(Tojoh Roti untok Lobeh deri Empat Ribu Urang) ¹ Podo hari-hari iye, tekalo sejumlah godong urang bekompol ngan hopi ado apo-apo untok de makon, Yesus mantou murid-murid-Nye ngan boek kepodo mike, ² "Ake sajo tesihan kepodo urang lobot iye ulenyo kinie mike lasoda besamo ngan-Ke selamo tiga hari, ngan hopi ado apo-apo untok demakon. ³ Ngan, munye Ake nyorohko mike belek ke rumah mike delom keadaon kelaporon, mike nak pingsan delom perjelonon ulenyo beberape deri mike jongok deri jouh." ⁴ Ngan, mored-mored-Nye menyimbot Nye, "Deri mone seseurang pacok mengonyongko mike ngan roti de deman sepi upa nie?" ⁵ Mengka, Yesus betanyo kepodo mike, "Berape roti nyo kou ado?" Mike jawab, "Tojoh roti." ⁶ Kemudion, Yesus memerintahko urang lobot iye dodok de tanoh, ngan Enye mengambek tojoh roti iye, ngan mengucap syukur, ngan Enye memacah-macahkonye, ngan memborikonye kepodo mured-mured-Nye untok menghidangkonye kepodo urang lobot. Mike pun menghidangkonnye kepodo urang lobot. ⁷ Ngan, mured-mured jugo mempunyoi kekecikon ikan kecik. Sesodah mengucap syukur atasnya, Yesus menyoroh mured-mured-Nye untok membageko jugo ikan-ikan iye kepodo urang lobot. ⁸ Urang lobot iye makon sampoi konyong, ngan mike mengompolko totokon makonon nyo tesisa iye tujoh keranjang ponoh. ⁹ Ado kiro-kiro empat ribu urang nyo makon. Sesodah iye, Yesus menyoroh mike bejelon ¹⁰ Mengka Yesus cepat-cepat masok biduk besamo mured-mured-Nye ngan sampoi de daerah Dalmanuta. ¹¹ Ngan, urang-urang Farisi jongok ngan mulai bedebat ngan Yesus, sambel meminta Yesus menunjokko tando deri surga, untok mencuboi-Nye. ¹² Sesodah Yesus menarek napas panjong delom Roh-Nye, Nye boek, "Mengka generasi nie ndelok tando? Ake memboeko nyo sebonornye kepodome, hopi ado sikok pun tando nyo nak deboriko kepodo generasi nie." ¹³ Kemudion, Yesus meninggalko mike, masok belek ke delom biduk, ngan bejelon ke seberang. ¹⁴ Mured-mured piteringot mengunda roti, ngan anyo memeleki sekorot roti de delom biduk. ¹⁵ Ngan, Yesus beposon kepodo mike,"Siap sediolah! Behati-hatilah terhadop ragi urang-urang Farisi ngan Ragi Herodes." ¹⁶ Mengka mike mulai bediskusi sikok ngan nyo loen soal mike nyo hopi mempunyoi roti. ¹⁷ Ngan, sesodah mengetahui hal nie, Yesus boek kepodo mike, "Mengka kowe memboeko tentang kowe nyo hopi mempunyoi roti? Apo kowe bolom jugo mengetahui apo tereti? Apo hatime dekarasko? ¹⁸ Apokah kowe mempunyoi mato, cuma hopi ngole? Ngan, mempunyoi telinga, cuma hopi mendongor? Hopi ingotko kowe, ¹⁹ tekalo Ake memacah-macahko lima roti untok lima ribu urang, beberape lobot keranjang nyo berisi ponoh ngan totokon-totokon makonon nyo kowe kompolko?" Mike menjawab, " Dua belas keranjang." ²⁰ "Ngan, tekalo tujuh roti untok empat ribu urang iye, beberape keranjang nyo ponoh ngan totokon-totokon makonon nyo kou kumpolko?" Mike menjawab, "Tujoh keranjang." ²¹ mengka, Nye boek kepodo mike, "Apokah kowe lagi bolom tereti?" ²² Kemudion, Yesus ngan mured-mured-Nye sampoi de Betsaida. Ngan, beberape urang mengunda urang buta ngan memohon kepodo Yesus empok memogongnye. ²³ Yesus pun memogongko tangon urang buta iye ngan mengundanye keluor desa. Mengka, Yesus meludahi mato urang buta iye ngan motekko tangon-Nye pucok nye. Nye betanyo kepodonye, "Apokah kowe mengoleh sesuatu?" ²⁴ Mengka, urang iye mengoleh ke pucok ngan boek, "Ake mengole urang-urang, cuma mike tekoleh upa kayu-kayu nyo sedang bejelon." ²⁵ Sesodah iye, Yesus memotekko tangon-Nye de pucok mato urang iye lagi, mengka urang iye membuka matonye, pengolehonnye semboh, ngan nye pun depot mengole segelo ngan jelas. ²⁶ Mengka, Yesus menyurohnnye belek ke rumahnye ngan boek, "Jengon masok ke delom desa." ²⁷ Sesodah iye, Yesus bejelon, besamo mured-mured-Nye, ke desa-desa de Kaisarea Filipi. Ngan, de tangah perjelonon, Yesus betanyo kepodo para mured ngan boek kepodo mike, "Ujo urang-urang, siape Aku nie?" ²⁸ Mike menyimbot, "Yohanes Pembaptes, nyo loen memboekko Elia, ngan nyo loennye saloh sikok deri nabi-nabi." ²⁹ Kemudion, Yesus betanyo kepodo mike, "Hambok, menurotme, siape Aku nie?" Petrus menyimbot-Nye, Kowe adoalh Kristus." ³⁰ Ngan, Yesus memperingotko mike untok hopi memboritahuko kepodo siape pun tentang diri-Nye. ³¹ Kemudion, Yesus mulai mengajor mured-mured-Nye bahwa Anak Mendesio haros menderita lobot hal ngan detolak uleh tua-tua Yahudi, imam-imam kepalo, sereta ahli-ahli Taurat, ngan debunoh, ngan sesodah tiga hari bangket lagi. ³² Ngan, Yesus memboeko hal nie secaro tebuka. Ulenyo iye, Petrus menarek Yesus ke sampeng ngan mulai menegor-Nye. ³³ Hambok, sambel menoleh ngan ngole mured-mured-Nye, Yesus menegor Petrus ngan boek, "Pegilah deri-Ke, hai Beles! Sabab, kowe hopi memekerko pekaro-pekaro Allah, cuma pekaro-pekaro mendesio." ³⁴ Sesodah iye, Yesus memantou urang lobot, sereta mured-mured-Nye, ngan boek kepodo mike, "Munye seseurang endok mehilu Ake, nye haros menyangkal dirinye dewek, ngan memikol salibnye, mengka mehilui Aku. ³⁵ Sabab, siape bae nyo endok menyelamatko nyawonye nak kesayauon. Cuma hambok, siape bae nyo kesayauon nyawonye demi Ake ngan Injil nak menyelamatkonnye. ³⁶ Sabab, ape untongnye seseurang mendepotko segelo denia, cuma kesayauon nyawonnye? ³⁷ Ape nyo depot seseurang boriko untok menobos nyawonnye? ³⁸ Sabab, siape bae nyo malu ulenyo Ake ngan firman-Ke de generasi nyo hopi setia ngan bedoso nie, mengka Anak Mendesio jugo nak malu mengaku urang iye tekalo Nye jongok delom kemuliaon Bepak-Nye besamo ngan malaikat-malaikat nyo kudus."