¹ Waktu yok pas ari Sabat, Yesus bejalant ngeloluk kobunt ganump dant mured-mured Io munik igik-igik ah , ngosok ah dengan jari sidok lalu ngeromoh ah. ² Tapi, sikuk duo urakng Farisi bejantoh, "Ngapai ikint ngerojo pempuloh yang dikidoh untuk dikerojo pado ari Sabat?" ³ Yesus nyohut sidok, Jokuk Io, "Bon kalok kah ikint maco apai yang dikerojo Daud dengan anak buoh ah ketiko kelopar? ⁴ Io masok ke Laman Allah, ngamik rote saji lalu makant ah dengan anak buoh ah, yang searus ah bon panai sidok ngerimoh ah selaint dari paro imam." ⁵ Lalu Yesus bejantoh ke sidok, "Anak Mensio adolah Tuhant pado ari Sabat?" ⁶ Lalu pado ari Sabat yang laint, ketiko Yesus ngajar urakng-urakng di sinagoge. Ado sikuk lelaki yang lumpuh jari kanan ah. ⁷ Ahli-ahli Taurat dant urakng-urakng Farisi nempalok amat-amat untuk mantau apaikah Io nyomuh urakng pado ari Sabat, sehinggo sidok dapat sobab untuk menyoloh Io kareno ngerojo hal yang saloh. ⁸ Yesus panai ke apai yang sidok pikir, lalu Io bejantoh dengan mensio yang lumpuh jari sepiak yok, "Uwas am, dant bediri di tongoh-tongoh tuk." Lelaki yok pai uwas dan bediri diok. ⁹ Yesus benjantoh kepado sidok, "Aku nanyok ke ikint, monai yang dikudik pado ari Sabat, ngerojo yang baik atau ngerojo yang jahat, nyelamat urakng atau modih ah?" ¹⁰ Io mantau ke sekelilikng, dant bejantoh dengan lelaki yok, Cubo diulur jari kau." Io niguk jari ah, dant jari io pai somuh. ¹¹ Tapi urakng-urakng Farisi dant ahli-ahli Taurat ponuh amaroh, sidok bejantoh diantaro sidok apai arus sidok kerojo kepado Yesus. ¹² Pado ari-ari yok Yesus ingkas ke atas gunung untuk bedo'o. Io bedo'o sepanyakng malamp kepado Allah. ¹³ Ketiko ari udoh padakng, Io nimpai mured-mured-Ah datakng nompuh Io, Io milih duo bolas ikuk dari sidok, yang disobut Io "rasul-rasul". ¹⁴ Namo-namo paro rasul yok adolah Simon (yang diborik namo Petrus) dant Andreas mpalo lelaki ah, Yakobus, Yohanes, Filipus, Bartolomeus, ¹⁵ Matius, Tomas, Yakobus anak Alfeus, Simon yang disobut urakng Zelot, ¹⁶ Yudas anak Yakobus, dengan yudas Iskariot, yang ngianat Io. ¹⁷ Yesus turunt dari gunung besamo dengan sidok dant Io bediri di tanoh yang rato. Seromong bakoh mured-mured-Io ado diint, besamo banyak urakng-urakng Yudea dant Yerusalem, dant dari daeroh pantai Tirus dan Sidon. ¹⁸ Sidok datakng untuk ningo Io dant untuk disomuh dari segalo pemodih penyakit sidok. Urakng-urakng yang dirasok roh-roh jahat pai disomuh gam. ¹⁹ Setiap urakng dalamp romong yok ncubo untuk niguk-Io supayo dapat somuh, dant Io nyomuh sidok semuo. ²⁰ Yesus mantau mured-mured-Io dengan bejantoh," Diberokat am ikint yang mensekent, kareno am ompuk kerajoan Allah. ²¹ Diberokat am ikint yang maso tuk kelopar, sobab ikint tentu konyang di maso akant datakng. Diberokat am ikint yang maso tuk nangis, sobab ikint akant ketawok. ²² Diberokat am ikint ketiko urakng-urakng ngeboncik ikint dant ketiko sidok nulak ikint dengan ngoluh ikint untuk koluh kesoh yang abon baik, kareno Anak Mensio. ²³ Besenang am pado ari yok dant namukng narukng am kareno ngayoh, sobab ikint pasti napat upoh yang bakoh di surgo, sobab inik umoh sidok muloh paro nabi beok gam jeman marik te. ²⁴ Tapi, celako am ikint yang kayo! Kareno ikint udoh nerimok kenesang. ²⁵ Celako am ikint yang maso tuk konyang! kareno obuk lusok ikint pasti kelopar. Celako am ikint yang maso tuk ketawok! Kareno ikint akant ngonang ngoluh dengan nagis obuk lusok. ²⁶ Celako am ikint, ketiko semuo urakng ngato yang baik untuk ikint! Sobab beok gam inik umoh sidok udoh muloh nabi palsu marik te." ²⁷ Tapi Aku bejantoh kepado ikint yang ningo tuk, dikasih am musuh-musuh ikint dant bebuat baik untuk sidok yang boncik ke ikint. ²⁸ Kint borik berokat am urakng yang ngutuk ikint dant bedo'o am untuk urakng yang nganiayo ikint. ²⁹ Kepado urakng yang napar kuyuk kint sepiak, borik ke io gam sepiak gik. Kalau urakng ngamik juboh kint, borik gam baju kint ke io. ³⁰ Boriklah kepado urakng yang mintok ke ikint. Kalau ado urakng yang ngamik breno ompuk ikint, ajum am ngarap io mulakng ah ke ikint. ³¹ Kati ubo ikint onak urakng ngerojo ke ikint, beok gam ikint arus puloh ke urakng. ³² Kalau ikint ongkoh sayakng ke urakng yang sayakng ke ikint, apai upoh kint untuk yok? Kareno urakng-urakng bedoso pai beok gam. ³³ Kalau ikint ngerojo kebaik kepado urakng yang baik ke ikint, apaikah upoh kint untuk yok?Kareno urakng-urakng bedoso pai ngerojo yok gam. ³⁴ Kalau ikint ongkoh nginyau barakng bereno kepado urakng yang akant mulakng ah ke ikint, apai upoh kint untuk yok? Kareno urakng-urakng bedoso pai nginyau barakng bereno io ke sesamo urakng bedoso gam, dant ngarap pemulakng untuk barakng dan jumloh yang samo. ³⁵ Tapi, Kasi kasiant am dengan musuh-musuh kint dant bebuat baik am kepado sidok. Bepinyamp bepakai am kepado sidok, onang berarap dibalas balik, dant pasti am upoh kint bakoh. Ikint akant jadi anak-anak Yang Mahotingik, sobab Io kedirik baik kepado urakng-urakng bon panai ngempuloh baik dan urakng-urakng jahat sekali pai. ³⁶ Bemuroh ati am, samo ubo Apok kint adolah muroh ati. ³⁷ Ajum ngukump ngakemp, supayo ikint pai bon diukump akemp. Ajum ngutuk nyelo, supayo ikint bon kutuk celo urakng. Diampont am kesaloh kesuluh urakng laint, supayo ikint pai di ampont gam. ³⁸ Borik am kepado urakng laint, supayo ikint pai dipat pemorik. Pemorik dalamp jemeloh yang banyak-dipadat, diguncakng dant sampai melimpoh ruoh-sidok semuo akant melipoh ruoh gam morik ke pongkuk kint. Kareno pengukur yang kint pakai untuk ngukur, pengukur yang samo gam akant diukur ke ikint. ³⁹ Yesus lalu bekesoh ke sidok sebuoh perumpamo tuk, "Dapat pai surangk butok nuntunt sesamo urakng butok? Bon kah dok duo samo masok dalamp lubakng, bon kah beok? ⁴⁰ Mured tentulah bon lobih dari guru ah, tapi semuo urakng ketiko udoh nyelosai segalo pelajar ah, tentu am samo dengan guru ah. ⁴¹ Ngapai ikint mantau ampoh mponan di mato mpalo kint, tapi bon mantau ampoh balok kayu di mato dirik kint? ⁴² Kati kint dapat modoh mpalo kint, "Mpalo, biar aku ngeluar ampoh mponan di dalam mato kau, ketiko dirik ikau pai bon mantau ampoh balok kayu di mato dirik kint? Ikint urakng munafik! Amik olu ampoh balok kayu di mato dirik kint, udoh yok baruk jelas mato kint mantau ampoh mponan di dalamp mato mpalo kint lalu ngeluar ah. ⁴³ Kareno bonsik puhunt yang baik, ngasel buoh yang bon baik, atau bonsik gam puhunt yang bon baik ngasel buoh yang baik. ⁴⁴ Setiap puhunt dikonal kareno buoh yang di asel ah. Kareno urakng bon ngumpul buoh aro dari unak durik, sidok bon gam ngumpul buoh angor dari puhunt beunak bedurik. ⁴⁵ Urakng yang baik ngeluar barakng yang baik dari dalamp ati ah yang baik, dant urakng jahat ngeluar barakng yang jahat dari dalamp ati io yang jahat. Kareno yang keluar dari mulut ah, keluar dari dalamp ati ah. ⁴⁶ Ngapai ikint nimpai aku, 'Tuhant, Tuhant' tetapi ikint bon setio dengan segalo titoh-Ku? ⁴⁷ Setiap urakng yang datakng kepado Aku dant ningo segalo pekoto-Ku lalu ngelaku ah- Aku akant ngenyato ke ikint dengan apai io dapat disamo-, ⁴⁸ Io samo dengan urakng yang muloh laman: Urakng yok ngali dalamp-dalamp dant ngelotak dasar ah di atas batu. Ketiko datakng arai bah dant laput ngonok laman yok, laman yok bon teguncakng, kareno dipuloh dengan kuat. ⁴⁹ Tapi, sapai yang udoh ningo pekoto Aku, tapi bon ngerojo ah, io samo dengan urakng yang muloh laman di atas tanoh yang bon bedasar. Ketiko laput ngonok ah, laman yok pai rubuh dant banyak am kerusak ah."