¹ Yesus ngedoh suti perumpamo kepado sidok supayo jelas, bahwo sidok arus bedo'o santar dant ajum suoh. ² Jokuk ah, "Dalam sebuoh koto ado surakng akemp yang abon golak kepado Allah dant bon peduli kepado sapaipunt. ³ Dant di koto yok ado sikuk jano yang selalu datakng kepado io dant bejantoh, "Belo am aku ngelawant sidok." ⁴ Kaso am pelamoh ah akemp yok nulak. Tapi io bekoluh dalamp ati ah, "Biarpai aku bon golak kepado Allah dant bon peduli kepado sapaipunt, ⁵ Tapi kareno jano tuk selalu nyusoh aku, baik am aku mengonok io, supayo io abon nyusoh aku gik dant aher ah nyorakng aku." ⁶ Jokuk Tuhant, "Pantau am apai yang dipodoh akemp yang lalemp yok! ⁷ Abonkah Allah akant ngebonar urakng-urakng yang Io pilih yang siakng kant malamp bedo'o kepado-Io? Dant adokah Io ngulur-ngulur waktu ketiko nulukng sidok? ⁸ Aku bejantoh kepado ikint, "Io tentu ngebonar sidok. Tapi, kalau Anak Mensio datakng, adokah Io napat Iman di dunio tuk?" ⁹ Dant kepado urakng-urakng yang ngogap dirik ah bonar dant manakng renoh semuo urakng laint, Yesus ngesoh perumpamo tuk, ¹⁰ "Ado duo urakng ingkas bedo'o ke Bait Allah; yang sikuk urakng Farisi dant yang laint penarik pajak. ¹¹ Urakng Farisi yok bediri dant bedo'o dalamp ati ah betuk, "Ya Allah, aku besyukur kepado Duant, kareno aku bon ubo urakng laint, bukant perampok, bukant urakng lalemp, bukant pezinoh, dant abon ubo penarik pajak tuk; ¹² Aku bepuaso duo kali semingu, aku morik sepersepuluh dari semuo pengulihku." ¹³ Tapi, penarik pajak yok bediri jauh-jauh, io pai bon berani tongak, tapi io maluk nirik dant bejantoh, "Ya Allah, kasiant am aku urakng bedoso tuk." ¹⁴ Aku bejantoh kepado ikint, "Urakng tuk pulakng ke laman ah sebagai urakng yang dibonar Allah dant urakng laint yok bon. Sobab sapai yang ningik nirik ah, io direnoh dant sapai yang ngerenoh nirik ah, io ditingik." ¹⁵ Mako datakng urakng-urakng tuho maik mpukng biak kepado Yesus, supayo Io nyamai sidok. Mantau yok, mured-mured-Ah ngeluat sidok. ¹⁶ Tapi Yesus nimpai sidok dant bejantoh, "Baik kotuk mpukng biak yok, ajum ngidoh sidok, kareno urakng-urakng ubo sidok tuk am yang ompuk ah Kerajoant Allah." ¹⁷ Aku bejantoh kepado ikint, "Sesunguh ah sapai yang abon nyamut Kerajoant Allah ubo anak biak tuk, io bon pantas masok ke dalamp ah." ¹⁸ Ado surakng pemimpint betanyok kepado Yesus, jokuk ah, "Guru yang baik, apai yang arus aku kerojo untuk napat idupt yang kokal?" ¹⁹ Cohut Yesus, "Ngapai ikau modoh Aku baik? Bonsik yang baik selaint dari Allah gono. ²⁰ Ikau tentu panai segalo titoh Allah, "Ajum bejinoh, ajum munuh, ajum ngolet, ajum ngucap saksi dusto, hormat dengan apok dant umok." ²¹ Jokuk urakng yok, "Semuo yok udoh kekerojo di maso mudokku sari." ²² Ningo yok Yesus bejantoh kepado io, "Sutik lagik yang perolu kau kerojo, jual segalo yang ado, bagi dant borik kepado urakng-urakng mensekent, mako ikau akant napat harto di surgo, lalu datakng kotuk dant tamoh Aku." ²³ Ketiko urakng yok ningo pekato yok, io jadi susoh mat, kareno io kayo mat. ²⁴ Lalu Yesus nempalok io dant bejantoh, "Susoh mat urakng beduet masok ke dalam Kerajoant Allah. ²⁵ Lobih mudoh sikuk unto masok ngelalu lubakng jarump daripado urakng kayo masok ke dalamp Kerajoant Allah." ²⁶ Urakng-urakng yang ningo yok bejantoh, "Kalau beok, sapai yang dapat diselamat?" ²⁷ Cohut Yesus, "Apai yang mustahel bagi mensio, bon mustahel bagi Allah." ²⁸ Petrus bejantoh, "Kami udoh nudi segalo harto beno kami dant tamoh Duant." ²⁹ Kato Yesus kepado sidok, "Aku bejantoh kepado ikint, Setiap urakng yang kareno Kerajoant Allah nudi laman ah, bini ah atau mpalo menyadik ah, urakng tuho atau mpukng anak ah, ³⁰ akant nerimok gik belipat gano pado maso tuk gam, dant di maso yang akant datakng, io nerimok idupt yang kokal." ³¹ Yesus nimpai duo bolas mured-Ah, dant bejantoh kepado sidok, "Kito ingkas ke Yerusalem dant segalo yang udoh ditulis paro nabi tontakng Anak Mensio akant digonap. ³² Sobab Io akant disoroh kepado banso-banso yang abon konal kepado Allah, dikelolok, dihino, diludoh, ³³ dant sidok akant nyasoh dan munuh Io, dant di ari ketigo Io akant idupt lagik." ³⁴ Sidok bon pahamp ke semuo yok; roti jantoh yok bon dikeponai sidok, sidok pai bon panai ke maksod ah. ³⁵ Waktu Yesus amper datakng ke Yerikho, ado surakng pemintok-mintok yang butok dant duduk di topi jalant. ³⁶ Waktu io ningo urakng banyak lalu, io betanyok, "Ado apai tuk? ³⁷ Cohut urakng kepado io, "Yesus urakng Nazaret lalu." ³⁸ Lalu io menciak, "Yesus, Anak Daud, kasiant am ke aku!" ³⁹ Sidok yang bejalant di odapt ah nogur supayo io diamp. Tapi makint kuat io mehingan, "Anak Daud, kasiant am ke aku!" ⁴⁰ Lalu Yesus beronti, dant nyuruh maik urakng yok. Ketiko udoh dampikng, Yesus betanyok kepado io, ⁴¹ "Apai konak ikau? Cohut urakng yok, "Tuhant, supayo aku panai mantau!" ⁴² Kato Yesus kepado Io, "Mantau am ikiau, iman kau udoh nyelamat ikau!" ⁴³ Dant seketiko yok, mantau am io, lalu nunok Yesus samil ngemulio Allah. Semuo urakng yang mantau kejadi yok, ngemulio dan muji Allah.