¹ Ketiko Tuhan mengetahui munye urang-urang Farisi lah mendongor bahwa nye menghaselko ngan membaptes lobeh neman mored deripado Yohanes, ² (meskipon Yesus dewek hopi membaptes, meloenko mured-mored-Nye), ³ Enye meninggalko Yudea ngan belek lagi ke Galilea. ⁴ Hambok, Enye melewati wilayah Samaria. ⁵ Sampoilah Yesus de Samaria, de sebuah kota nyo benamo Sikhar, nyo tepotek de parok letak nyo dulu deboriko Yakub kepodo anaknye, Yusuf. ⁶ Sumur Yakub ado de sane. Kemudion, Yesus nyo litak ulenyo perjelonon, dodok de pengger sumur iye. Saat iye, kiro-kiro jam keenom. ⁷ Jongoklah seurang betina Samaria untok menimbah aek. Yesus boek kepodonye, "Borilah Ake minom." ⁸ (Sabab, mured mured-Nye lah lari ke kota untok memboli makonon.) ⁹ Betina Samaria iye boek kepodo Yesus, "Upamone mungken Kowe, urang Yahudi, memintak aek minom kepodoke nyo adolah betina Samaria?" (Sabab,urang Yahudi hopi betegor sapa ngan urang Samaria), ¹⁰ Yesus menjawab ngan boek kepodonye, "Munye kowe tahu tentang karunia Allah ngan tahu siape nyo boek kepodome, 'Borilah ake minom', kowe pasti nak mintak kepodo-Nye, ngan Enye nak memborime aek hidop." ¹¹ Betina iye boek kepodo-Nye, "Tuan, Kowe hopi ado timba ngan sumur nie sajo delom, deri mone Kowe nak memperoleh aek hidop iye? ¹² Apekah Kowe lobeh godong deripado nenek puyang kami, Yakub, nyo memboriko sumur nie kepodo kami ngan nyo lah minom dewek deri sumur nie beserta segelo anak ngan ternaknye?" ¹³ Yesus menjawab ngan boek kepodonye, "setiap urang nyo minom deri aek nie akan raos lagi, ¹⁴ cuma urang nyo minom deri aek nyo kuboriko kepodonye hopi akan raos lagi; meloenko aek nyo kuboriko kepodonye iye akan menjedi mato aek de delom dirinye nyo akan teros memancar sampoi kepodo hidop nyo kekal." ¹⁵ Betina iye boek kepodo Yesus, " Tuan, borilah ake aek iye empoknyo ake hopi akan raos lagi ngan ake hopi pereluh jongok lagi ke mai untok menimbah aek." ¹⁶ Yesus boek kepodonye, "Larilah, pantou lakime ngan beleklah kemai." ¹⁷ Betina iye nyimboti, "Ake hopi ado laki." Ujo Yesus kenempatnye, "kou bonor saat boek, Ake hopi ado laki. ¹⁸ Ulenyo kowe lah perenah memeleki lima laki, ngan jenton nyo tinggal besamome kinie bukonlah lakime. Delom hal nie, kowe boek bonor." ¹⁹ Ujo betina iye kepodo-Nye, "Tuan, kinie ake tahu bahwa Kowe adolah seurang Nabi. ²⁰ Nenek puyang kami menyembah de gunong nie, cuma bengso-Me nelabehko bahwa Yerusalemlah tempat urang haros menyembah." ²¹ Yesus boek kepodonye, " pecayolah kepodo-Ke, hai betina! Akan sampoi saatnye ketiko bukon de gunong nie ataupon de Yerusalem urang menyembah Bepa. ²² Kowe menyembah nyo hopi kou kenal, cuma kami menyembah nyo kami kenal ulenyo keselamaton jongok deri bangso Yahudi. ²³ Hambok, akan sampoi saatnye yaitu kinie, penyembah-penyembah bonor nak menyembah Bepa delom roh ngan kebonoron; sabab Bepa menontot nyo upa iye untok menyembah Enye. ²⁴ Allah adolah Roh ngan mike nyo menyembah Enye haros menyembah-Nye delom roh ngan kebonoron." ²⁵ Betina iye boek kepodo-Nye, "Ake tahu bahwa Mesias nak jongok (Enye nyo desobot Kristus). Ketiko Enye jongok, Enye nak melabehko segelo sesuatu kepodo kami." ²⁶ Jawab Yesus kepodonye, "Ake, nyo edang boek kepodome adolah Enye." ²⁷ Saat iye, jongoklah mored-mored-Nye ngan mike heran ngelek Yesus edang boek ngan seurang betina. Hambok, hopi seurang pon nyo betanyo kepodo-Nye, "Ape nyo kou delok?" atau "Mengkah Kowe boek ngan enye?" ²⁸ Kemudion, betina iye meninggalko kendi aeknye ngan lari kekota serta boek kepodo urang-urang de sane, ²⁹ "Maro, keleklah ado seseurang nyo melabehko kepodoke segelo sesuatu nyo lah ku lakuko. Mungkenkah Enye Mesias iye?" ³⁰ Mike pon lari ke luor kota ngan menomui Yesus. ³¹ Sementaro iye, mured-mored-Nye mendesak Yesus ngan boek, "Rabi, makonlah." ³² Hambok Yesus boek kepodo mike, "Ake ado makonon nyo hopi kou kenal." ³³ Lalu, mured-mured betanyo sikok kepodo nyo loen, "Apekah hopi ado urang nyo ngundah sesuatu kepodo-Nye untok demakon?" ³⁴ Yesus boek, "Makonon-Ke adolah melakuko kendok Enye nyo mengotos Ake ngan menyodahko gaweon-Nye. ³⁵ Bukonkah kowe boek, 'Empat bulan lagi musem panen sampoi'? Keleklah, Ake boek kepodome, bukalah matome ngan Keleklah huma-huma lah menguneng untok de tuoi. ³⁶ Kinie jugo, enye nyo menuoi lah menerimo upahnye ngan mengompolko buah untok hidop kekal sehinggo penui ngan penabor depot besukacita besamo-samo. ³⁷ Delom hal nie perkataon nie bonor, 'Nyo seurang menabor ngan nyo loen menuoi.' ³⁸ Ake mengotos kowe untok menuoi sesuatu nyo hopi kowe gaweko; urang loen sodah menggawekonye ngan kowe lah masok ke delom gaweon mike." ³⁹ Lobot urang Samaria deri kota iye menjedi pecayo kenempat Yesus ulehnyo pembuikkon betina iye, nyo memboriko kesaksion," Enye memboritahuko ake segelo hal nyo lah kelakuko." ⁴⁰ Jedi, tekalo urang-urang Samaria iye sampoi kenempat Yesus, mike memintak-Nye untok tinggal serompok mike ngan Yesus tinggal de sane selamo dua hari. ⁴¹ Ngan, ado lobeh lobot urang lage nyo pecayo ulehnyo pembuikkon Yesus dewek. ⁴² Mike buik kenempat betina iye," Bukon lage ulehnyo pembuikkonme kamie menjedi pecayo, meloinko ulehnyo kamie dewek lah mendongor, ngan kamie tahuko behwo Enye nie bonor-bonor Juruselamat denia." ⁴³ Lah 2 hari, Yesus meninggalko tempat iye ngan menuju Galilea. ⁴⁴ ( Sebolumnye, Yesus dewek lah memboriko kesaksion behwo seurang nabi hopi de hormati de negerinye dewek.) ⁴⁵ Tekalo Yesus sampoi de Galilea, urang-urang Galilea menyambut-Nye ulehnyo mike lah ngoleh segelo sesuatu nyo de gaweko Yesus delom perayaon Paskah de Yerusalem ulehnyo mike jugo pogi ke perayaon iye. ⁴⁶ Ulehnyo iye, Yesus njongok lage ke Kana, Galilea, tempat Enye perenah mbuat aek menjedi anggur. De Kapernaum ado seurang pegawai istana nyo anak jentonnye sedang saket. ⁴⁷ Tekalo pegawai istana iye mendongor behwo Yesus lah njongok deri Yudea ke Galilea, enye pogi menomui ngan memohon kenempat Yesus enggakkoknyo njongok ngan menyombuhko anaknye ulehnyo anaknye sodah hamper te'elek. ⁴⁸ Mengka, Yesus buik kenempatnye," Munye kowe hopi ngoleh tando-tando ngan hal-hal ajaib, kowe hopi endok pecayo." ⁴⁹ Pegawai istana iye buik, " Tuan, njongoklah sebolum anakke te'elek." ⁵⁰ Yesus buik kenempatnye," Beleklah, anakme hidop!" urang iye pecayo pado pembuikkon nyo de kehatoko Yesus kenempatnye ngan pogilah urang iye. ⁵¹ Tekalo pegawai istana iye lage delom pejelonon, budak-budaknye betomu dengannye ngan membori tahuko behwo anak jentonye hidop. ⁵² Pegawai istana iye betanyo kenempat mike tentang jam berape kondisi anaknye mulakih membeik. Ngan, mike nyimbot," Kemaren kiro-kiro jam ketujuh domomnye sayau." ⁵³ Bepak anak iye tahuko, pado waktu iyelah Yesus buik kenempatnye, " Anakme hidop." Jedi, pegawai istana iye ngan segelo keluarganye menjedi pecayo kenempat Yesus. ⁵⁴ Iyelah tando ajaib kedua nyo de lakuko Yesus lah belek deri Yudea ke Galilea.