¹ Tekalo Petrus ngan Yohanes buik kenempat urang lobot, njongoklah kenempat mike padong imam, kepalo penjego Bait Allah, ngan urang-urang Saduki, ² Ngan sajo bemarah ule mike mengajor urang lobot ngan menenelako de delom Yesus ado kebangketon deri antaro urang te'elek. ³ Mengka, mike menangkop Petrus ngan Yohanes ngan memasukkonye ke delom penjaro sampoi pepagie ulenyo hari sodah malam. ⁴ Hambok, lobot deri mike nyo la mndokor pembuikon padong rosul menjedi pecayo, ngan jumlah jenton de antaro mike menjedi kiro-kiro lima ribu urang. ⁵ Pado pepagi harinye, pemempen-pemempen, tuha-tuha, ngan ahli-ahli Torat mike bekumpul bsamo de Yerusalem, ⁶ Serompok ngan Imam godong Hanas, ngan Kayafas, Yohanes, Aleksander, ngan segelo urang deri keluargo Imam godong. ⁷ Tekalo mike menempatko Petrus ngan Yohanes de tangah-tangah, mike betanyo," Dengan kuaso ape atau dengan namo siape kowe melakuko tong nie?" ⁸ Mengka, Petrus, de ponuhi dengan Roh Kudus, buik kenempat mike, " Padong pemempen bengeso ngan tuha-tuha, ⁹ Munye kamie de perikso sari nie ule suatu perbuaton beik nyo lah kamie lakuko terhadop urang nyo lamah nie, dengan caro ape urang nie lah de sembuhko ? ¹⁰ Biarlah tong nie de ketahui ule kowe segelo ngan segelo urang Israel behwo ule namo Kristus Yesus, urang Nazaret, nyo kowe salibko, nyo lah Allah bangketko deri antaro urang te'elek, urang ni togok de hadoponme delom keadaon sehat. ¹¹ Yesus nie adolah : ' Betu nyo de tolak ule kowe, tukang-tukang bengunon. nyo lah menjedi betu pnjuru.' ¹² Ngan, hopi ado keselamaton de delom siape pun loinye ule hopi ado namo loin de bewoh langet de boriko de antaro mendesio nyo ule namo iye kite depot de selamatko." ¹³ Tekalo mike ngoleh keberanion Petrus ngan Yohanes ngan tereti behwo mike adolah urang-urang hopi tepelajor ngan awam, mike menjedi temanga ngan mulakih mengenali behwo keduanye perenah serompok dengan Yesus. ¹⁴ Ngan, lah ngoleh urang nyo lah de sembuhko iye togok de sampeng Petrus ngan Yohanes, mike hopi depot melawonnye. ¹⁵ Cuma hambok, tekalo mike memerentahko Petrus ngan Yohanes untuk meninggalko Sanhedrin, mike berondeng sikuk dengan nyo loin, ¹⁶ Dengan buik," Ape nyo harus kite lakuko terhadop kedua urang nie? Sabab, sebuah tando ajaib nyo luor biaso lah terjedi melalui mike ngan begitu nyato bage segelo urang nyo tinggal de Yerusalem, ngan kite hopi depot menyangkolnye. ¹⁷ Cuma hambuk, mpuknyo tong nie hopi makin tesebar de antaro urang-urang, maro kite mngancam mike untuk hopi lage buik ngan siape pun delom namo iye." ¹⁸ Mengka, mike mamantou Petrus ngan Yohanes, mengka memerentahko keduanye untuk hopi buik atau mengajorko ape pun delom namo Yesus. ¹⁹ Cuma hambuk, Petrus ngan Yohanes nyimbot ngan buik kenempat mike, " Potoskolah, mone nyo bonor delom pengolehon Allah, untuk mendongorko kowe lobih deri podo Allah? ²⁰ Sabab, kamie hopi pacok kecuali ngehatoko hal-hal nyo lah kamie koleh ngan dongor." ²¹ Maka, tekalo mike terus mengancam Petrus ngan Yohanes, mike membiarko rosul-rosul iye pogi, lah hopi menemuko caro untuk menghukum keduanye ule nyo urang lobot nyo memuji Allah pucuk ape nyo la terjedi. ²² Sabab, urang nyo kenempatnye tando ksembuhon iye lah denyatako, sodah berumur lobih deri empat puluhj tahun. ²³ Tekalo spdah debebasko, Petrus ngan Yohanes bejelon kenempat kanti-kantinye dewek ngan menceritako segelo sesuatu nyo de kehatoko ule padong imam kepalo ngan tuha-tuha kenempat mike. ²⁴ Ngan, tkalo kanti-kantinye iye mendongornye, mike mengangket suaru mike kenempat Allah dengan sehati ngan buik," Ya Tuhan, kowelah nyo lah menjediko langt, behumi, lout, ngan segelo isinye, ²⁵ Nyo buik melolui Roh Kudus, melolui mulut hambo-Me, Daud, nenek puyang kamie: ' Mengka bengeso-bengeso loin ngamok, ngan urang-urang memperhatiko nyo sia-sia? ²⁶ Rajo-rajo denia bsiap - siap, ngan padong penguaso bekumpul besamo, melawon Tuhan ngan melawon nyo de urapi-Nye.' ²⁷ Sabab, sebonornye de kota nie la bekumpul serompok untuk melawon Yesus, Hambo-Me nyo Kudus, nyo Kowe urapi, beik Herodes ngan Pontius Pilatus, serompok dengan bengeso-bengeso loin, ngan urang-urang Israel, ²⁸ Untuk melakuko segelo sesuatu nyo ule tangon-Me ngan rencano-Me lah detentuko sebolumnye untuk terjedi. ²⁹ Ngan kinie, Tuhan, kolehlah ancomon-ancomon mike ngan karuniakolah hambo-hambo-Me nie untuk memberitako Firman-Me dengan segelo keberanion, ³⁰ Sementaro kowe mengulurko tangon-Me untuk menyembuhko ngan tando-tando serta keajaiban-keajaiban terjedi ule namo Hambo-Me nyo kudus, Yesus." ³¹ Ngan, lah mike bedoa, tguncanglah tmpat mike bekumpul besamo ngan mike segelo deponuhi dengan Roh Kudus, serta terus memberitako firman. ³² Ngan, kumpulon mike nyo pecayo besatu hati ngan jiwo. Hopi ado surangpun nyo buik behwo bando kepunyaonnye adolah miliknye dewek, hambuk segelo sesuatu adolah milik mike besamo. ³³ Mengka, dengan kuaso nyo godong padong rosul memboriko kesaksion mike tentang kebangketan Tuhan Yesus ngan anugerah nyo godong ado pucuk mike segelo. ³⁴ Hopi ado seurang pun yang kekurangon de antaro mike ule segelo urang nyo memiliki humah atau rumah, menjuolnye, ngan mengunda hasel penjuolenye, ³⁵ Mengka memotekko de kaki padong rosul, ngan de bage-bageko kenempat maseng-maseng urang sesuai dengan kebutuhonnye. ³⁶ Upa iye jugo Yusuf, urang Lewi, keturunon Siprus, nyo jugo de pantou ul padong rosul, Barnabas, nyo retinye' anak penghiburon ', ³⁷ Menjuol humah nyo de milikinye ngan ngunda duitnye, mengka memotekonye de kaki padong rosul.