¹ Cuma hambuk, ado seurang jenton benamo Ananias, serompok dengan bininye Safira, menjuol reto miliknye. ² Ngan, hopi sepengetahuon nininye, Ananias menahon sebageon hasel penjualonye bage badanye dewek, ngan anyo mengunda nyo sebageon, mengka memotekkonye de depan kaki padong rosul. ³ Hambuk, Petrus buik, " Ananias, mengka belis memonuhi hatime sehinggo kowe pelato kenempat Roh Kudus ngan menahan sebageon hasel penjualon tanoh iye? ⁴ Tekalo maseh bolum de juol, bukonkah tanoh iye tetap milikme? Ngan, lah menjuolnye, bukonkah tanoh iye ado debewoh kuasome? mengka kowe memekerko perbuaton nie de delom hatime? kowe hopi pelato kenempat mendesio, hambuk kenempat Allah." ⁵ Mengka, tkalo mendongor pembuikon iye, Ananias titek ngan menghembusko nafasnye nyo teaher. Mengka, terjedi ketakuton nyo godong terhadop segelo urang nyo mendongor tong iye. ⁶ Beberape urang muda njongok, mengapaninye, ngan menggotongnye ke luor, mengka menguburnye. ⁷ Mengkah, delom waktu kiro-kiro tiga ejam, bini Ananias njongok, hambuk enye hopi tahuko ape nyo lah terjedi. ⁸ Ngan, Petrus buik ngan enye," kehatokolah kenempat ke, ape kowe menjuol tanoh iye dengan rego segodong nie?" ⁹ Mengka Petrus buik kenempat enye," Mengka kowe ngan lakime besepakot serompok untuk mencuboi Roh Tuhan? Koleh, jejak-jejak kaki urang nyo lah mengubur lakime lagi ado de depan pintu ngan mike juga nak mengusungme ke luor." ¹⁰ Tiba-tiba, Safira titek de depan kaki Petrus ngan menghombusko nafasnye nyo teaher.Tekalo urang -urang muda masuk, mike ngoleh Safira lah te'elek, mengka mike mengusungnye ke luor ngan menguburkonye de sampeng lakinye. ¹¹ Mengkah, terjedi ketakuton nyo godong de antaro segelo umat ngan urang-urang nyo mendongor tong nie. ¹² Lobot tando ajaib ngan mujizat terjedi de antaro urang lobot melolui tangon padong rosul ngan mike segelo dengan sehati berado de serambi Salomo. ¹³ Hopi ado deri nyo loinye memberaniko diri untuk begabung dengan mike, hambuk urang-urang sajo memuliako mike. ¹⁴ Ngan, ado semakin lobot lage jumlah urang nyo pecayo de delom Tuhan, sejumlah godong, beik jenton moupun betina. ¹⁵ Ulenyo iye, mike bahkan mengusung urang-urang saket ke jelon-jelon ngan membarengko mike de pucuk tandu ngan kasur jerami empuknyo tekalo Petrus njongok, setidaknye bayongonye depot mengenai beberape deri mike. ¹⁶ Jugo, ado lobot urang deri kota-kota d sekitar Yerusalem njongok serompok, mengunda urang-urang saket ngan mike nyo derasuki roh-roh jahat. Mike segelo de sombuhko. ¹⁷ Cuma, padong imam godong bangket, serompok padong pengikutnye, mengka golongan Saduki, ngan mike deponuhi dengan iri hati. ¹⁸ Mike menangkop padong rosul ngan memasukkonye ke delom penjaro umum. ¹⁹ Cuma hambuk, tekalo malom hari, seurang malaikat Tuhan membukak pintu-pintu penjaro, menuntun mike keluor, ngan buik, ²⁰ " Pogi, togok, ngan beritakolah kenempat urang-urang de Bait Allah segelo firman tentang kehidupon nie." ²¹ Ngan, lah mike mendongornye, tekalo waktu pagi, mike masuk ke delom Bait Allah ngan mulakih mengajor. Tekalo imam godong ngan urang-urang nyo serompoknye sampoi, mike mengumpulko Sanhdrin ngan segelo majelis tuha-tuha Israel, mengka menyurh urang ke penjaro untuk mengunda rosul-rosul iye menghadop mike. ²² Cuma, tekalo urang-urang surihon iye sampoi, mike hopi menemuko kedua rosul iye de penjaro. Mengka, mike belek ngan membori laporon, ²³ Dengan buik, " kamie mendepoti penjaro iye tekunci dengan segelo pengamanon ngan padong penjego togok de depan pintu, hambuk tekalo kamie membukaknye, kamie hopi menemuko seurangpun de delomnye." ²⁴ Ngan, tekalo kepalo penjego Bait Allah ngan padong imam kepalo mendongor pembuikkon iye, mike sajo bingung dngan padong rosul iye ngan betanto-tanyo upamone tong iye depot terjedi. ²⁵ Mengkah, sesurang njongok ngan membagi tahuko mike, " Koleh! urang-urang nyo kowe masukko ke delom penjaro sedang togok de Bait Allah ngan mengajor urang lobot." ²⁶ Mengkah, kepalo penjego Bait Allah serompok pengawolnye pogi ngan mengunda rosul-rosul iye, hambuk hopi dengan kekerason ule mike takut de lempari betu uleh urang lobot. ²⁷ Tekalo mik sodah mengunda Petrus ngan Yohanes, mike menghadopkonye kenempat Sanhedrin. Mengka, imam godong menanyoi mike, ²⁸ Ujonye," kamie sodah melarongme dengan keras empuk hopi lage mengajor de delom namo iye, hambuk kowe lah memonuhi ajaronme ngan kowe bemasud untuk menangkungko deroh urang nie kenempat kamie." ²⁹ Cuma, Petrus ngan padong rosul nyimbot," Kamie harus lobih menaati Allah deri pado mendesio. ³⁰ Allah nenek puyang kite lah membangketko Yesus, nyo sodah kowe bunoh dengan menggantungko Nye pucuk kayu salib. ³¹ Allah meninggiko Enye de tangon kanon-Nye sebgai pemempen ngan Juruselamat untuk memboriko pertubaton bage Israel ngan pengampunon pucuk dosa-dosa. ³² Ngan, kamie adolah saksi-saksi deri segelo nie, ngan demikion jugo Roh Kudus, nyo lah Allah boriko kenempat urnag-urang nyo menaati-Nye." ³³ Tekalo mike mendongor hal iye, hati mike tetusuk ngan bemaksud untuk membunoh padong rosul iye. ³⁴ Cuma hambuk, surang Farisi benamo Gamaliel, seurang guru Torat nyo de hormati segelo urang, togok de hadopon Sabhedrin ngan menyuruh agar padong rosul iye de unda ke luor setegal. ³⁵ Mengka, enye buik ngan mike," hai urang-urang Israel, perhatiko dengan seksamo ape nyo bakal kowe lakuko terhadop urang-urang nie. ³⁶ Sabab, beberape waktu nyo sodah, Teudas bangket, mengaku badannye sebagai urang penteng ngan kiro-kiro ado empat ratus urang nyo begabunhg dengan nye. Cuma hambuk, enye de bunoh ngan segelo pengekutnye hopi ado samo sekali. ³⁷ Lah Teudas, Yudas deri Galilea bangket, tekalo hari-hari sensus, ngan menarek lobot urang untuk mengikutnye. nye jugo de bunoh ngan segelo urang nyo mengikutnye tercerai berai. ³⁸ Ulenyo iye, delom kasus nie, ake menasehatko kowe : jouhi urang-urang nie ngan biarko mike. Sabab, munye rencano ngan perbuaton nie berasal deri mendesio, tong iye hopi bakal berhasel. ³⁹ Cuma, munye rencana nie berasal deri Allah, kowe hopi bakam pacok menghentikonye. Bahkan, kowe mungkin bakal de depoti sedang melawon Allah." ⁴⁰ Mike menurut nasehat Gamaliel. Mngka, la memantou kedua rosul iye, mike mengepukki keduanye ngan melarong padong rosul untuk buik delom namo Yesus, mengka melepaskonye. ⁴¹ Ulenyo iye, rosul-rosul iy pogi deri hadopon Sanhedrin dengan besukacita sabab mike de anggop layak menderito penghinaon demi namo-Nye. ⁴² Ngan, stiap hari, de Bait Allah ngan deri rumah ke rumah, mike hopi perenah berhenti mengajor ngan memberitako Injil behwo Yesus adolah Kristus.