¹ Sabalom Ari Raya paskah, Yesus tau kalo saat-Ya udah tiba kalo Ia nak napuk dunia ntu ka Bapa, satalah mengasihi punya-Ya sorak ka dunia, Ia mengasihi mpu'ya sampe akhir. ² Salama makat malam belanjut, setan udah tama dalap ati Yudas Iskariot, anak Simon, ntuk hianat Yesus. ³ Yesus, pas tau kalo Bapa udah nyarahkan sagala ya ka dalap langan-Ya, kalo Ia atak dari Allah, lalu nak atak ka Allah, ⁴ Ia dadek dari jamuan makat malam wan ngelapas jubah-Ya, sarta nangkap kaik linen wan ngikat ya ka pingak-Ya, ⁵ Udah na, Ia nuang ae ka sabuah baskom wan mulai masok batis murid-murid-Ya sarta ngarik batis mpu'ya ngan kaik nang bekaban ka pingak-Ya. ⁶ Lalu, Ia sampe ka Simon Petrus wan ia bakata ka Yesus,"Tuhan, Kau masok batis ku?" ⁷ Yesus njawab wan bakata ka ia, "Apeh nang Aku muat, kau angin paham, tapi nana kau pasti ngerati." ⁸ Petrus bakata,"Kau angin parnah masok batis ku!"Yesus njawab,"kalo Aku angin masok kau, kau angin namu bagian ka dalap Aku. ⁹ Simon Petrus bakata ka Ia,"Kalo macam na Tuhan, usah hanya batis ku aja, tapi ugak langan wan ulu ku." ¹⁰ Yesus bakata ka ia,"Orak nang udah mani hanya parlu nyuci batis ya, tapi udah bersih saluruh ya. Kau udah bersih, tapi angin samua dari orak sana bersih." ¹¹ Ka'ena Yesus tau sapeh nang nak ngihanati Ia, na lah sabab ya Ia bakata, "Angin samua dari orak sana bersih." ¹² Jadi, satalah Yesus salasai masok batis murid-murid-Ya, makai agik jubah-Ya, wan atak ka tampat-Ya, Ia bakata ka mpu'ya,"Apehkah orak sana ngerati apeh nang Aku muat ka orak sana? ¹³ orak sana nyabut Aku Guru wan nyabut Aku ugak Tuhan. Na tapat ka'ena Aku memang Guru wan Tuhan orak sana. ¹⁴ Kalo Aku, nang adalah Tuhan wan Guru kau, udah masok batis kau, kau pun arus saling masok batis kau. ¹⁵ Sabab, Aku udah mere contoh ka kau supaya kau ugak muat bagemane nang Aku muat ka kau. ¹⁶ Ngan sabanar ya, Aku madah ka kau, seorak hamba angin labih aya daripada tuan ya, atopun seorak utusan angin labih aya daripada orak nang ngutus ya. ¹⁷ Kalo kau udah tau samua ya ntu, kau li berkati kalo kau muat ya. ¹⁸ Aku anginm bakata-kata soal orak sana samua. Aku tau sapeh aja nang udah Kupilih, tapi ntu arus liganapi,'Orak nang makat roti-Ku udah ngangkat tumit ya ngadap Aku.' ¹⁹ Aku meretau kau ntu, sabalom hal na tejadi supaya pas hal na tejadi, kau nak pecaya kalo Akulah Ia. ²⁰ Ngan sabanar ya, Aku madah ka kau, satiap orak nang narima oraki nang Kuutus, narima Aku; wan orak nang narima Aku, narima Ia nang ngutus Aku. ²¹ Satalah Yesus bakata bagena, Ia galisah dalap roh wan besaksi,"sabanar-banar ya Aku madah ka kau, salah seorak dari orak sana nak ngihati Aku." ²² Murid-murid saling nele mua ka seko nang lain ya wan njadi mangap soal sapeh nang Ia omongkan. ²³ Salah seorak murid-Ya duduk basandar ka dada Yesus. ²⁴ Udah na, Simon Petrus mere syarat ka ia ntuk batanya ka Yesus tentang sapeh nang Ia maksud. ²⁵ Jadi, murid nang basandar ka dada Yesus na batanya ka Ia,"Tuhan, sapehkah orak na?" ²⁶ Yesus njawab, "Orak na adalah ia nang ka ia Aku mere sote potong roti na satalah Aku nyelup ya." Lalu, satalah nyelup roti na, Yesus mere ya ka Yudas, anak Simon Petrus Iskariot. ²⁷ satalah Yudas narima roti na, Iblis ngerasuk ya. Ka'ena na, Yesus bakata ka ia,'Apeh nang nak kau muat, muatlah ntu nyan!" ²⁸ Angin seorak pun dari mpu'ya nang gik makat na ngerati ngapeh Yesus madah bagena ka Yudas. ²⁹ Berapeh dari mpu'ya nyangka ka'ena Yudaslah nang migak kotak duin maka ya Yesus bakata bagena ka Yudas, "Malilah hal-hal nang diri paralu ntuk ari raya," ato supaya ia mere suatu ka orak miskin. ³⁰ Jadi, satalah narima sote potong roti, Yudas ampus ka luar wa'tu na ugak; wa'tu na udah malam. ³¹ Udah na Yudas ampus, Yesus bakata, "Ntu nyan lah saat ya Anak Kaleno li muliakan wan Allah li muliakan lewat Ia. ³² Kalo Allah li permuliakam ka dalap Ia, Allah ugak nak ,muliakan Ia ka dalap diri-Ya, wan nak muliakan Ia ngan capan. ³³ Anak-anak-Ku, Aku ada basama kau hanya diap sabantar agik. Kau nak ngago Aku, wan bagena nang udah Ku madah ka orak-orak Yahudi, ntu nyan Aku madah ugak ka kau,'ka mane Aku ampus, kau angin bisa atak.' ³⁴ Sote parintah baru Aku mere ka kau, ya na supaya kau saling mengasihi, sama macam Aku udah mengasihi orak sana, nagena lah kau ugak saling mengasihi. ³⁵ Ngan bagena, samua orak nak tau kalo kau adalah murid-murid-Ku, ya na kau saling mengasihi." ³⁶ Simon Petrus batanya ka Yesus, "Tuhan, ka manekah Kau nak ampus?" Yesus njawab ia,"Ka mane Aku ampus, kau angin bisa nuna Aku, tapi nana kau bisa nuna Aku." ³⁷ Petrus batanya ka Ia, "Tuhan, ngapeh aku angin bisa nuna Kau ntu nyan? Aku nak nyarahkan nyawa ku demi Kau!" ³⁸ Yesus njawab, "kau nak nyarah nyawa kau ntuk Aku? ngan sabanar ya Aku madah ka kau, mandok angin bisa bekokok sabalom nyangkal Aku 3 kali."