¹ Sesodah iye, Yesus bejelon de Yudea sabab urang-urang Yahudi de sane bemaksud untuk membunuh Enye. ² Ulenyo iye, hari rayo urang Yahudi, yaitu hari rayo Pondok Doun, lah parok. ³ Ulenyo iye, dolor-dolor Yesus boek kepodo-Nye, "Bejelonlah deri sie ke Yudea empoknyo mored-mored-Me jugo nak ngelek gaweon-gaweon nyo Kou lakuko. ⁴ Sabab, hopi ado urang nyo melakuko ape pon secaro tekerawo munye enye endok dekenal secaro umum. munye Kowe melakuko hal-hal iye, tunjukolah diri-Me kepodo denia." ⁵ Sabab, dolor-dolor Yesus dewek pon hopi pecayo kepodo-Nye. ⁶ Yesus boek kepodo mike, "Waktu-Ke bolom sampoi, cuma waktume nak selalu tesedio. ⁷ Denia hopi depot membenci kowe, cuma denia membenci Ake ulenyo Ake memboriko kesaksion tentang denia, bahwa perbuaton-perbuatonnye adolah jahat. ⁸ Larilah mike ke perayaon iye. Ake bolom lari ke perayaon iye ulenyo waktu-Ke bolom sampoi." ⁹ Sesodah melabehko demikion, Yesus tetap tinggal di Galilea. ¹⁰ Hambok, sesodah dolor-dolor-Nye lari k perayaon iye, Yesus jugo lari ke sane, hopi secaro terang-terangon, cuma secaro diom-diom. ¹¹ Urang-urang Yahudi delok Enye delom perayaon iye, ngan boek, "De mone Enye?" ¹² Ado lobot besek-besek de antaro urang lobot menganai Enye. Ado nyo boek, "Enye urang beik." Ado pula nyo boek, "Hopi, Enye menyosotko reayat." ¹³ Cuma hambok, hopi seurang pon berani boek teros terang menganai Enye ulenyo takot kepodo urang-urang Yahudi. ¹⁴ Ketiko perayaon iye lagi berlangsong, Yesus masok ke Bait Allah ngan mulai mengajor. ¹⁵ Urang-urang Yahudi menjedi heran ngan boek, "upamone Urang nie memeleki pengetahuon nyo demikion, padohal hopi belajor?" ¹⁶ Yesus menjawab mike ngan boek, "Ajoron-Ke hopi beasal deri diri-Ke dewek, cuma deri Enye nyo mengutos Ake. ¹⁷ Munye seseurang endok melakuko kehendok Allah, enye nak mengetahui ajoron-Ke, apekah iye beasal deri Allah atau deri diri-Ke dewek. ¹⁸ Urang nyo boek deri dirinye dewek delok hormat untok derinye dewek, cuma urang nyo delok hormat untok Enye nyo mengotosnye, enye bonor ngn hopi ado kehopibonoron de delom dirinye. ¹⁹ Bukonkah Musa lah memboriko Hokom Torat kepodome, cuma hopi seurang pon deri antarome nyo mematohi hokom iye? Mengkah kowe beusaha untok membunoh Ake?" ²⁰ Urang lobot iye menjawab, "Kowe kerasokon roh jahat! Siape nyo beusaha membunoh-Me?" ²¹ Yesus boek kepodo mike, "Ake hanyo melakuko sikok gaweon ngan mike segelo heran. ²² Musa memborime sunat, sebonornye iye bukon deri Musa, cuma deri nenek puyang, urang podo hari Sabat. ²³ Munye seseurang de sunat podo hari Sabat sehinggo Hokom Musa hopi delanggar, mengkah kowe bemarah kepodo-Ke ulenyo Ake membuat seseurang sehat seponohnye podo hari Sabat? ²⁴ Jengon menghakemi berdasarko nyo tekelek, meloenko hakemilah ngan penghakemon nyo bonor." ²⁵ Kemudion, beberape urang nyo tinggal de Yerusalem boek, "Bukonkah Enyo nie Urang nyo hendok mika bunoh? ²⁶ Cuma hambok, Keleklah, Enye enye boek secaro terang-terangon ngan mike hopi melabehko ape pon kepodo-Nye. Mungkenkah para pemempen iye bonor-bonor lah mengetahui bahwa Enye adolah Kristus? ²⁷ cuma hambok, kite tahu deri mone Urang nie beasal. Sementaro iye, kekito Kritus jongok, padohal apobila Kristus jongok, hopi seurang pon tahu deri mone Enye beasal." ²⁸ Ulenyo iye, sementaro Yesus mengajor de Bait Allah, Enye beseru, "Kowe memang mengenal Ake ngan tahu deri mone Ake beasal. Hambok, Ake hopi jongok deri diri-Ke dewek, cuma Enye nyo mengotos Ake adolah bonor, kowe hopi mengenal Enye ²⁹ ulenyo Ake beasal deri-Nye ngan Enyelah nyo lah mengitos Ake." ³⁰ Lalu, mike beusaha menangkop Enye, cuma hopi seurng pon depot meraboh Enye ulenyo waktu-Nye bolom sampoi. ³¹ Hambok, lobot deri urang-urang iye pecayo kepodo Yesus. mike boek, "Apobila Kristus iye jongok, appekah enye nak melakuko lobeh neman tando ajaib deripado nyo lah de lakuko Urang nie?" (Pemempen Yahudi Beusaha Menangkop Yesus) ³² Urang-urang Farisi mendongor ape nyo deboeko urang lobot iye tentang Yesus, maka imam-imam kepalo ngan urang-urang Farisi menyoroh para penjago Bait Allah untok menangkop Enye. ³³ ulenyo iye, Yesus boek, "Waktu-Ke besamo-samo nganme tinggal setegal lagi ngan sesodah iye, Ake nak lari kepodo Enye nyo mengotos Ake. ³⁴ Kowe nak delok Ake, cuma hopi nak menomko-Ke. Ngan, de mone Ake ado, kowe hopi depot jongo ke sane." ³⁵ Urang-urang Yahudi iye boek seurang kepodo nyo loen, "Ke monekah Urang nie nak lari sehinggo kite hopi depot menomuko Enye? Apekah enye nak lari kepodo urang Yahudi nyo tesebar di antaro urang-urang Yunani, ngan mengajor urang-urang Yunani? ³⁶ Ape maksud perkataon-Nye nyo boek, 'kowe nak delok Ake, cuma hopi nak menomuko-Ke. Ngan, demone Ake ado, kowe hopi depot jongok ke sane?"' (Yesus Boek mengenai Roh Kudos) ³⁷ Podo hari teakher, yaitu poncak perayaon iye, Yesus togok ngan beseru, ujo-Nye, "Munye ado nyo raus beiklah enye jongok kepodo-Ke ngtan minom. ³⁸ Urang nyo pecayo kepodo-Ke, upa nyo degerako Kitab Suci, deri delom dirinye nak mengaler aleron aek hidop." ³⁹ Hal nyo demaksudko Yesus adolah Roh, nyo nak deterimo uleh urang nyo pecayo kepodo-Nye. Sabab, Roh iye bolom de boriko ulenyo Yesus bolom demuliako. ⁴⁰ Ketiko mike mendongor perkataon iye, beberape deri mike boek, "Urang nie bonor-bonor seurang Nabi." ⁴¹ Urang nyo loen boek, Enye adolah Kristus." Urang nyo loen lagi boek, "Mungkenkah Kristus jongok deri Galilea? ⁴² Bukonkah Kitab Suci melabehko bahwa kristus beasal deri keturonon Daud ngan deri Betlehem, doson tempat Daud dulu tinggal?" ⁴³ Lalu, tejedilah pepecahon di antaro urang-urang iye ulenyo Enye. ⁴⁴ Beberape urang deri antaro mika endok menangkop Yesus, cuma hopi seurang pon meraboh-Nye. ⁴⁵ Ulenyo iye, para penjago Bait Allah iye belek kepodo imam-imam kepalo ngan urang-urang Farisi, nyo betanyo kepodo mike, "Mengkah mike hopi ngundah Yesus?" ⁴⁶ Para penjago Bait Allah iye menjawab, "Hopi seurang pon perenah bekato-kato upa urang nie!"' ⁴⁷ Urang-urang Farisi iye menjawab mike, "Apekah mike jugo lah desosotko? ⁴⁸ Adokah seurang deri antaro pemempen ataupon urang Farisi nyo lah pecayo kepodo-Nye? ⁴⁹ Cuma hambok, urang lobot nyo hopi tahu Hokom Torat nie adolah tekutok !" ⁵⁰ Cuma hambok, Nikodemus, saloh seurang deri mika, nyo dulu perenah nomui Yesus , boek kepodo mike, ⁵¹ "Apekah Hokom Torat kite menghakemi seseurang sebolom mendongor hal nyo degerakonye ngan deketahui hal nyo enye lakuko?" ⁵² Mike menjawab, "Apekah kowe jugo urang Galilea? Seledeki ngan keleklah bahwa hopi ado nabi nyo jongok deri Galilea." ⁵³ Kemudion, mike segelo belek kerumah maseng-maseng.