¹ Ado seurang Farisi benamo Nikodemus. Enye adolah seurang pemempen bengeso Yahudi. ² Suatu malom, nye jongok kepodo Yesus ngan boek," Rabi, kamie tahuko bahwa kowe adolah Guru nyo jongok jak Allah ulenyo hopi ado seurang pon nyo depot melakuko tando tando ajaib nyo kou lakuko,kecuali Allah ado besamonye." ³ Jawab Yesus kepodonye, sebonor bonornye Ake boek kepodome, munye seseurang hopi delaherko belek, nye hopi depot ngole kerajaon Allah." ⁴ Nikodemus betanyo, " Upamone mungken seseurang depot delaherko belek munye nye lah tuha? Depotkah enye masok lagi kedelom rahim indoknye ngan delaherko belek? ⁵ Jawab Yesus kepodonye, "Sesonggohnye, Ake boek kepodome, munye seseurang delaherko jak aek ngan Roh, nye hopi depot masok kedelom kerajaon Allah. 6 Ape nyo delaherko jak degeng adolah degeng, ngan ape nyo delaherko jak Roh adolah roh. ⁷ Jengonlah heran ulenyo Ake boek ngan me, 'kowe haros delaherko belek'. 8 Angen betiop kemone pon nyo endok ngan kowe dongor pemboekonnye, hambok kowe hopi tahuko jak mone asalnye ngan kemone nyo larie. Upaiyelah jugo ngan setiap urang nyo delaherko jak Roh." ⁹ Nikodemus betanyo, "Upamone mungken segelo hal iye tejedi?" ¹⁰ Yesus menjawab, "Bukonkah kowe guru urang Israel, cuma kowe hopi mengerti segelo hal nie? ¹¹ Sebonor bonornye, Ake melabehko kepodome bahwa kami boek tentang upah nyo kami ketahui ngan bori kesaksion tentang ape nyo kami kole, hambok kowe hopi nerimo kesaksion kami. ¹² Munye Ake memboritahume tentang hal hal deniawi bae kowe hopi pecayo, upah mone mungken kowe nak pecayo munye Ake memboritahume tentang hal hal sergawi? ¹³ Hopi seurang pon perenah noek ke surga, kecuali Enye nyo lah toron jak surga, yaitu Anak Mendesio. ¹⁴ Samo upah Musa noeko ulor tembaga de padang belantara, demikion jugo Anak Mendesio haros detinggalko, ¹⁵ empok setiap urang nyo pecayo kepodo- Nye mendepotko hidop nyo kekal. ¹⁶ Ulenyo Allah sajo mengasehi denia nie, Enye memboriko Anak-Nye nyo tunggal empoknyo setiap urang nyo pecayo kepodo-Nye hopi binaso, meloenko memperuleh hidop nyo kekal. ¹⁷ Ulenyo Allah mengotos Anak-Nye kedelom denia bukon untok menghakemi denia, meloenko empok denia deselamatko melalui Anak-Nyo. ¹⁸ Urang nyo pecayo kepodo-Nye hopi akan dehokom, hambok urang nyo hopi pecayo lah ado debewoh hokomon ulenyo enye hopi pecayo podo namo Anak Tunggal Allah. ¹⁹ Nielah hokomon nye: Tarang lah jongok kedelom denia, cuma mendesio lobeh mengagomi kekolomon jak podo tarang ulenyo ape nyo mika lakuko adolah jahat. ²⁰ Ulenyo setiap urang nyo bebuat jahat membenci tarang ngan hopi jongok jugo kepodo tarang iye empok perbuaton-perbuatonnye hopi deungket -ungket. ²¹ Cuma hambok, urang nyo melakuko kebonoron jongok kepodo Tarang iye empoknyo deyatoko perbuaton-perbuatonnye iye delakukonye de delom Allah.? Yohanes Besaksi tentang Yesus ²² Sesodah iye, Yesus ngan para mured-Nye lari ke tanoh Yudea. De sane, Enye menghabesko waktu besamo mike ngan membaptes. ²³ Yohanes jugo membaptes de Ainon parok Salim ulenyo ado lobot aek de sane. Urang-urang bejongokon ngan debaptes. ²⁴ Waktu iye, Yohanes bolom demasokko ke delom penjara. ²⁵ Ngan timbol perdebaton antaro beberape mured Yohanes ngan seurang Yahudi menganai penyucion. ²⁶ Mike menomui Yohanes ngan boek, "Guru, Urang nyo besamome de seberang Yordan, nyo tentang Enye kowe lah besaksi, Keleklah, Enye jugo membaptes ngan segelo urang jongok kepodo-Nye." ²⁷ Yohanes nyimboti, "Mendesio hopi depot menerimo ape pon, kecuali hal iye deboriko kepodonye deri surga. ²⁸ Kou dewek depot membori kesaksion bahwa ake pernah boek, 'Ake bukon Mesias,' cuma ake deutus untok mendehului-Nye. ²⁹ Urang nyo nuhani mempelai betina adolah mempelai jenton hambok dolor mempelai jenton, nyo togok ngan dongorkonye, sajo besukacita mendongor suaro mempelai jenton. Jedi, sukacitake nie lah dejediko ponoh. ³⁰ Enye haros semaken godong ngan ake haros semaken kecik." ³¹ "Enye nyo jongok deri pocok adolah de pocok segelonye, Enye nyo beasal deri denia adolah jak denia ngan boek tentang hal-hal nyo ado de denia. Enye nyo jongok deri surga adolah de pucok segelo sesuatu. ³² Enye membori kesaksion tentang ape nyo dekelek ngan dedongor-Nye, cuma urang-urang hopi menerimo kesaksion-Nye. ³³ Urang nyo menerimo kesaksion-Nye mengakui ngan sungguh bahwa Allah iye bonor. ³⁴ Sabab, urang nyo deutos Allah nak menyampoiko perkataon Allah ulenyo Allah memboriko Roh nyo hopi tebatas. ³⁵ Bepa mengasehi Anak ngan lah menyerahko segelo sesuatu ke delom tangon-Nye. ³⁶ Urang nyo pecayo kepodo Anak menuhani hidop nyo kekal,hambok urang nyo hopi menaati Anak hopi nak ngelek kehidopon, meloenko murka Allah tetap ado podonye."