( Babel De Hancurko ) ¹ Lah segelo nie, ake mengoleh malaikat loin turun deri serga, nyo memilikih kuaso nyo godong, ngan behumi de tarangi ule kemuliaonnye. ² Enye mekek dengan suaro nyo karas, ujonye, "Runtuh! sodah runtuh Babel nyo godong iye! Enye lah menjedi tempat tingal beles-beles ngan penjaro bage setiap roh najis, sarang bage setiap jenis burung nyo najis ngan de luat. ³ Sabab, segelo bengeso lah mabuk anggur nafsu zinanye, rajo-rajo de behumi lah berzina dengan enye, ngan pedagong-pedagong de behumi menjedi sugeh ule hawo nafsunye nyo godong." ⁴ Mengka, ake mendongor suaro loin deri serga buik, "Hai umat-Ke, keluorlah derinye enggakkonyo kowe hopi terlibat delom dosonye ngan hopi menerimo bencana nyo bakal menimponye. ⁵ Sabab, doso-dosonye lah betumpuk sampoi ke langet Ngan Allah lah mengingot pelanggaron-pelanggaronnye. ⁶ Perlakuko kota iye samo upa enye lah memperlakuko, balasko kenempatnye dua kali lipot pucuk perbuaton-perbuatonnye, ngan delom cawan nyo enye gunako untok mencampur, campurkolah dua kali lipot. ⁷ Selobot enye lah memuliako ngan memboriko kemewahan podo dirinye dewek, borikolah siksaon ngan perkabungan kenempatnye selobot iye. Sabab, enye buik delom hatinye,'Ake duduk upa seurang ratu, ak bukonlah jendo ngan hopi bakal perenah mengoleh perkabungan.' ⁸ Ulehnyo iye, delom sikuk hari bae bencana-bencananye bakal njongok kenempatnye, yaitu te'elek, perkabungan, ngan kelaporon. Enye bakal de tunuko dengan api ulehnyo Tuhan Allah nyo menghakimi enye iye bekuaso." ⁹ Rajo-rajo de behumi, nyo lah berzina ngan hidop delom kemewahan serompoknye, bakal meratop ngan meratopinye tekalo mike mengoleh hasop api pembakaronnye, ¹⁰ Togok jouh-jouh ulehnyo takut terhadop siksaonnye, ngan meratop, "Celako!Celakolah, kota nyo godong, Babel, kota nyo kuat iye! Sabab, delom sikuk jam bae penghakemonme sodah njongok!" ¹¹ Pedagong-pedagong de behumi bakal meratop ngan bekabung untok kota iye ulehnyo hopi seurang pun bakal memboli dagangon mike lage, ¹² Yaitu emas, perak, mutiara, koin linen halus, koin ungu, koin sutra, koin kirmizi, berbage jenis barang deri kayu nyo harum mambunye, barang-barang nyo tebuat deri gading, deri kayu nyo sajo mahal, deri tembaga, besi, marmer, ¹³ Kayu manes, rempah-rempah, wewangion, mur, kemenyan, anggur, minyak topung halus, gandum, lembu sapi, domba, kuda, kereta, budak bahkan nyawo mendesio. ¹⁴ Mike bakal buik, "Buah nyo de amatko jiwome sodah sayau derime, segelo nyo mewah ngan molek lah sayau derime, ngan hopi bakal de tomuko lage." ¹⁵ Padong pedagong barang-barang nie, nyo menjedi sugeh ulehnyo kota iye, bakal togok jouh-jouh ulehnyo takut terhadop siksaon nyo de alami kota iye, sambel meratop ngan bekabung. ¹⁶ Mike buik, "Celako! Celakolah kota godong iye, Nyo bepakoyon linen halus; nyo memakoi koin ungu ngan koin kirmizi, ngan berhiasko emas, betu-betu permato, ngan mutiara! ¹⁷ Sabab, delom sikuk jam bae, segelo kekayaon iye lah de musnahko!" ¹⁸ Ngan mekek tekalo mike mengoleh hasop pembakaron kota iye, "kota monekah upa kota godong nie?" ¹⁹ Mike menaburko debu ke kepalo mike ngan mekek sambel meratop ngan bekabung, ujonye, "Celako! Celakolah kota godong iye, nyo derinye segelo pemilik kapal de lout lah menjedi sugeh ule kelimpahonnye! sabab, delom sikuk jam bae, kota iye lah de buat menjedi sepi!" ²⁰ Bersukacitalah pucuk enye, hai serga, hai urang-urang kudus, rosul-rosul, ngan nabi-nabi! ulehnyo Allah lah mentitekko hukumon pucuk kota iye bageme. ²¹ Mengka, sikuk malaikat nyo kuat mengangkot sebuah betu nyo godongnye upa betu kilangon ngan melemparko ke lout sereta buik, "Upa iyelah Babel, kota godong iye, bakal de titekko ngan hopi bakal perenah de tomuko lage. ²² Suaro padong pemoin kecapi, peniup suleng, peniup trompet, ngan alat musik loinnye hopi bakal nak tedongor lage de delomme. Hopi ado pengrajin, nyo depot membuat segelo kerajinon, nyo nak detemuko di delomme. Suaro penggilingon hopi nak tedongor lagi de delomme. ²³ Cahayo lampu hopi nak besinar lagi de delomme. Suaro penganten jenton ngan penganten betina hopi nak tedongor lagi de delomme, ulenyo pedegong-pedegongme adolah penggede-penggede de bumi. Sabab, segelo bengeso lah desosotko uleh sihirme. ²⁴ Ngan, de delom kota iye detemuko deroh nabi-nabi, urang-urang kudus, ngan deroh segelo urang nyo lah debunoh de bumi