( Betina De Pucuk Binatong ) ¹ Mengka, sikuk deri tujuh malaikat nyo memogong tujuh cawan iye memaroki ngan buik kenempatke, ujonye, "Kemailah, ake bakal menunjukko kenempatme hukumon untok pelacur godong iye, nyo duduk de pucuk lobot aek, ² Nyo dengannye rajo-rajo de behumi berzina ngan mike nyo tinggal de behumi lah mabuk ule anggur perzinahonnye." ³ Malaikat iye mengundake delom Roh ke padang belantara, ngan ake mengoleh seurang betina duduk de pucuk seekor binatong bewarna abong nyo ponuh dengan namo-namo hujat, nyo memilikih tujuh kepalo ngan sepuluh tanduk. ⁴ Betina iye memakoi pakoyon bawarna ungu ngan abong nyo berhiasko emas, betu-betu permato, ngan mutiara. Enye memogong sebuah cawan emas nyo ponuh dengan kekejion ngan kenajison perzinaonnye. ⁵ Podo konengnye, tetules suatu namo, suatu resio : ⁶ Ake mengoleh betina iye mabuk ule deroh uran-urang kudus ngan ule deroh saksi-saksi Yesus. ⁷ Mengka, malaikat buik kenempatke," Ibo Kowe temanga? Ake bakal ngehatoko kenempatme resio betina iye ngan resio binatong nyo de noekinye, nyo bekepalo tujuh ngan betanduk sepuluh iye. ⁸ Binatong nyo kowe koleh iye perenah ado, hambuk kinie sodah hopi ado, ngan bakal enggakkonyo keluor deri jurang maut menuju kebinasaon. Ngan, mike nyo tinggal de behumi, nyo namonye hopi tecatat delom kitab kehidupon sejak denia de ciptako, bakal temanga tekalo mengoleh binatong iye, nyo perenah ado, hambuk kinie sodah hopi ado, ngan bakal timbul lage. ⁹ Hal nie membutuhko akal ngan hikmat. Tujuh kepalo iye adolah tujuh gunong nyo de pucuknye betina iye duduk. ¹⁰ Tujuh kepalo iye jugo adolah tujuh rajo, lima de antaronye sodah titek, sikuk rajo lage ado, ngan sikuk lage bolum njongok, hambuk tekalo enye njongok, enye harus tinggal setegal bae. ¹¹ Binatong nyo bilek perenah ado, hambuk kinie hopi ado lage iye, adolah rajo kedelapan hambuk enye temasuk delom tujuh rajo tadie, ngan enye menuju kebinasaon. ¹² Kesepuluh tanduk nyo kowe koleh adolah sepuluh rajo nyo bolum menerimo pemerentahon, hambuk mike menerimo kuaso sebage rajo selamo sikuk jam serompok binatong iye. ¹³ Mike mempunyoi tujuon nyo samo, ngan mike memboriko kuaso ngan wewenang mike kenempat binatong iye. ¹⁴ Mike bakal beperang melawon Anak Domba, hambuk Anak Domba bakal mengalahko mike ulehnyo enye adolah Tuhan pucuk segelo Tuhan ngan Rajo pucuk segelo rajo ngan mike nyo serompok-Nye adolah nyo de pantou, de pileh, ngan nyo setia." ¹⁵ Mengka, malaikat iye buik kenempatke, "Aek nyo kowe koleh, nyo de pucuknye pelacur iye duduk, adolah masyarakat, urang lobot, bengeso, ngan bahaso. ¹⁶ Kesepuluh tanduk nyo kowe koleh ngan binatong iye bakal luat ngan si pelacur. Mike bakal membuatnye telantar ngan telanjong, sereta melahap dagengnye ngan menunu enye dengan api. ¹⁷ Sabab, Allah lah memotekko hal iye de delom hati mike untok mencapai tujuon-Nye dengan setuju untok memboriko kekuasaon mike kenempat binatong iye singgo firman Allah de genapi. ¹⁸ Betina nyo kowe koleh iye adolah kota godong nyo memerentah pucuk rajo-rajo de behumi."