¹ Paro pemungut cukai dengan urakng-urakng bedoso biaso ah datakng kepado Yesus untuk ngontas Io. ² Mako bekoluh am urakng-urakng Farisi dant ahli-ahli Taurat, jokuk sidok, "Io nerimok urakng bedoso dant makant besamo-samo dengan sidok." ³ Lalu Io ngesoh perumpamo tuk kepado sidok, ⁴ Sapai diantaro ikint dituk yang ado meliharo seratus ikuk dombo, dant kalau losi sikuk gono diantaro seratus yok, bonkah akant didudi io yang semilant puluh semilant ikuk yok lalu ingkas ngogok yang losi yok sampai io napat ah? ⁵ Kalau io udoh napat ah, io nyahant ah diatas bahu ah dengan ngayoh, ⁶ dant kalau io datakng ke laman ah, io nimpai kabant jerahant ah dengan urakng-urakng topi sisi yok, 'besenang am besamo aku, kareno domboku yang losi udoh bulih.' ⁷ Aku bejantoh kepado ikint, 'Beok am di Surgo, ado kesenang diint kareno sikuk urakng bedoso yang bebalik, lobih senang dari semilant puluh semilant urakng bonar yang bon merolu petobat." ⁸ "Atau betinok monai yang ado duet sepuluh dirham (perak), dant kalau losi sutik diantaro ah, bon ngidupt pelito lalu ngobas laman ah untuk ngogok ah amat-amat sampai io napat ah? ⁹ Dant kalau io napat ah, io nimpai kabant jerahant ah dengan urakng topi sisi yok dengan bejantoh, 'besenang am besamo aku, kareno duet dirham yang losi udoh dapat.' ¹⁰ Aku bejantoh kepado ikint, 'Beok gam di Surgo, ngayoh mat malaekat-malaekat kareno sikuk urakng bedoso yang betobat." ¹¹ Yesus bejantoh gik, "Ado surakng yang ado duo ikuk anak lelaki. ¹² Jokuk yang bunsu kepado apok ah, 'Apang, borik kepado aku harto ompuk aku. Lalu apok ah magi ke dok duo harto ah. ¹³ Bon lamoh doh yok, anak bunsu ah nyual semuo pemagi gik io lalu ingkas ke negeri yang jauh. Diint am io menyodi segalo duet ah dengan caro idupt bepoyo-poyo. ¹⁴ Ketiko udoh diobis semuo ah, datakng am bencano lapar dalamp negeri yok dant io pai mulai melarat. ¹⁵ Lalu io bekerojo di orukng surakng tuhok di negeri yok. Urakng yok nyuruh io diamp di umo untuk nyago babi ah. ¹⁶ Io onak ngisik porut ah dengan ampas yang ke umpant babi yok, tapi sikuk pai budas yang morik ke io. ¹⁷ Io pai nyadar ke keedoh dirik ah, jokuk ah, 'bukant main banyak urakng yang diupoh apang yang belimpoh pemakant ah, tapi aku dituk mati keseokng. ¹⁸ Aku onak pulakng dant bejantoh kepado apang, 'Apang, aku udoh bedoso dengan surgo dant dengan duant, ¹⁹ aku bon pantas gik ditimpai anak duant; amik am aku tuk untuk ulunt duant.' ²⁰ Mako uwas am io dant ingkas ke orukng apok ah. Ketiko io gik jauh, apaok ah udoh mantau dant ngonal ah, lalu timul am kasih kasiant ah dengan io. Apok ah pai bedodas nguang io, lalu nyengkorut dant nciump io. ²¹ Jokuk anak ah ke apok ah, 'Apang, aku udoh bedoso kepado surgo dengan duant, aku bon pantas gik disobu anak duant.' ²² Tapi apok ah bejantoh kepado pelayant-pelayant ah, 'Cepat baik kotuk juboh yang palikng bagak, dikonok ke io dant tomok cincint ke jari ah dant sepatu ke kaki ah. ²³ Dant diamik sikuk sapi yang jobuk untuk disemeleh dant kito makant dant beramai rinu. ²⁴ Anakku tuk udoh mati dant idupt lagik, io udoh losi dant didapat lagik. Mako mulai am sidok beramai rinu. ²⁵ Tapi anak io yang tuho gik di umo ketiko io datakng, dant ketiko io pulakng doh dampikng laman, io ningo bunyi urakng betoboh dan urakng beramai rinu. ²⁶ Lalu io nimpai sikuk pelayant ah dant betanyok ke io apai roti semuo yok. ²⁷ Cohut pelayant yok, 'Adek duant udoh pulakng dant apok duant doh nyemelah sikuk sapi tadik, kareno io napat adek duant dalamp keedoh sehat.' ²⁸ Mako luat am anak io yang tuho yok dant io belek masok. Lalu apok ah keluar dant bejantoh dengan io. ²⁹ Tapi io nyohut apok ah, 'Udoh betahunt-tahunt aku besamo dant ngelayant duant, dant opant kalok aku ngelawant perentoh duant, tapi untuk aku opant kalok duant morik sikuk anak kamikng pai ke aku besenang dengan mpukng jerahantku. ³⁰ Tapi baruk gak datakng anak duant yang udoh menyodi harto kekayo duant dengan urakng yang bon senunuh, duant sampai nyemeleh sapi ke io.' ³² Cohut apok ah ke io, 'Anakku, ikau selalu sengkoli dengan aku, dant segalo ompuk aku adolah ompuk ikau. ³¹ Kito sepantas am ngayoh kareno adek kau tuk udoh mati dant idupt lagik, io udoh losi dant didapat lagik."