¹ Kemudion, Yesus boek kepodo mike , " Ake memboeko nyo sebonornye kepodome, ado berape urang nyo sedang togok de sane nyo hopi nak mati sampoi mike mengole Kerajaon Allah jongok ngan kuaso." (Yesus Besamo Musa ngan Elia) ² Ngan, enom hari kemudion, Yesus mengajok Petrus, Yakobus, ngan Yohanes, mengka mengunda mike dedewekon ke gunong nyo tinggi. Mengka, Yesus berubah rupa de hadopon mike. ³ Ngan, pakoion-Nye menjedi cemerelang ngan sajo puteh. Hopi ado tukang pemuteh koen de denia pacok memutehko upa iye. ⁴ Mengka, moncol de hadopon mike, Elia besamo ngan Musa, ngan mike sedang buek ngan Yesus. ⁵ Kemudion, Petrus boek kepodo Yesus, "Rabi, sajo beik bage kami berado de sie. Mayoklah kite membuat tiga kemah, sikok untok-Me sikok untok Musa, ngan sikok untok Elia." ⁶ Sabab, Petrus hopi tahu haros nyimbot ape ulenyo mike segelo ketakoton. ⁷ Mengka, moncollah awan menaungi mike, ngan tedongorlah suatu suaro nyo jongok deri awan iye, ujo-Nye, "Nielah Anak-Ke nyo Tekaseh. Dongorkolah Enye!" ⁸ Seketika iye jugo, sesodah mike ngole ke sekitar, mike hopi lagi ngole siape pun besamo mike kecuali Yesus. ⁹ Ngan, sementaro mike toron deri gunong, Yesus membori perintah kepodo mike untok hopi memboritahu siape pun ape nyo sodah mike kole, sampoi Anak Mendesio bangket deri antaro urang mati. ¹⁰ Ulenyo iye, mike mogong pemboekon iye untok mika dewek sambel betanyo-tanyo ape artinye kebangketon deri kemation iye. ¹¹ Mengka mike betanyo kepodo Yesus, " Mengka para ahli Taurat boek bahwa Elia haros njongok lobeh dulu?" ¹² Mengka, Yesus boek kepodo mike, "Elia memang jongok lobeh dulu untok memuliako segelo sesuatu. Ngan, upamone ngan nyo tetoles tentang Anak Mendesio bahwa Nye haros menderita lobot hal ngan dehino? ¹³ Hambok, Ake boek kepodome bahwa Elia memang lah jongok, ngan mike memperlakukonnye sesuoi ngan ape nyo mike endoko, upa nyo tetoles tentang nye." ¹⁴ Kemudion, tekalo Yesus, Petrus, Yakobus, ngan Yohanes belek kepodo murid-murid, mike ngole kerumunon urang lobot de sekelileng murid-murid iye, ngan para ahli Taurat sedang bedebat ngan mike. ¹⁵ Ngan, sesodah segelo kerumunon urang iye ngole Yesus, mike menjedi tekejot ngan belarion untok menyambot-Nye. ¹⁶ Mengka, Yesusa betanyo kepodo mike, " Ape nyo sedang kou perdebatko ngan ahli-ahli Taurat iye?" ¹⁷ Seurang deri kerumunon iye menjawab Nye, "Guru, ake mengunda anak jentonke kepodo-Me ulenyo nye kerasokon roh nyo membuatnye bisu. ¹⁸ Setiap kali roh iye menguasoinye, nye menohukonye ke tanoh ngan nye mengeluorko busa deri molotnye, ngan menggoroko giginye, mengka nye menjedi kejang. Ake meminta mured-mured-Me mengoser roh iye, cuma mike hopi sanggop." ¹⁹ Ngan, Yesus menjawab mike ngan boek, "Hai, generasi nyo hopi beriman! Berape lamo lagi Ake haros besamo kowe? Berape lamo lagi Ake haros betahan denganme?" ngunda anak iye kepodo-Ke!" ²⁰ Mengka, mike ngunda anak iye kepodo Yesus. Ngan, tekalo roh iye ngole Yesus, nye langsong mengguncang-guncangko anak iye. Anak iye titek ke tanoh ngan teguleng-guleng ngan molot nyo mengeluorko busa. ²¹ Kemudion, Yesus betanyo kepodo bepak anak iye, "Sodah berape lamo hal nie terjedi podonye?" Jawabnye, "Sejak maso kecik. ²² Ngan, roh iye lah recap menohukonye ke delom api ngan ke delom aek untok menghancurkonnye. Cuma, munye Kou depot bebuat sesuatu, kesihani kami ngan tolung kami." ²³ Yesus boek kepodonye, "Munye Kowe depot? Segelo sesuatu mongken untok mike nyo pecayo." ²⁴ Cecepat bepak anak iye meratop ngan beseru, " Ake pecayo! Tolunglah kehopipercayoonke!" ²⁵ Tekalo Yesus ngole bahwa urang lobot bekerumun ngan cepat, Nye membentak roh iye sambel boek kepodonnye, "Kowe roh bisu ngan pokok, Ake perintahko kowe keluor deri anak nie ngan jengon memasokinnye lagi!" ²⁶ Sesodah mekek ngan mengguncang-guncangko anak iye ngan hebat, mengka roh iye keluor. Anak iye menjedi upa urang mati empoknyo urang lobot iye boek, "Nye mati!" ²⁷ Cuma hambok, Yesus memogong tangon anak iye ngan menjegokonnye, mengka anak iye togok. ²⁸ Ngan, tekalo Yesus masok ke delom rumah, mured-mured-Nye betanyo kepodo-Nye betanyo kepodo-Nye secaro peribadi, " Mengka kami hopi depot mengosernye?" ²⁹ Ngan, Nye boek kepodo mike, "Jenis nie hopi depot keluor kecuali anyo ngan doa." ³⁰ Deri sane, Yesus ngan mured-mured-Nye bejelon ngan melewati wilayah Galilea. Ngan, Nye hopi endok ado urang nyo tahu. ³¹ Sabab, Nye sedang mengajor mured-mured-Nye ngan boek kepodo mike, " Anak Mendesio nak deserahko ke tangon mendesio, ngan mike nak membunoh-Nye. Ngan, sesodah Nye debunoh, tiga hari kemudion Nye nak bangket." ³² Cuma hambok, mured-mured hopi memahami pemboekon iye ngan takot betanyo kepodo-Nye. ³³ Mengka , Yesus ngan mured-mured-Nye sampoi de Kapernaum. Ngan, setelah Yesus de delom rumah Nye betanyo ngan mike, ''Ape nyo kou buekkoh delom pejelonon ?'' ³⁴ Cuma hambuk, mike melegon ulenyo delom pejelonon mike bedebat sikok ngan nyo loen tentang siape nyo sajo tegodong, ³⁵ Mengka, Yesus duduk ngan memantou ke dua belas mured. Ngan, Nye boek kepodo mika," Munye seseurang nak menjedi nyo pertamo, nye haros menjedi nyo terakher deri segelonye ngan pelayan bage segelonye,'' ³⁶ Kemudion, Yesus mengambek seurang anak kecik ngan memotekkonye togok de antaro mike, ngan, sambel memoluk anak nye, Nye buek ngan mike, ³⁷ ''Siape bae nyo menyambut seurang anak kecik upa nie delom namo-Ke, nye menyambut Ake. Ngan, siapo bae nyo menyambut -Ake, bukon menyambut Ake, meloenko Enye nyo mengutus Ake .'' ³⁸ Yohanes buik ngan Yesus, ''Guru, kamie ngole mengusir setan - setan delom namo-Me, ngan kamie tagahi ulenyo nye hopi mehalow kite.'' ³⁹ Cuma hambok, Yesus boek '' Jengon detagahi ulenyo hopi ado urang nyo melakuko perbuaton ajaib delom namo-Ke depot saat iye jugo menghujat Ake. ⁴⁰ Sabab, siape nyo hopi melawon kite, ado de pihak kite. ⁴¹ Sabab, Ake mengehatoko nyo sebonornye ngan kowe, siapo bae nyo memborime secangker aik ulenyo kowe pengikut Kristus, hopi akan kesayawon upahnye.'' ⁴² ''Ngan siapo bae nyo membuat saloh sikok deri anak-anak kecik nyo percayo kepode-Ke iye berbuat doso, lobeh beik bage dirinye munye sebuah betu kilangon nyo godong de gentungko de lehernye ngan nye decampok kedelom lout, ⁴³ Ngan, munye tangonme membuat kowe bedoso, totoklah tangonme iye. Lobeh beik bageme masok ke delom kehidupon ngan tangon buntung, deripado ngan dua tangon masok ke nerako, ke delom api nyo hopi akan pernah padom ⁴⁴ tempat nyo ulotnyo hopi bakal teelek ngan apinyo hopi padom. ⁴⁵ Ngan, munye kakime menyebabko kowe bedoso, totoklah kakime iye. Lobeh beik bage kowe masok ke delom hidop ngan kaki buntung, deripado ngan dua kaki detohuko ke delom nderako, ⁴⁶ Deman nyo ulotnye hopi nak mati ngan api nye hopi nak padom. ⁴⁷ Ngan, munye matome membuat kowe bedoso, cukeklah motome iye. Lobeh beik bage kowe masok ke Kerajaon Allah ngan sikok mato deripado ngan dua mato detohuko ke delom nderako, ⁴⁸ deman nyo ulatnye hopi nak mati ngan apinye hopi nak padom. ⁴⁹ Sabab, setiap urang nak degeromi ngan api. ⁵⁰ Gerom iye beik, cuma munye gerom iye sayaulah kemasenonnye, upamone kowe nak membuatnye masen lagi? Melekilah gerom de delom dirime dewek ngan bedamailah sikok ngan nyo loen."