¹ Satalah na, Yesus nyabarang danau Galilea, ya na danau Tiberias. ² Manyak orak nuna Ia ka'ena mpu'ya nele tande-tande ajaib nang Ia muat ka orak-orak sakit. ³ Udah na, Yesus naek ka atas bukit wan duduk ka sana basama murid-murid-Ya. ⁴ Wa'tu na, perayaan Paskah orak Yahudi udah samak. ⁵ Sambel nele ka sakitar-Ya wan nele orak manyak ataki ka Ia, Yesus bekata ka Filipus, "Ka manekah wa'kitu bisa mali roti supaya orak-orak na bisa makat?" ⁶ Yesus madah hal na ntuk nguji Filipus ka'ena sabanar ya Ia sorak tau nang bisa Ia muat. ⁷ Filipus njawab, "Roti seharga 200 dinar angin nak cukup ntuk mpu'ya, sekalipun masing-masing hanya namu sote amuk ja." ⁸ Salah seorak murid-Ya, ya na Andreas, sabanyadi Simon Petrus, bekata ka Yesus, ⁹ "Ka kitu ada seorak anak nang punya lima roti jelai wan dua ikat, tapi apeh arti ya na ntuk orak sabanyak ntu?" ¹⁰ Yesus bekata,"Suruhlah samua orak ntuk duduk." Ka tampat na nang manyak rumpun, jadi orak-orak na duduk kira-kira lima ribu ngelaki jumlah ya. ¹¹ Udah na, Yesus nangkap roti-roti na satalah ngucap syukur, Ia magi roti-roti na ka mpu'ya nang duduk; udah na uga li'muatkan-Ya wan ikat-ikat na sabanyak nang mpu'ya mao. ¹² Pas samua orak udah kanyang, Yesus bekata ka murid-murid-Ya,"ngumpulah sedamuk-sedamuk nang basisa na supaya angin ada nang tebuak." ¹³ Ka'ena na, kobo murid ngumpulkan ya wan ngisi dua balas karanjang ngan sedamuk-sedamuk dari lima roti jalai nang li'tapuk mpuya nang udah salasi makat. ¹⁴ Pas orak-orak na nele tande ajaib nang li'muat Yesusm mpu'ya bekata,"Ia ntu pasti Nabi nang li'njanji nang nak atak ka dunia." ¹⁵ Ka'ena tau kalo orak manyak na barencanaatak wan maksa Ia njadi Raja atas mpu'ya, Yesus nyingkir agi ka bukit seorak diri. ¹⁶ Pas ari udah mulai malam, kobo murid turut nuju ka danau. ¹⁷ satalah naek ka perau, mpu'ya mulai nyebarang danau nuju Kapernaum. Ari udah mulai patak, tapi Yesus gik angin uga atak batamu wan mpu'ya. ¹⁸ Danau mulai bagelombang ka'ena nyaru nang mbada kuat. ¹⁹ Udah na, pas mpu'ya udah ngayoh perau sajuah sakitar 25 ato 30 stadia, mpu'ya nele Yesus bajalat ka atas danau wan nyamak perau sampe mpu'ya gali. ²⁰ Tapi, Yesus bekata ka mpu'ya, "Ntu Aku, usah gali!" ²¹ Satalah na, mpu'ya mao naekan Ia ka dalap perau wan tiba-tiba perau na udah sampe ka tampat nang mpu'ya nuju. ²² Pas nalap ari ya, orak manyak nang masih dadek ka sabarang danau nele kalo angin ada parau nang lain ka sana, kecuali sote perau jak nang murid-murid udah tama ka dalap ya. tapi, Yesus angin nuna tama ka dalap perau na basama ngan kobo murid-murid-Ya nang udah baran gkat sorak. ²³ Ataklah perau-perau lain dari Tiberias ka samak tampat orak-orak na makat roti, satalah Tuhan ngucap syukur. ²⁴ Pas orak manyak nele kalo Yesus wan kobo murid-murid-Ya angin ada agi ka sana, mpu'ya naek ka perau-perau na wan barangkat ka Kapernaum ntuk ngago Yesus. ²⁵ Sewa'tu orak manyak na namu Yesus ka sabarang danau, mpu'ya betanya ka Ia, "Rabin mila Kau atak ka kia?" ²⁶ Yesus njawab mpuya wan bekata,"Sebanar ya, Aku bekata ka kau, kau ngago Aku ukat ka'ena kau udah nele tande-tande ajaib, melainkan ka'ena kau udah makat roti sampe kanyang. ²⁷ Usah begawe ntuk ngago makat nang bisa binasa, melainkan ntuk makat nang bisa betahan sampe idup nang kekal, nang Anak Kaleno bisa mere ka kau ka'ena ka Anak Kaleno na, Bapa, ya na Allah, udah mere pengesahan-Ya." ²⁸ Lalu, orak manyak na batanya ka Yesus,"Apeh nang arus kau muat supaya kau ngawe pegawe nang Allah mao?" ²⁹ Yesus njawab wan bekata ka mpu'ya,"Ntulah pegawe nang Allah mao: pecayalah ka Ia nang udah li'utus Allah." ³⁰ Mpu'ya betanya ka Ia,"Kalo magena, tande ajaib apehkah nang nak Kau muat supaya wa'kitu nele wan pecaya ka Kau? pegawe apeh nang Kua muat? ³¹ Ntua bare wa'kitu makat manna."' ³² Yesus bakata ka mpu'ya,"Sabanar ya, Aku bakata ka kau, ukat Musa nang mere kau roti dari surga, melainkan Bapa Akulah nang mere kau roti nang sejati dari surga. ³³ Sabab, Roti dari Allah na adalah Ia nang turut dari surga dan mere idup ka dunia." ³⁴ Mpu'ya bakata ka Ia,"Tuhan, berelah wa'kitu roti na seterus ya." ³⁵ Kata Yesus ka mpu'ya,"Akulah roti idup; orak nang atak ka Aku angin bisa lapar agi, orak nang pecaya ka Aku angin bisa haus agi. ³⁶ Tapi, Aku udah madah ka kau kalo sekalipun kau udah nele Aku, kau tatap angin pecaya. ³⁷ Samua nang li'mere Bapa ka Aku bisa atak ka Aku, wan nang atak ka Aku angin bisa nak nguser Aku. ³⁸ Sabab, Aku turut dari surga ukat ntuk muat parintah Aku sorak, melainkan parintah Ia nang ngutus Aku. ³⁹ Ntulah parintah Ia nang ngutus Aku: supaya samua nang udah li'mere Ia ka Aku na angin ada nang ilang, tapi Aku lumpat pada akhir zaman. ⁴⁰ Sabab, ntulah parintah Bapa-Ku, kalo setiap orak nang nele Allah wan pecaya ka Ia bisa namu idup kekal, Aku bisa lumpatkan ia pada akhir zaman." ⁴¹ Ka'ena na, beberpaeh orak Yahudi mule ngomong tentang Ia ka'ena Ia bakata,"Akulah roti nang udah turut dari surga na." ⁴² MPu'ya bakata,"Ukatkah Ia ntu Yesus, anak Yusuf, nang ama wan indo ya wa'kitu kanal?Macammane mungki n Ia bisa bakata,'Aku udah turut dari surga?"' ⁴³ Yesus njawab mpu'ya wan bakata,"Usah ngomong ka ntara orak sana sorak. ⁴⁴ Tapi ada seorak nang bisa atak ka Aku, kecuali Bapa nang ngutus Aku narik ya, wan Aku bisa lumpat pada ahir zaman. ⁴⁵ Ada tatulis dalap kitav kobo nabi:'wan, mpu'ya samua bisa li'ajar oleh Allah.'Satiap orak nang udah nangar wan balajar dari Bapa bisa atak ka Aku. ⁴⁶ Hal na ukat berati ada orak nag udah parnah nele Bapa, kecuali Ia nang atak dari Allah; Ialah nang udah nele Bapa. ⁴⁷ Aku bakata ka kau, 'Sabanar ya, satiap orak nang pecaya punya idup kekal.' ⁴⁸ Akulah roti idup. ⁴⁹ Ntua bare kau udah makat manna ka padang, tapi mpu'ya mati. ⁵⁰ Ntulah roti nang turut dari surga, supaya satiap orak mapak ya angin mati. ⁵¹ Akulah roti idup na nang udah turut dari surga. Kalo orak mapak roti ntu, ia bisa idup salama ya; roti nang bisa ku mere demi kehidupan dunia ntu adalah tubuh-Ku." ⁵² Orak-orak Yahudi mule kelai satu ngan nang lain ya, mpu'ya bakata,"Macammane bisa Orak ntu mere tubuh-Ya ntuk li'mapak?" ⁵³ Yesus bakata ka mpu'ya,"Aku bakata ka kau, sabanar ya kalo kau angin mapak tubuh Anak Kaleno wan nyocok darah-Ya, kau angin bisa punya idup ka dalap diri kau. ⁵⁴ Satiap orak nang mapak daging-Ku wan nyocok darah-Ku punya idup kekal, wan Aku bisa lumpe ia pada ahir zaman. ⁵⁵ Sabab, daging-Ku adalah pemapak nang sejati wan darah-Ku adalah ae cocok nang sejati. ⁵⁶ Sapeh nang mapak daging-Ku wan nyocok darah-Ku diap ka dalap Aku wan Aku ka dalap ia. ⁵⁷ Kayak ya Bapa nang idup ngutus Aku, wan Aku idup oleh ka'ena Bapa, macam na uga ia nang mapak Aku, ia bisa idup ka'ena Aku. ⁵⁸ Ntulah roti nang turut dari surga, ukat roti nang macam ntu bare mapak lalu mpu'ya mati, orak nang mapak roti na bisa idup selama-lama ya." ⁵⁹ Yesus madah samua ya ntu ka Kapernaum saat Ia ngajar ka sinagoge. ⁶⁰ Pas banyak dari murid-murid nangar hal ntu, mpu'ya bekata, "Ajaran ntu telalu karas. Sapeh nang sanggup narima ya?" ⁶¹ Kaena tau kalo kobo penuna-Ya ngomong tentang hal na, Yesus bakata ka mpu'ya,"Apehkah omongan Aku ntu muat kau tesinggong? ⁶² Kalo bagena, macam mane kalo kau nele Anak Kaleno naek agik ka tampat asal-Ya? ⁶³ Rohlah nang mere idup, sedangkan daging angin beguna sama sekali. Omongan-omongan nang Ku madah ka kau na adalah roh wan idup. ⁶⁴ Tapi, ada berapeh ka ntara kau nang angin pecaya." Sabab, dari awal, Yesus tau sape nang angin pecaya wan sapeh nang nak nipu Ia. ⁶⁵ Yesus bakata, "Nalah sabab ya Aku madah ka kau kalo angin seorak pun bisa atak ka Aku, kecuali hal na li'karuniakan ka ia oleh Bapa." ⁶⁶ Sajak wa'tu na, manyak nang penuna Ia ngondor diri wan baranti nuna Ia. ⁶⁷ Ka'ena na, Yesus bekata ka kedua balas murid-Ya, "Apehkah kau uga mao ampus?" ⁶⁸ Simon Petrus njawab Ia, "Tuhan, ka sapehkah wa'kitu nak ampus? Kaulah nang punya pekata kehidupan kekal. ⁶⁹ Wa'kitu udah pecaya wan nganal Kau, kalo Kaulah nang kudus dari Allah." ⁷¹ Nang Ia maksud na Yudas, anak Simon Iskariot, sabab Yudas ada lah salah seko dari kedua balas murid na, tapi ia na hianat Yesus.