko besamo-Nye de delom keserupaon kemation-Nye, kite pasti jugo nak de persatuko delom keserupaon kebangketon-Nye. ⁶ Kite tahuko bahwa mendesio lamo kite lah de salebko besamo Kristus ngan badan doso kite hopi delenyapko sehinggo kite hopi nak menghambako diri lagi kepado doso. ⁷ Sabab, setiap urang nyo sodah teelek, enye lah de bebasko deri doso. ⁸ Kinie, munye kite lah teelek besamo Kristus, kite pecayo bahwa kite jugo nak hidop besamo ngan-Nye. ⁹ Kite tahuko bahwa Kristus nyo lah de bangketko deri antaro urang mati hopi nak mati lagi; maot hopi lagi bekuaso pucok Enye. ¹⁰ Sabab, nak hal mati-Nye, Enye mati tehadop doso sekali untok selamonye, cuma nak hal hidop-Nye iye, Enye hidop untok Allah. ¹¹ Demikionlah dirime, kowe haros menyadari bahwa dirime lah mati tehadop doso, ngan hidop untok Allah de delom Kristus Yesus. ¹² Ulenyo iye, jengonlah membiarko doso menguasoi badanme nyo fana sehinggo kowe taat tehadop kendoknye. ¹³ Ngan, jengon pula menyerahko anggota-anggota badanme kpado doso sebagai alat kejahaton. Cuma hambok, serahkolah dirime kepado Allah sebagai nyo hidop deri antaro nyo mati, ngan anggota-anggota badanme sebagai alat kebonoron Allah. ¹⁴ Sabab, doso hopi nak bekuaso pucokme ulenyo kowe hopi lagi hidop de bewoh Hokom Taurat cuma de bewoh anugerah. ¹⁵ Jedi, ape nyo haros kite lakuko? Apekah kite nak bebuat doso ulenyo kite hopi hidop de bewoh Hokom Taurat, cuma de bewoh anugerah? tentu sajo hopi! ¹⁶ Kowe pasti tahuko bahwa ketiko kowe menyerahko dirime sebagai budak nyo taat kepado sesuatu atau seseurang, kowe menjedi budak bage pihak nyo kou taati iye; beik kepado doso nyo memempenme menuju maot, atau kepado ketaaton nyo nak memempen menuju kebonoron. Cuma hambok, syukur kepado Allah bahwa kou nyo dulu adolah budak doso, kinie lah menjedi taat seponoh hati kepado pokok-pokok pengajoron nyo lah deajorko kepadome, ¹⁸ ngan ulenyo kowe lah debebasko deri doso, kowe menjedi budak kebonoron. ¹⁹ Ake boek menggunako istilah nyo mendesio ulenyo kelamahon degengme. Sabab, samo upah tekalo kou menyerahko anggota-anggotame sebagai budak kenajeson ngan kejahaton nyo beakibat pado kejahaton nyo lobeh jouh, kinie serahkolah anggota-anggotame menjedi hamba kebonoron nyo behujong kepado pengudoson. ²⁰ Sabab, ketiko kowe lagi menjedi budak doso, kowe bebas deri kebonoron. ²¹ Hambok, keuntungon ape nyo kowe depotko deri hal-hal nyo kini membuatme malu iye? Sabab, akher deri segelo hal iye adolah maot. ²² Hambok kinie, sesodah debebasko deri doso ngan lah deperhamba uleh Allah, kowe memperoleh buah pucok kesucion ngan akhernye adolah hidop nyo kekal. ²³ Sabab upah doso iyalah maot, cuma karunia Allah adolah hidop nyo kekal delom Yesus Kristus, Tuhan kite.