¹ Yesus bejantoh kepado mured-mured-Ah, "Ado surakng kayo yang ado bendaharo ah, Kepado io disongkok, bahwo bendaharo yok menyohat duet ah. ² Lalu io nimpai bendaharo yok dant bejantoh kepado io, 'apai yang kudingo tontakng ikau tuk? Betangukng jawab bon ikau ke tuk, kareno ikau bon bulih lagik kerojo jadi bendaharo.' ³ Kato bendaharo yok dalamp ati ah, 'Apai yang aku puloh tuk? Tuhokku meronti aku jadi bendaharo. Nyangkol aku bon ulih, mintok-mintok aku kemoluk. ⁴ Aku ado akal, supayo tik aku diberonti ah, ado urakng yang onak nyampai nyingoh aku di laman ah.' ⁵ Lalu io nimpai sikuk sikuk urakng yang berutakng kepado tuhok ah. Jokuk io kepado yang pertamo, 'Berapai utakng ikau kepado tuhokku? ⁶ Cohut urakng yok, 'Seratus tepayant minyak.' Lalu cohut io kepado urakng yok, 'Tuk surat utakng kau, duduk am puloh surat utakng laint bituk gam, 'Limok puluh tepayant.' ⁷ Lalu io bejantoh kepado yang yang keduo, 'Berapai utakng kau? Cohut urakng yok, 'Seratus cohant ganomp. Jokuk io kepado urakng yok, 'Tuk surat utakng kau, puloh surat utakng laint, 'Lapant puluh cohant.' ⁸ Tuhok io pai muji nonoh bendaharo io yang bon jujur yok, kareno io lincoh. Kareno anak-anak dunio tuk lobih lincoh dari pado anak-anak torakng. ⁹ Aku benjantoh kepado ikint, "Tomit karutl am hubong dengan Mamon yang bon jujur (setio), supayo tik Mamon yok doh bon dapat nulukng lagik, ikint diterimok di dalamp kemah abadi." ¹⁰ "Sapai yang setio dalamp pekaro-pekaro senek, io pasti setio gam dalamp pekaro-pekaro bakoh. Tapi sapai yang bon setio dalamp pekaro-pekaro senek, io pai bon setio gam dalamp pekaro-pekaro bakoh. ¹¹ Jadi, tik ikint bon setio dalamp Mamon yang abon jujur, sapaikah yang akant morik kepacayok kepado ikint harto yang sebonar ah? ¹² Dant kalau ikint bon setio dalamp harto urakng laint, sapai yang pecayok kepado ikint untuk ngurus harto dirik kint? ¹³ Bonsik sikuk pai surakng pelayant dapat ngelayant duo tuhok. Kareno kalau beok io akant ngeboncik sikuk dant sayakng kepado yang laint ah, atau io setio kepado sikuk dant bon peduli ke yang laint ah. Ikint bon dapat pecayok kepado Allah dan kepado Mamon." ¹⁴ Semuo yok didingo urakng-urakng Farisi, hambo-hambo duet, dant sidok mencemooh Io. ¹⁵ Lalu Io bejantoh kepado sidok, "Ikint ngebonar dirik di odapt urakng, tapi Allah ngeponai ati kint. Kareno apai yang dipuji mensio, diboncik ago Allah. ¹⁶ Ukump Taurat dant kitab paro nabi belaku sampai maso Yohanes; dant mulai waktu yok Kerajoant Allah diberito dant setiap urakng nyerogoh ah berobut ngemasok ah. ¹⁷ Lobih mudoh langit dengan dunio tuk losi dari pado setitik ukump Taurat balakng. ¹⁸ "Setiap mensio yang nyorak bini ah, lalu nikoh dengan betinok laint, io bezinoh; dant sapai yang nikoh dengan betinok yang udoh disorak laki ah, io bezinoh gam." ¹⁹ "Ado surakng kayo yang selalu bepakai bagak dengan juboh ungu dant kaint bedoru yang alus, dant tiap ari io beramai rinu dalamp kemewoh ah. ²⁰ Ado sikuk urakng pengemis (pemintok-mintok) namo ah Lazarus, ikuk io ponuh dengan bongkak baroh, galikng dampikng pintu urakng kayo yok, ²¹ io onak melosi kelopar ah dengan apai yang jatuk dari mejo urakng kayo yok. Asuk-asuk pai datakng ngelilat bongkak baroh ah. ²² Lalu mati am urkang mensekent yok, io dibaik malaekat-malaekat ke pongkuk Abraham. ²³ Urakng kayo yok mati gam, lalu dikubur. Io menderito sensaro di alamp maut, nempalok ke atas, dant dari jauh io mantau Abraham, Lazarus ado di pongkuk ah. ²⁴ Io nimpai, jokuk io, 'Apok Abraham, kasiant am ke aku. Perentoh Lazarus untuk nyelop ujukng jari ah ke dalamp arai untuk nyolap lilohku, kareno aku sensaro mat dalamp api tuk.' ²⁵ Tapi Abraham bejantoh, "Anak, ingat am, bahwo ikau udoh nerimok segalo yang baik ketiko gik idupt, sementaro Lazarus segalo yang kurakng baik. Bituk io napat segalo kesenang dant ikau menderito. ²⁶ Selaint dari yok, diantaro kami dengan ikau ado rihap yang bon dapat disemorakng, supayo sidok yang onak ingkas dari tuk kepado ikint atau sidok yang onak datakng dari ikint kepado kami bon dapat nyemorakng." ²⁷ Jokuk urakng yok, "Kalau beok, aku mintok kepado duant, apok, supayo duant nyuruh io ke laman apokku, ²⁸ kareno gik ado limok ikuk mpaloku, supayo io amat-amat nogur sidok, supayo sidok ajum masok ke orukng penderito tuk." ²⁹ Tapi jokuk Abraham, 'Ado urukng sidok kesaksi Musa dant paro nabi; baik am sidok ningo kesaksi yok.' ³⁰ Cohut urakng yok, 'Bon, Apok Abraham, tapi tik ado urakng mati yang idupt lagik datakng kepado sidok, sidok pasti betobat.' ³¹ Jokuk Abraham kepado io, "Kalau sidok belek ningo kesaksi Musa dant paro nabi, sidok pai bon yakent gam, biarpai ago surakng yang idupt diantaro urakng mati."