¹ Yesus bejantoh kepado mured-mured-Ah, "Bon mungkin bonsik penyosat, tapi celako am urakng yang ngado yok. ² Adolah lobih baik bagi io kalau sebuoh batu kilangan (bakoh/borat) ditomit di lihir ah, lalu disempiukng ke dalamp laut, dari pado nyosat sikuk pai dari urakng-urakng yang lomoh tuk. ³ Jago am dirik kint! Kalau mpalo kint bedoso, togur am io, dant kalau io nyosal, diampont am io. ⁴ Maloh kalau io bedoso dengan ikint tujuh kali seari dant tujuh kali io nompuh ikint dengan bejantoh, 'Aku nyosal, ikint arus ngampont io." ⁵ Lalu jokuk rasul-rasul yok kepado Tuhant, "Ditomoh am iman kami!" ⁶ Cohut Tuhant, "Kalau sekiro ah ikint ado iman makoh igik nsabi gono, ikint dapat bejantoh kepado puhunt aro tuk, 'Tecabut am ikau, dant tetanam di dalamp laut, io pasti nunok jokuk ikint." ⁷ "Sapai diantaro ikint yang ado pelayant yang negrojo sawoh atau meliharo pengidupt ke io, akant bejantoh kepado pelayant io yok tik io pulakng dari umo, 'Kotuk am cepat makant! ⁸ Bon kah sebalik ah, io akant bejantoh kepado pelayant yok, 'Disedio pemakantku. Tomit pungukng kau dant layant aku sampai aku selosai makant minum. Doh yok ikau baruk makant minum.' ⁹ Adokah io beterimok kasih kepado pelayant io yok, kareno pelayant yok udoh ngerojo bereno yang ditugas ke io? ¹⁰ Beok gam ikint. Tik ikint udoh ngerojo segalo yang ditugas ke ikint, baik am ikint bejantoh, 'Kami adolah pelayant-pelayant yang abon beguno; kami arus ngerojo apai yang arus kami kerojo." ¹¹ Dalamp pejolant Io ke Yerusalem, Yesus nyanyukng di sentaro Samaria dan Galilea. ¹² Ketiko Io masok ke sutik deso, datakng sepuluh ikuk urakng kusta nompuh Io. Sidok bediri agak jauh ¹³ dan sidok menciak nimpai Io, "Yesus, Guru, kasiant am dengan kami!" ¹⁴ Waktu Yesus mantau sidok, Ia modoh ke sidok, "Ingkas dant tompak dirik kint kepado imam-imam." Dalamp pejolant, ketiko sidok ingkas, sidok pai somuh. ¹⁵ Ketiko panai kedirik ah somuh, sikuk dari sidok bebalik, dengan ingan yang kuat io ngemulio Allah. ¹⁶ Io nyomoh kaki Yesus, beterimok kasih ke Io kalau io udoh somuh. Io urakng Samaria. ¹⁷ Yesus bejantoh, jokuk Ah, "Bon kah sepuluh ikuk yang udoh somuh? Dimonai yang semilant? ¹⁸ Bon bebalik kah yang laint unruk ngemulio Allah, selaint urakng asikng tuk?" ¹⁹ Io bejantoh kepado ah, "Uwas am, dant ingkas. Iman kau udoh nyomuh ikau." ²⁰ Urakng-urakng Farisi betanyok, sebilai Kerajoant Allah datakng, Yesus nyohut sidok lalu bejantoh, "Kerajoant Allah bukant bereno yang panai dipantau secaro laher. ²¹ Sidok bon akant modoh, 'Pantau dituk! Atau "Pantau di'int!" kareno Kerajoant Allah ado diantaro ikint." ²² Yesus bejantoh kepado mpukng mured-Ah, Ari ah akant datakng ketiko ikint onak mantau seari dari ari-ari Anak Mensio, tapi ikint bon akant mantau ah. ²³ Sidok akant bejantoh kepado ikint, "Pantau, koint! Pantau, dituk!" Tapi ajum ingkas nguang ah, atau nunok sidok, ²⁴ ubo kilat nampak becahayo dari langit sutik ke langit sutik, beok am Anak Mensio pado ari-Ah. ²⁵ Tapi Io arus nangukng banyak penderito dant ditulak ago keturunt tuk. ²⁶ Ubo jeman Nuh sari te, beok gam pado ari Anak Mensio. ²⁷ Sidok makant, sidok mabuk, sidok nikoh kawent, sampai ari Nuh masok ke dalamp bahtera (tongkang)-dant arai bakoh datakng ngancur sidok semuo. ²⁸ Ubo jeman Lot gam, sidok makant, mabuk mocakng, bejual boli, betanam dant bepuloh. ²⁹ Tapi di ari Lot keluar dari Sodom, ujant api dant belerang dari langit ngancur sidok semuo. ³⁰ Beok am keedoh ah pado ari Anak Mensio dinyato. ³¹ Pado ari yok yang ado diatas atap ajum nguang ke baboh untuk ngeluar barakng bereno. Yang ado di sawoh atau umo ajum pulakng ke laman. ³² Ingat ke bini Lot! ³³ Sapaipunt berusaho untuk nyelamat nyawo ah akant losi, tapi sapai yang losi nyawo ah, io akant nyelamat ah. ³⁴ Aku modoh kepado ikint, "Pado malamp yok ado duo ikuk diatas sutik ranyang, yang sikuk dibaik yang laint didudi. ³⁵ Ado duo ikuk betinok besamo ngilikng atau nutuk, yang sikuk dibaik yang laint didudi. ³⁶ [Kalau ado duo ikuk di umo, yang sikuk dibaik yang laint didudi."] ³⁷ Kato sidok kepado Yesus, "Dimonai Tuhant?" Cohut Io kepado sidok, "Dimonai ado bangkai, diok am bekumpul burukng bangkai." ³⁷ Kato sidok kepado Yesus, "Dimonai Tuhant?" Cohut Io kepado sidok, "Dimonai ado bangkai, diok am bekumpul burukng bangkai.