¹ Lah iye, ake mendongor suaro nyo nyaring upa sekumpulon godong urang de surga boek, "Haleluya! Keselamaton, kemuliaon, ngan kekuasaon adolah milik Allah kite ² ulenyo penghakiman-Nye bonor ngan adil; ulenyo Nye lah mengadili pelacor godong iye, nyo merosak bumi ngan kebejatonnye, ngan lah membelosko deroh hamba-hamba-Nye kepado pelacor iye." ³ Untok kedua kalinye, mike boek, "Haleluya! Asap pelacor iye lah noek sampoi selamo-lamonye." ⁴ Mengka, kedua puluh empat tua-tua ngan keempat makhluk iye sujud ngan menyembah Allah, ngan duduk de pocok takhta ngan boek, "Amin! Haleluya!" ⁵ Kemudion, tedongorlah suaro jak takhta, "Pujilah Allah kite, hai kowe segelo nyo melayani Nye, beik nyo kecik moupun nyo godong, nyo menghormati Nye!" ⁶ Mengka, ake mendongor suaro upa sekumpulon urang lobot, upa suaro aek bah, ngan upa suaro guntur nyo hebat buik, "Haleluya! sabab, Tuhan Allah kite Nyo Mahakuaso memerentah. ⁷ Maro kite besukacita ngan besorak-sorai, ngan memboriko kemuliaon kenempat-Nye ulehnyo hari perkawinon Anak Domba sodah sampoi, ngan penganten betina-Nye sodah siap. ⁸ Kenempatnye lah de boriko koin linen halus nyo reseh ngan cemerlang, untok de pakoi ulehnyo koin linen iye adolah perbuaton bonor nyo de lakuko urang-urang kudus." ⁹ Mengka, malaikat iye buik kenempatke, "Tuleskolah nie: Deberkatilah urang nyo de undang ke jamuon perkawinon Anak Domba!" Ngan, enye buik lage kenempatke," Nie adolah kehato nyo bonor deri Allah." ¹⁰ Mengka, ake sujud de kaki malaikat iye untok menyembah enye. Cuma, enye buik kenempatke, "Jengon lakuko iye ulehnyo ake jugo hambo upa me ngan dulur-dulurme nyo bepogong pado kesaksion Yesus. Sembahlah Allah ulehnyo kesaksion Yesus adolah roh nubuat." ¹¹ Mengka, ake mengoleh serga tebukak, ngan timbullah seekor kuda puteh; Enye nyo duduk de pucuknye benamo Setia ngan Bonor, ngan delom kebonoron Enye menghakimi ngan beperang. ¹² Mato-Nye ado lobot upa nyalo api, d kepalo-Nye ado lobot mahkota, ngan Enye memilikih namo nyo tetules, nyo hopi de ketahui seurang pun, hambuk diri-Nye dewek. ¹³ Enye memakoi jubah nyo lah de celupko ke delom deroh, ngan namo-Nye adolah Firman Allah. ¹⁴ Segelo pasukon nyo ado de serga mehilui Enye dengan menunggang kuda puteh ngan bepakoyon koin linen halus nyo puteh ngan reseh. ¹⁵ Deri mulut-Nye, keluor sebuah pedang tajom nyo de gunako untok mengepuk bengeso-bengeso. Enye bakal memerentah pucuk mike dengan tungkat besi. Enye bakal memeras anggur delom betu kilangon, nyo adolah murka Allah Nyo Mahakuaso. ¹⁶ Podo jubah ngan paho-Nye tetules namo nie : RAJO PUCUK SEGELO RAJO NGAN TUAN PUCUK SEGELO TUAN. ¹⁷ Mengka, ake mengoleh seurang malaikat togok de delom matoari. Enye mekek dengan suaro karas kenempat segelo burung nyo terbang de langet," Maro, bekumpullah untok mehilu delom jamuon makon godong Allah, ¹⁸ Enggakkonyo kowe depot makon dageng padong rajo, dageng padong panglima, dageng urang-urang kuat, dageng kuda-kuda ngan mike nyo duduk de pucuknye, ngan dageng segelo urang, beik iye urang bebas maupun urang merdeka, urang kecik maupun urang godong." ¹⁹ Mengka, ake mengoleh binatong iye ngan padong rajo de behumi sereta pasukon mike bekumpol untok beperang melawon Enye nyo duduk de pucuk kuda puteh iye ngan melawon pasukon-Nye. ²⁰ Mengka, binatong iye de tangkop, serompok nabi pelesunye nyo lah mengadako tando-tando ajaib de hadopon binatong iye, nyo dengannye enye menyosotko mike nyo menerimo tando binatong iye ngan mike nyo menyembah patungnye. Mike segelo de lemparko hidop-hidop ke delom louton api nyo marok ule belerang. ²¹ Ngan, sisonye debunoh dengan pedang nyo keluor deri mulut Enye nyo duduk de pucuk kuda puteh iye ngan segelo burung de konyongko dengan dageng mike.