¹ Bon lamoh udoh yok Yesus bejalant bekelilikng dari koto ke koto dant dari deso ke deso ngesoh Inyil Kerajoan Allah. Keduo bolas mured-Ah nyeroto Io, ² ado diok gam berapai ikuk betinok yang udoh disomuh dari roh-roh jahat atau bemacamp pemodih, io yok Maria yang ditimpai Magdalena, yang udoh dibebas dari tujuh roh jahat, ³ Yohana bini Khuza bendaharo Herodes, Susana dant banyak gik betinok laint. Betinok-betinok tuk tuk am yang ngelayant romong sidok dengan segalo harto kekayo sidok. ⁴ Ketiko urakng banyak beriuh datakng, urakng-urakng dari koto pai datakng lalu ngabong dirik ah kepado Yesus, bejantoh am Io dalamp sebuoh perumpamo: ⁵ "Ado surakng ingkas untuk nanam bonih. Pado waktu io nanam, jatuk siket di di topi jalant, lalu ditijak urakng dant burukng-burukng datakng lalu makant ah sampai abis. ⁶ Kodok ah jatuk di tanoh yang bebatu, ketiko tumuh io rangkai kareno bonsik arai. ⁷ Kodok ah jatuk di tongoh rampuk behunak bedurik, io tumuh besamo, lalu rampuk yok ngempet ah sampai mati. ⁸ Sebagi jatuk di tanoh yang bagak, io tumuh lalu bebuoh seratus kali lipat." Seudoh bekato beok, Yesus bejantoh: Sapai yang ado ponikng untuk ningo, baik am io ningo!" ⁹ Mured-mured-Ah betanyok ke Io, apai maksod perumpamo yok. ¹⁰ Io nyohut sidok: "Kepado ikint diborik pengeponai untuk panai ke rahasio Kerajoan Allah, tapi kepado urakng-urakng laint dipodoh dalamp perumpamo, supayo sekali pai nempalok, sidok bon mantau dant sekali pai ngontas sidok bon pahamp. ¹¹ Tuk am roti perumpamo yok: Bonih yok adolah Firman Allah. ¹² Bonih yang jatuk di topi jalant adolah urakng yang udoh ningo-Ah; lalu datakng Iblis lalu ngamik firman yoh dari dalamp ati sidok, supayo sidok ajum pecayok lalu diselamat. ¹³ Bonih yang jatuk di atas tanoh yang bebatu adolah urakng yang udoh ningo firman yok, nerimok ah dengan senang, tapi bon ngakar ngurat, sidok pecayok setegal am dant dalamp maso pencubo sidok gagal. ¹⁴ Bonih yang jatuk di rampuk beunak bedurik adolah urakng yang udoh ningo firman yok, dant dalamp idupt ah sidok tehimpet ago kekuater dant kekayo dengan kenikmat idupt, sehingo sidok pai bonsik gam asel ah. ¹⁵ Bonih yang jatuk di tanoh yang bagak adolah urakng, yang ketiko udoh ningo firman yok, nyimpant-Ah dalamp ati io yang baik dant ngeluar buoh ah dalamp kesetio ah." ¹⁶ "Bonsik urakng yang ngidup pelito lalu nutup ah dengan tepayant atau ngelotak ah di baboh ranyang, tapi io ngelotak ah di atas keduduk ah, supayo semuo urakng yang masok ke dalamp laman mantau cahayo ah. ¹⁷ Sobab, bonsik bereno ditabuk yang abon dinyato, dant bonsik bereno rahasio yang abon dikeponai dant diumum ke urakng banyak. ¹⁸ Kareno yok, pantau am kati caro ikint ningo. Kareno sapai yang bisik, kepado io akant ditomoh, tapi sapai yang bonsik, daripado io akant diamik, temasok gam barakng bereno ompuk io." ¹⁹ Umok dengan mpukng mpalo menyadik ah datakng kepado Io, tapi sidok bon bedapat dengan Io kareno urakng banyak. ²⁰ Urakng modoh ke Io: "Umok dengan mpuk mpalo Duant ado di luar dant onak bedapat dengan Duant." ²¹ Tapi Yesus nyohut sidok, "Umok-Ku dant mpalo menyadik-Ku adolah urakng yang ningo firman Allah lalu ngerojo ah." ²² Pado suatu ari Yesus numpakng perahu besamo dengan mured-mured-Ah, dant Io bejantoh kepado sidok: "Bom kito nyemorakng ke seborakng danau tuk." Lalu betulak am sidok. ²³ Ketiko sidok tongoh belayar, Yesus tetidur. Bonsik angin bonsik ujant datakng badai tupant ke danau yok, sehingo perahu sidok kemasok arai, sidok pai dalam bahayo. ²⁴ Mako datakng mured-mured-Ah ngorak Io, kato sidok: "Guru, Guru, kito binaso! Io pai uwas, lalu ngidoh angin dengan gelumakng yok. Angin dengan gelumakng yok pai lopok seketiko, lalu danau pai tonang ubo asal am. ²⁵ Lalu Kato Io kepado sidok: "Di monai kepecayok ikint?" Mako golak am sidok lalu bejantoh sikuk kepado yang laint: "Sapai sebonar ah mensio tuk, ketiko Io merentoh, angin dengan gelumakng pai nunok kepado Io?" ²⁶ Lalu datakng am Yesus dengan mpukng mured-Ah di daeroh urakng Gerasa yang ado di seborakng Galilea. ²⁷ Ketiko Yesus naik ke darat, datakng surakng lelaki nompuh Io; urakng yok dirasok setant, doh lamoh io bon beselowar bebaju dengan diampt di daeroh kubur yok. ²⁸ Ketiko io mantau Yesus, io ngemo lalu tesungkur di odapt-Ah dant bejantoh dengan ingan kuat: "Apai urusant Duant dengan aku, hai Yesus Anak Allah Yang Mahotingik? Aku muhunt kepado Duant, supayo Duant ajum nyikso aku." ²⁹ Io bejantoh beok kareno Yesus merentoh roh jahat yok keluar dari urakng yok. Kareno rapat mat roh yok nyeret io, mako untuk nyago ah, io dirantai dant dipasukng, tapi io mutus segalo tamit karut sidok yok, io pai dibaik setant yok ke orukng yang bon kingoh karuh. ³⁰ Yesus betanyok kepado io: "Sapai namo kau?" Cohut io, "Legion," kareno banyak setant yang ngerasok io. ³¹ Setant-setant yok muhunt kepado Yesus, supayo Io ajum merentoh sidok masok ke jurakng maut. ³² Diok ado kabant babi tongoh ngogok pemakant di ribakng bukit, lalu setant-setant yok mintok kepado Yesus, supayo Io ngijint sidok masok ke dalamp kabant babi-babi yok. Yesus pai ngijint sidok. ³³ Setant-setant pai keluar dari mensio yok lalu masok ke dalamp kabant babi-babi yok. Kabant babi-babi yok jatuk dari rihap ke dalamp danau lalu tengolamp dant mati lomas. ³⁴ Ketiko penjago-penjago babi yok mantau apai yang tejadi, sidok bedodas pulakng lalu ngesoh ah kepado urakng-urakng di kampukng sekitar ah. ³⁵ Keluar am urakng-urakng kampukng sekitar yok untuk mantau apai yang udoh tejadi. Sidok datakng napat Yesus dant mantau urakng yang udoh didudi setant yok duduk di kaki Yesus; io udoh beselowar bebaju dant waras gik am. Mako golak am sidok. ³⁶ Urakng-urakng yang udoh mantau dengan mato kepalo dirik ah hal yok ngesoh ah kepado pangan ah kati mensio yang dirasok setant yok dapat diselamat. ³⁷ Lalu semuo penduduk daeroh Gerasa yok mintak supayo Yesus ingkas dari daeroh sidok, kareno sidok gik gompar mat. Mako masok gik Io ke perahu, lalu belayar gik. ³⁸ Urakng yang udoh disomuh yok onak nyeroto sidok, tapi Yesus nyuruh io ingkas, jokuk-Ah, ³⁹ "Pulakng am ke laman dant dikesoh diok am segalo yang dipuloh Allah untuk ikau." Urakng yok pai ingkas ngelilikng segalo koto, ngesoh ke segalo yang udoh dipuloh Yesus kepado io. ⁴⁰ Ketiko Yesus datakng gik, urakng banyak nyamut Io kareno sidok semuo doh nontek Io. ⁴¹ Mako datakng am surakng yang namo ah Yairus. Io adolah kepalo laman ibadah. Samil tesungkur di kaki Yesus io muhunt, supayo Yesus datakng ke laman ah. ⁴² kareno keongkoh anak betinok io yang umur ah kiro-kiro duo bolas tahunt, amper mati. Dalamp pejalant koyok, Yesus bedempet dengan urakng banyak. ⁴³ Diok ado surakng betinok yang udoh duo bolas tahunt konok pendaroh dant bonsik sikuk pai yang dapat ngubat ah. ⁴⁴ Io maju nompikng Yesus lalu nyoput jumai juboh-Ah, dant seketiko yok pai beronti gam pendaroh ah. ⁴⁵ Lalu, jokuk Yesus, "Sapai yang nyoput aku?" Dant kareno bonsik yang ngakuk ah, ngomong am Petrus, "Guru, urakng banyak mat ngelilikng dant ngempet Duant." ⁴⁶ Tapi Yesus bejantoh, "Ado sikuk yang nyoput aku, kareno aku meraso ado kuaso yang keluar dari dalamp dirik-Ku." ⁴⁷ Ketiko betinok yok panai ke kesaloh io udoh dikeponai, io datakng dengan begotar, teduduk di odapt Yesus dant ngesoh kepado urakng banyak apai sobab io nyoput Ah yang dengan seketiko yok pai jadi somuh. ⁴⁸ Mako kato Io kepado betinok yok, "Hai anak-Ku, iman kau udoh nyelamat ikau, ingkas am dengan selamat!" ⁴⁹ Ketiko Yesus agik bejantoh, datakng urakng dari keluargo kepalo laman ibadah yok lalu bejantoh, "Anak kau doh mati, ajum am nyusoh-nyusoh Guru gik!" ⁵⁰ Tapi Yesus ningo ah dant bejantoh kepado Yairus, "Ajum golak, pecayok gono, dant anak kau selamat." ⁵¹ Waktu Yesus datakng di laman Yairus, Yesus bon ngudik sikuk pai mensio tamoh masok, kecuali Petrus, Yohanes, Yakobus dant apok dengan umok anak yok. ⁵² Semuo urakng nangis dant ngonang anak yok. Tapi Yesus bejantoh, "Onang nangis; io bon mati, tapi tidur." ⁵³ Sidok ngetowok Io, kareno sidok panai bahwo anak yok udoh mati. ⁵⁴ Lalu Yesus masukng jari anak yok, lalu bejantoh, "Hai anak, uwas am!" ⁵⁵ Mako, roh anak yok pulakng lagik dalamp tubuh io, dant seketiko yok io pai bediri. lalu Yesus nyuruh sidok morik anak yok makant. ⁵⁶ Dant erant am urakng tuho anak yok, tapi Yesus ngidoh sidok modoh ke sapai punt apai yang udoh tejadi yok.