¹ Suatu ari, Petrus ngan Yohanes bejelon ke Baet Allah pado waktu jam doa, nyoiye pado jam sembilan. ² Lalu, seurang jenton nyo lompoh jak delom kondungon indoknye deangket. Setiap ari mike meletakkonye de pintu gerbang Bait Allah nyo benamo pintu Gerbang Indah untok memintak sedekah jak urang-urang nyo nak masok ke Bait Allah. ³ Tekaloh nye ngoleh Petrus ngan Yohanes nak masok ke Bait Allah, nye memintak sedekah. ⁴ Lalu, Petrus, besamo dengan Yohanes ngolehnyo ngan boek, "Koleh kamie." ⁵ Urang lompoh iye mengarahko perhationnye kepado Petrus ngan Yohanes, sambel beharop menerimo sesuatu jak mike. ⁶ Hambok, Petrus boek, "Ake hopi mempunyoi perak atau emas, hambok nyo ake punyoi nak kuboriko kepodome. Delom namo Kristus Yesus urang Nazaret iye, togok ngan bejelonlah!" ⁷ Kemudion, Petrus memogong tangon kanon urang iye ngan menolongnye togok. Ketiko iye jugo, kaki ngan pergelangonye menjedi kuat. ⁸ Ngan melompat, enye togok ngan mulakih bejelon. Mengka, enye masuk kedelom Bait Allah serompok Petrus ngan Yohanes, sambel bejelon, ngan melompat-lompat, sereta memuji Allah. ⁹ Segelo urang ngolehnye bejelon ngan memuji Allah, ¹⁰ Ngan mike mengenali behwo urang iyelah nyo biaso duduk de Gerbang Indah Bait Allah untok memohon sedekah. Mike de ponuhi ngan raso takjub ngan kagum pucuk hal nyo sodah terjedi padonye. Petrus Buik kenempat urang lobot ¹¹ Sementaro urang iye bepogong pado Petrus ngan Yohanes, segelo urang belari kenempat mike de serambi nyo de sobut Serambi Salomo, dengan raso takjub. ¹² Mengka, tekalo Petrus ngolehnye, enye buik kenempat urang lobot iye," Hai urang-urang Israel, mengka kowe temanga nak hal nie atau mengka kowe ngoleh seolah-olah dengan kuaso atau kesalehon kamie dewek, kamie lah membuat urang nie bejelon? ¹³ Allah Abraham, ngan Ishak, ngan Yakub, Allah nenek puyang kite la memuliako hambo-Nye, Yesus, nyo kowe serahko ngan tolak de hadopon Pilatus tekalo enye sodah memutusko untuk membebasko-Nye. ¹⁴ Cuma hambuk, kowe menolak Nyo kudus ngan bonor, ngan kowe memintak seurang pembunoh de lepasko bagime, ¹⁵ Ngan kowe membunoh Sang Pembori Hidop, nyo sodah Allah bangketko deri antaro urang te'elek. Tentang nie, kamie adolah saksi-saksi. ¹⁶ Ngan bedasar iman delom namo-Nye, yaitu namo Yesus, lah menguatko jenton nyo kowe koleh ngan kenal nie. Ngan, iman nyo njongok melalui Enye lah memboriko kesehaton nyo sempurno kenempat jenton nie de hadopon kowe segelo. ¹⁷ Kinie, dulur-dulurke, ak tahuko behwo kowe betindak delom ke hopi tahuonme upa nyo jugo de lakuko uleh padong pemempenme. ¹⁸ Cuma hambuk, nyo Allah sampoko sebolumnye melalui molot segelo nabi behwo Kristus nak menderito, lah Enye genapi. ¹⁹ Ulehnyo iye, betobatlah ngan bebeleklah enggak konyo dosa-dosame de hapusko, ²⁰ Empuknyo waktu kelegaan njongok deri kehadiron Tuhan, ngan enggak konyo Enye mengutus Kristus nyo lah de tetapko bagime, yaitu Kristus. ²¹ nyo harus serga terimo sampoi pado waktu pemulihon segelo sesuatu upa nyo sodah Allah kehatoko melalui padong nabi-Nye nyo kudus sejak zaman dulu. ²² Musa buik, 'Tuhan Allahme nak membangketko bage kowe seurang nabi upa ake deri antaro dulur-dulurme dewek. Kowe harus mendongorko segelo sesuatu nyo enye kehatoko kenempat kowe. ²³ Ngan nak terjedi, setiap jiwa, nyo hopi mendongorko nabi iye nak delenyapko deri antaro bengeso.' ²⁴ Ngan, segelo nabi nyo perenah buik, mulakih deri Samuel ngan mike sesodahnye jugo memberitako hari -hari nie. ²⁵ Kowe adolah keturunon deri padong nabi ngan deri perjenjion nyo lah Allah buat dengan nenek puyangme, dengan buik kenempat Abraham, ' melalui benehme, segelo keturunon de muka behumi nak deberkati.' ²⁶ Allah,lah membangketko hambo-Nye, mengeremko-Nye kenmpat kowe lobih dehulu untuk memberkatime dengan membuat setiap urang deri antarome bebalek deri kejahaton.