¹ Seudoh Yesus tomuk bejantoh di odapt urakng banyak, Io ingkas ke Kapernaum. ² Diok ado surakng hambo dari surakng perwiro yang palikng berogo di mato io, tongoh podih dant amper mati. ³ Ketiko Ia ningo ado Yesus, perwiro yok nyuruh tuho-tuho urakng Yahudi nompuh Io, mintok Io datakng untuk nyomuh hambo io. ⁴ Sidok datakng kepado Yesus dan ngemanok Io supayo nulukng, "Io arus Duant tulukng", ⁵ kareno io sayakng dengan banso kito, dant io am yang nangukng kerojo di laman ibadoh kami." ⁶ Lalu Yesus ingkas besamo-samo dengan sidok. Ketiko Io doh bon jauh dari laman perwiro yok, perwiro yok beposant kepado kabant jerahant ah untuk bejantoh ke Io, "Tuant, ugai am besusoh-susoh, kareno aku bon pantas nerimok Tuant di lamanku; ⁷ aku pai ngongap dirikku bon pantas untuk datakng nompuh Duant. Tapi jantoh am barakng sigik kato pai, mako hamboku yok pasti somuh. ⁸ sobab, dirik aku pai surakng anak buoh gam, dant di babohku ado gak yang lobih renoh dari aku. Kalau aku merentoh ke anak buoh tuk: Ingkas!, mako io ingkas, dant kepado yang surakng gik: Datakng!, mako io datakng, atau kepado hamboku: Kerojo tuk!, mako io ngerojo ah." ⁹ Ketiko Yesus ningo pekoto yok, io erant ke mensio yok, dant samil nempalok urakng banyak yang nunok Io, Io bejantoh, "Aku modoh ikint, iman pemakoh tuk bon kalok ku napat ah, biar pai diantaro urakng Israel!" ¹⁰ Dant ketiko urakng-urakng yang disuruh yok pulakng ke laman ah, hambo yang podih yok pai udoh sehat am. ¹¹ Lalu Yesus ingkas ke koto yang namo ah Nain. Mured-mured-Io ingkas gam nyeroto Io dengan urakng banyak pai tumpoh siuh nyeroto yok gam. ¹² Ketiko Io doh dampikng pintu gerbang koto, ado urakng mati diangukng ke luar, surakng anak tungal lelaki dari surakng janno, dant banyak urakng yang dari koto besamo janno yok. ¹³ Dant ketiko Tuhant mantau janno yok, tegorak am ati Ah kareno kasiant, lalu Io modoh ah, "Ajum nangis!" ¹⁴ Samil nompikng yang diangukng sidok yok, Io niguk ah, dant sidok yang ngangukng yok pai beronti, Io bejantoh, " Oiiii anak mudok, Aku bejantoh ke ikau, Uwas am!" ¹⁵ Mako uwas am anak yok, lalu duduk dan mulai bejantoh, dant Yesus pai nyoroh io ke umok ah. ¹⁶ Semuo urakng yang mantau kejadi yok gompar lalu muji Allah, samil bejantoh, "Surakng nabi bakoh udoh ado di tongoh-tongoh kito," dant "Allah udoh ngelawat umat-Ah." ¹⁷ Mako tesobar am kesoh tontakng Yesus di daeroh Yudea dant semuo daeroh sekitar ah. ¹⁸ Ketiko Yohanes ningo kesoh yok dari mured-mured-ah, ¹⁹ Io nimpai duo ikuk dari sidok dant nyuruh sidok betanyok kepado Tuhant, "Ikaukah yang akant datakng yok atau aruskah kami nunguk urakng laint?" ²⁰ Ketiko dok duo bedapat dengan Yesus, sidok bejantoh, "Yohanes Pembaptis mintok kami betanyok ke Duant: Duantkah yang akant datakng yok atau aruskah kami nunguk urakng laint?" ²¹ Pado waktu yok Yesus doh nyomuh banyak urakng dari segalo pemodih penyakit, penderito, dant daro roh-roh jahat, dant io ngarunio penempalok ke sidok yang butok. ²² Dant Yesus nyohut sidok, "Ingkas, dant podoh am ke Yohanes apai ikint udoh pantau dengan dingo: Urakng butok mantau, urakng lumpuh bejalant, urakng kusto jadi taher, urakng tulik ningo, urakng mati pulakng idupt dant kepado urakng mensekent diberito kabar baik. ²³ Dant bahagio am urakng yang abon kecewo dant nulak Aku." ²⁴ Seudoh pesuruh Yohanes yok angkat, bekesoh am Yesus kepado urakng banyak tontangk Yohanes, "Untuk apai ikint ingkas ke tanoh lapakng? Mantau buluh yang diciup angin koyok kotuk? ²⁵ Atau untuk apai ikint ingkas? Mantau urakng yang bepakai alus? Urakng yang bepakai alus, bagak dant idupt mewohorukng ah di istano rajo. ²⁶ Jadi, kepai ikint ingkas? Mantau nabi? Amat am, dant Aku bejantoh ke ikint, maloh lobih dari paro nabi. ²⁷ Kareno untuk io ado tetulis: Pantau am, Aku merentoh utusan-Ku olu dari Ikau, io akant nyiap jalant-Duant di odapt Duant. ²⁸ Aku bejantoh ke ikint: "Diantaro sidok yang dilaher betinok, bonsik surakng pai yang lobih bakoh daripado Yohanes, tapi yang palikng senek dalamp Kerajoan Allah lobih bakoh dari io." ²⁹ Semuo urakng banyak yang ningo pekoto yok, temasok paro pemungut cukai, ngakuk kebonar Allah, kareno yok am sidok udoh morik nirik ah dipermanik Yohanes. ³⁰ Tapi urakng-urakng Farsisi dant ahli-ahli Taurat nulak maksod Allah untuk nirik sidok, kareno sidok belek dipermanik Yoanes. ³¹ Kato Yesus, "Dengan apai onak kuumpamo urakng-urakng dari angkatan tuk dant dengan apai sidok tuk disamo? ³² Sidok tuk seumpamo mpukng biak yang duduk di pasar dant bejantoh sikuk dengan yang laint: Kami nyiup sulikng (telalik), tapi ikint bon menari, kami nyanyi lagu piluk tapi ikint bon nangis. ³³ Kareno Yohanes Pembaptis datakng, io bon makant rote dant minum angor, dant ikint bekato: Io dirasok setant. ³⁴ Lalu Anak Mensio datakng, Io makant dan minum, dant ikint bekato: Pantau am, Io surakng peminum dant pemabuk, jerahant urakng-urakng pemungut cukai dan urakng bedoso. ³⁵ Tapi, hikmat Allah dibonar ago semuo urakng yang nerimok ah." ³⁶ Surakng Farisi ngunang Yesus untuk datakng makant di laman ah. Yesus datakng, lalu duduk makant. ³⁷ Di koto yok ado surakng betinok yang udoh jayo mat kempuloh ah sebagai urakng bedoso. Ketiko betinok yok ningo, bahwo Yesus tongoh makant di laman urakng Farisi yok, io datakng maik sebotol pualamp minyak wangi. ³⁸ Samil nangis io bediri di belakakng Yesus dampikng kaki Ah, lalu mosoh kakiAh dengan arai mato ah dant masu ah dengan ubuk ah, lalu io nciump kaki-Ah dant ngeminyak ah dengan minyak wangi yok. ³⁹ Ketiko urakng Farisi yang ngunankng Yesus yok mantau ah, io bekoluh dalamp ati ah: "Kalau Io tuk nabi, tentu Io panai sapai betinok tuk; tentu Io pai panai ke betinok tuk urakng bedoso." ⁴⁰ Lalu Yesus bekato kepado io: "Simon, ado yang onak kupodoh ke ikau." Cohut Simon, "Podoh am, Guru." ⁴¹ "Ado duo urakng berutakng kepado sikuk mensio. Yang surakng berutakng limok ratus dinar (rupioh), yang laint limok puluh. ⁴² Kareno sidok doh bon sangup mayar ah, mako io ngapus utakng keduo urakng yok. Sapai diantaro sidok yang palikng senang dengan mensio yok?" ⁴³ Cohut Simon, "Aku kiro io palikng banyak diapus utakng yok am." Kato Yeus kepado io: "Konok penapat ikau yok." ⁴⁴ Dant samil nempalok betinok yok, Io bejantoh kepado Simon: "Ikau mantau betinok tuk? Aku masok ke laman ikau, tapi ikau bon maorik aku arai ke mosuk kaki-Ku, tapi io mosoh kaki dengan arai mato ah dant ngelap ah dengan ubuk ah. ⁴⁵ Ikau bon nciump Aku, tapi mulai dari Aku tamok, io bon beronti nyium kaki-Ku. ⁴⁶ Ikau abon ngeminyak kepalo-Ku dengan minyak, tapi io ngeminyak kaki-Ku dengan minyak wangi. ⁴⁷ Sobab yok am, Aku bejantoh kepado kint: Doso io yang banyak yok udoh diampont am, kareno io udoh banyak bebuat kasih. Tapi urakng yang siket diampont, siket gam io bebuat kasih." ⁴⁸ Lalu Io bejantoh kepado betinok yok: "Doso ikau udoh diampont." ⁴⁹ Dant sidok, yang duduk makant besamo Io, bepikir dalamp ati sidok: "Sapai mensio tuk, sehingo Io dapat ngampunt doso?" ⁵⁰ Yesus bejantoh kepado betinok yok: "Iman kau udoh nyelamatkan ikau, pulakng am dengan selamat!"