¹ Tiga hari kemudion, Festus sampoi de provinsi iye, lah enye pogo deri Kaisarea ke Yerusalem. ² Imam-imam kepalo ngan padong pemempen Yahudi mengajuko tuduhon melawon Paulus, ngan mike terus mendesak Festus, ³ Sambel memintaknye bemurah hari terhadop mike dengan menyuruh urang mengunda Paulus ke Yerusalem, lah mike merencanako persekongkolan untok membunoh Paulus de tangah pejelonon. ⁴ Festus nyimboti behwo Paulus bakal tetap de tahon de Kaisarea ngan behwo enye dewek bakal njongok ke kiun secepatnye. ⁵ " mengka", ujonye," Biarlah padong pemempen de antaro kowe turun ke kiun serompokke, ngan munye ado sesuatu nyo saloh dengan urang iye, biarlah mike nyo mengajuko tuntutonnye terhadop mike." ⁶ Lah Festus tinggal de antaro mike hopi lobeh deri delapan atau sepuluh hari, enye belek ke Kaisarea. Mengka, pepagi harinye, enye duduk de kersi pengadilon ngan memerentahko enggakkonyo Paulus de unda ke hadoponnye. ⁷ Tekalo Paulus sampoi, urang-urang Yahudi nyo turun deri Yerusalem togok de sekelelengnye, dengan mengajuko lobot tuduhon nyo sajo berat melawon Paulus, nyo hopi sanggup mike buktiko. ⁸ Tekalo iye, Paulus menyatako pembelaannye," Ake hopi melakuko kesalahon ape pun nyo melawon, beik Hukom Torat Yahudi, Bait Allah, maupun Kaisar." ⁹ Cuma hambuk, ulehnyo amat menyenangko uran-urang Yahudi, Festus buik kenempat Paulus, " Ibo kowe besedio noek ke Yerusalem ngan de adili de hadoponke pucuk tuduhon-tuduhon nie?" ¹⁰ Cuma, Paulus buik, " Ake sedang togok de hadapon pengadelon Kaisar, tempat seharosnye ake deadeli. Ake hopi besaloh apepun terhadop urang-urang Yahudi upa nyo kou dewek tahuko. ¹¹ Jedi, munye ake nyo besaloh ngan melakuko sesuatu nyo pantas de hukum mati, ake hopi nak mencubo melariko diri deri hukumon mati iye. Cuma munye tuduhon mike terhadopke hopi ado nyo bonor, hopi ado seurangpun nyo depot menyerahko ake kepado mike, ake mengajuko banding kepado Kaisar." ¹² Kemudion, lah Festus berondeng dengan Sanhedrin, enye nyimboti, " Kowe lah noek bandeng kenempat Kaisar, mengkah kenempat Kaisar kowe harus pogi." ¹³ Lah beberape hari belalu, Rajo Agripa ngan Bernike sampoi de Kaisarea untok membori penghormaton kenempat Festus. ¹⁴ Sementaro mike tinggal de sane selamo beberape hari, Festus menjelasko tentang kasus Paulus kenempat rajo, ujonye," Ado seseurang nyo de tinggalko sebage tahanon ule Feliks. ¹⁵ Tekalo ake berado de Yerusalem, imam-imam kepalo ngan tuha-tuha Yahudi menyampoiko tuduhon-tuduhon melawonnye ngan memintak enggakkonyo enye de hukom. ¹⁶ Ake nyimbot mike behwo bukonlah suatu kebiasaon bage urang Roma untok menyerahko seseurang sebolum tertuduh betomu dengan padong penuduhnye, muka dengan muka, ngan enye de bori kesempaton untok membuat pembelaon terhadop tuduhon-tuduhon tesebut. ¹⁷ Mengkah, tekalo mike njongok bekumpul de sie, ake hopi menundah kasus nie, hambuk pepagi harinye, ake duduk de kersi pengadilon ngan memerentahko enggakkonyo urang iye de unda menghadopke. ¹⁸ Tekalo padong penuduhnye iye togok, mike hopi menyampoiko tuduhon-tuduhon jahat upa nyo ake bayangko. ¹⁹ Cuma hambok, mike anyo mempunyoi beberape kehopisetujuon dengan urang iye tentang agamo mike dewek ngan tentang seseurang benamo Yesus, nyo sodah te'elek, nyo Paulus tegasko behwo enye hidop. ²⁰ Ulehnyo ake bingung upamone memerikso segelo nie, ake betanyo ibo enye endok pogi ke Yerusalem ngan de adili de sane untok kasus nie. ²¹ Cuma, tekalo Paulus noek bandeng untok de tahon ngan menunggu keputuson Kaisar, ake memerentahko engakkonyo enye tetap de tahon sampoi ake depot mengiremnye kenempat Kaisar." ²² Mengka, Agripa buik kenempat Festus," Ake jugo amat mendongor dewek urang iye." " Pepagi," Festus buik," Kowe bakal mendongornye." ²³ Mengkah, pado hari berikotnye, Agripa ngan Bernike njongok dengan segelo kemegahonnye ngan masuk ke ruang pengadilon serompok padong pasukon militer ngan pemempen-pemempen kota iye. Kemudion, sesuai dengan perentah Festus, Paulus de unda masuk. ²⁴ Festus buik," Rajo Agripa ngan segelo nyo hadir serompok kamie de sie. Kolehlah urang nie, nyo de mohonko ule segelo urang Yahudi kenempatke, beik nyo ado de Yerusalem maupun nyo ado de sie, dengan mekek-mekek behwo urang nie seharusnye hopi buleh hidop lobeh lamo lage. ²⁵ Cuma hambuk, ake menomuko behwo enye hopi melakuko ape pun nyo setimpal dengan hukumon te'elek. Ngan, tekalo enye noek bandengn kenempat Nyo Mulia, ake memutusko untok mengeremnye kenempat Kaisar. ²⁶ Cuma, ake hopi memilikih sesuatu nyo pesti untok de tules kenempat tuanke. Ulehnyo iye, ake lah mengunda urang nie de hadoponme segelo, ngan khususnye de hadopon kowe, Rajo Agripa. Dengan upa iye, lah pemeriksaon nie de adako, ake mempunyoi sesuatu untok de tules. ²⁷ Sabab, upa pi masuk akal bageke untok mengirem seurang tahanon hopi mengajuko tuduhon-tuduhon nyo jelas terhadopnye."