¹ Suatu seet, i Kaisarea, ara sejema bergelar Kornelius , sejema perwire ari hana si isebut pasuken Italia, ² jema saleh si terih ken Allah, unangoya peh urum mehne jema si ara i umahe, nye menosahen delle sedekah ken jema-jema nye dor berdoa ken Allah. ³ Iyo, jem siwah lo oya, we menenggon urum jelas was sebueh penenggonen , sejema malekat Allah engeh nye bercerak kene," Kornelius!" ⁴ Nye, we menatap malekat oya urum keterihen nye bercerak, "Hana ini , Tuan?" Nye , malekat oya bercerak kene," Doa-doamu nye sedekah-sedekahmu ngek naik sebage suatu peringeten i hedepen Allah. ⁵ Siloni, kenileh jema-jema ku Yope nye taluleh sejama bergelar Simon, si peh isebut Petrus, ⁶ we taring berurum urum sejema penyamak kulit bergelar Simon, si umahe berede i tepe laut.'' ⁷ Dang malekat si bercerak kene ngek beluh, Kornelius menalu roa jema peleyene nye sejema prajurit si saleh ari entere jema-jema si dor meleyeni keperluen pribadie, ⁸ nye ngemari menjelasen segele sesuatu ken pakea, we mengkeni pakea ku Yope. ⁹ Kelang loe, tengah pakea dang was perjelenene nye mendekati kota oya, Petrus naik ku atas atap umah , sekiter jem onom, tuk berdoa. ¹⁰ Nye, we lape nye male man, tetape tengah jema-jema dang menyiepen panen, Petrus mendepet sara penenggonen, ¹¹ nye we menenggon langit teruke nye sesuatu unang upuh si kolak beh turun nye terulur ari kuopat sudute sawah ku tanoh. ¹² i Wase , ara segele jenis benatangberkiding opat, nye benatang-benatang melata i bumi, nye manuk-manuk i udere. ¹³ Nye, engehleh ling bercerak kene"Uwetleh , Petrus gelihenleh nye panleh!" ¹⁴ Nye tetape, Petrus bercerak,"Gere, Tuhen. Sebeb, aku gere penah man hana peh si haram ato najis." ¹⁵ Nye, ling oya bercerak mie kene tuk keroa kalie, " Hana si ngek Allah tahiren , enti gere peh kam sebut haram." ¹⁶ Hel ini terjadi tulu kali, nye tibe-tibe mehne oya terangkat ku langit. ¹⁷ Seet oya, Petrus len bingung memikiren hana arti penenggonen si ngek ienggone oya, teridahleh jema-jema si iutus oleh Kornelius dang menarah betih ihi umah Simon, sambil sesuk i arap pintu gerbang, ¹⁸ nye sambil menalu , pakea berunger hanakeh Simon, si isebut Petrus menumpanh ihin. ¹⁹ Nye Petrus tengah merenungen penenggonen oya, Roh bercerak kene," Enggonleh , ara tulu jema rawan si dang menerahmu. ²⁰ Uwet nye turunleh, beluhleh berurum pakea gere ara ragu entap Aku ngek mengutus pakea." ²¹ Nye , Petrus turun ken jema-jema oya nye bercerak ," Enggon, akuleh jema si kam terah. Hana elesen kegehenmu?" ²² Pakea bercerak," Kornelius, sejema perwire, jema benar nye terih ken Allah, si terkenal baik i entere mehne bengse Yahudi, ngek i'ingeten oleh malekat kudus tuk mengkenimu engeh ku umahe nye tuk memenggen percerakenmu." ²³ Petrus mengundang pakea mayo nye menosah pakea tumpangen i one. Kelang loe, we uwet nye beluh berurum pakea, nye sesideh sudere seimen ari Yope mepongie. ²⁴ Pede lo berikute, pakea mayo Kaisarea. Kornelius ngek menante-natenen pakea nye ngek mengkamulen sudere nye pong-pong dekate. ²⁵ Tengah Petrus mayo, Kornelius mendemuie , nye berlutut i kiding Petrus nye menyemahe . ²⁶ Nye tetape, Petrus membantue sesuk nye bercerak," Sesukleh! Aku renye sejema munusie." ²⁷ Nye Petrus bercerak urum Kornelius, Petrus mayo ku was nye menenggon ara delle jema berkamul berurum. ²⁸ Nye, Petrus bercerak ken pakea, "Kam betih behwe araleh kekejien bagi jema Yahudi tuk berhubungen ato mendemui jema umek Yahudi, tetape Allah ngek menuruhen kenku behwe aku gere seturahe menyambut sahen peh haram ato najis. ²⁹ Oyaleh sebeb'e , aku gere keberatan tengah kam mengkeniku engeh. Entap oya, aku berunger tuk elesen hana engko menaluku?" ³⁰ Nye, Kornelius bercerak, " Opat lo si lalu sawah jem ini, pede jem siwah , aku tengah berdoa i umahku, nye enggonleh , ara sejema sesuk i hedepenku memake pakenen si berkilauan. ³¹ Nye, bercerak,'Kornelius, doamu ngek ipenggen nye sedekahmu ngek i'inget i hedepen Allah. ³² Entap oya, kenileh ku Yope nye tiroleh Simon si i'sebut Petrus tuk engeh . We tengah menumpang i umah Simon , sejema penyamak kulit, i tepe laut.' ³³ Entap oya, aku tir mengkeni jema kenmu, nye engko ngek berbaik ate mera engeh. Siloni , kite mehne ara i hin, i hedepen Allah , tuk memengge segele sesuatu si ngek iperintahen ken mu oleh Tuhen." ³⁴ Nye, Petrus menuke awahe nye bercerak , "Siloni, aku sunguh mengerti behwe Allah gere menuruhen keberpihaken. ³⁵ Namun, i setiep bengse, jema si terih terhedep We nye membuh hana si benar, berkenan ken-E. ³⁶ Firmen si Allah sawahen ken bengse Israel memberitanen keber baik dame sejahtera melalui Kristus Yesus, We-leh Tuhen atas mehne'e. ³⁷ Kam keniri betih peristiwe si ngek terjadi i mehne Yudea, Mulei ari Galilea, ngemari baptisen si Yohanes sawahen, ³⁸ kam betih Yesus , Jema Nazaret, nyakhi Allah mengurapi-E urum Roh Kudus nye urum kuese. We beluh berkeliling membuh kebaik'en nye menjegeren mehne jema si i'sikse oleh roh jehet entap Allah menyertai We. ³⁹ Kami araleh saksi-saksi ari mehne hel si ngek Yesus buh, baik i daerah jema Yahudi nye i Yerusalem. Pakea ngek menunuh Yesus urum menggantung-e i atas utem salib. ⁴⁰ Namun, Allah membangkiten-E pede lo si ketulu nye menosahen We tuk meneridahen diri, ⁴¹ umek ken mehne jema, tetape ken kami, saksi-saksi si ngek ipilih oleh Allah semelume , si man nye minum berurum-E ngemari We bangkit ari entere jema mate. ⁴² Nye, We memerintahen kami tuk menunggeren ken jema-jema nye bersaksi urum sunguh-sunguh behwe We leh si itetapen oleh Allah sebage Hakim atas si murip nye si mate. ⁴³ Bagi We, mehne nabi bersaksi behwe setiep jema si perceye i was-E male menerime pengampunen dosa melalui gelar-E." ⁴⁴ Nye Petrus tengah mengucapen cerak-cerak oya, Roh Kudus turun ku atas mehne si memenggen firmen oya. ⁴⁵ Nye , jema-jema perceye si bersunet , si engeh berurum Petrus , takjub entap karunie Roh Kudus ngek icurahen , peh ken bengse-bengse lean, ⁴⁶ Sebeb, pakea memengge jema-jema oya bercerak was berbage behese nye memulianen Allah. Nye, Petrus bercerak, ⁴⁷ " Umekkeh gere ara sejema peh si depet menghalangi aih tuk ibaptisen ken jema-jema si ngek menerime Roh Kudus dis unang kite ini?" ⁴⁸ Nye, Petrus memerintahen pakea tuk ibaptis i was gelar Kristus Yesus. Nye jema-jema oya meniro kati Petrus taring berurum pakea semokot sesideh lo.