¹ Lima hari kemudion, Imam Godong Ananias toron besamo dengan beberape tua-tua ngan seurang pengacara benamo Tertulus. Mike mengajuko tontoton terhadop Paulus kepado gubernur. ² Sesodah Paulus depanggel, Tertulus mulai menodohnye ngan boek, "Sabab, melalui Tuan, kami selalu merasoko kedamaion ngan perubahon-perubahon tejedi bage bengso nie, ulenyo kebijakon Tuan, ³ kami menyambotnye ngan segelo caro ngan de segelo tempat dengan ponoh raso syokor, Nyo Mulia Feliks. ⁴ Cuma hambok, empoknye hopi menghabesko waktume lagi, ake memohon kemurahon hatime untok mendongorko kami setegal bae. ⁵ Sabab, kami lah menomuko bahwa urang nie adolah seurang pengacau, nyo menimbulko kekacauon de antaro urang-urang Yahudi de seluruh denia. Ngan, nye adolah pemempen sekte Nasrani. ⁶ . Nye bahkon beusaha menajisko Bait Allah sehinggo kami menangkopnye. [Kami endok mengadelinye sesuoi dengan hokom kami. ⁷ Hambok, Lisias, kepalo pasukon iye, njongok lalu merobotnye deri tangon kami dengan kekerason, ⁸ sambel memerintahko urang-urang nyo menodohnye untok njongok menghadop kowe.] Dengan memeriksonye dewek, kowe akan depot mengetahui derinye tentang segelo nyo kami todohko kepadonye." ⁹ Urang-urang Yahudi jugo besepakot de delom todohan iye sambel menegasko bahwa segelo hal iye memang bonor. ¹⁰ Tekalo gubernur membori isyarat bage Paulus untok boek, Paulus menjawab, "Setelah ake mengetahui selamo betahon-tahon bahwa kowe lah menjedi hakem pocok bengso nie, ake ngan senang hati membela diri. ¹¹ Kowe depot mengetahui bahwa hopi lobeh deri dua belas hari nyo lalu ake noek ke Yerusalemn untok beribadah. ¹² Mike hopi pernah menomuko ake sedang bedebat ngan siape pon apo menghasot kerumunon urang, beik de Bait Allah, sinagoge-sinagoge, mau pon de delom kota. ¹³ Mike jugo hopi pacok membuktiko kepadome ape nyo mike todohko kepadoke kinie. ¹⁴ Hambok, ake mengaku kepadome, bahwa sesuoi dengan Jalan iye, nyo mike sobot sebuah sekte, ake beibadah kepado Allah nenek puyang kite, ngan pecayo pado segelo sesuatu nyo sesuai dengan hokom ngan tetules de delom kitb para nabi. ¹⁵ sambel menaruh pengharapon de delom Allah, nyo jugo mike nantiko, bahwa akan ado kebangketon, beik bage urang nyo bonor mau pon nyo hopi bonor. ¹⁶ Delom hal iye, ake beusaha untok memelihara hati nurani nyo murni, beik di hadapon Allah maupon mendesio. ¹⁷ Kinie, lah beberape tahun, ake njongok untok mengunda sedekah bage bengesoke ngan untok memboriko persembahon-persembahon. ¹⁸ Sementaro ake sedang melakukonye, mike menemuko ake, lah ake de suciko de Bait Allah, tanpo rombongon urang atau kerusuhon. Cuma, de sane beberape urang Yahudi deri Asia. ¹⁹ Seharusnye, mikelah nyo ado de hadoponme ngan mengajuko tuduhon, munye memang mike memilikih sesuatu untok melawon ake. ²⁰ Atau, biarlah urang-urang iye dewek nyo memboritahuko pelanggaron ape nyo mike temuko tekalo ake togok de hadopon Sanhedrin, ²¹ Hambuk sikuk pernyataon nyo ake buikko tekalo ake togok de antaro mike, " Ulehnyo kebangketon urang te'elek, ake de hakemi de hadoponme sari nie." ²² Cuma hambuk Feliks, nyo memilikih pengetahuon lobeh tepat tentang jelon iye, menuda masaloh iye dengan buik," tekalo Lisias, kepalo pasukon iye, turun, ake bakal memutusko masalohme." ²³ Mengka, Feliks memerentahko perwira iye enggakkonyo Paulus tetap de tahan, hambuk dengan keringanon ngan hopi mencegah kanti-kantinye untok melayoni enye. ²⁴ lah beberape hari, Feliks njongok serompok bininye, Drusila, nyo adolah urang Yahudi ngan menyuruh Paulus njongok ngan mendongorko Paulus buik tentang imannye de delom Yesus Kristus. ²⁵ Mengka, tekalo Paulus sedang betukor pekeron tentang kebonoron, pengendalion diri, ngan penghakemon nyo bakal njongok, Feliks menjedi takut ngan buik," Pogilah kinie. Tekalo ake mendepot kesempaton, ake bakal memantaoume." ²⁶ Tekalo nyo samo, Feliks beharap behwo Paulus bakal memborikonye duit. Ulehnyo iye, Feliks sering menyuruh Paulus njongok ngan buik ngan nye. ²⁷ Cuma hambuk, lah dua tahun belalu, Perkius Festus menggantiko Feliks. Ngan, ulehnyo amat menyenangko urang-urang Yahudi, Feliks membiarko Paulus de delom penjaro.