¹ Enam ari sabalum Ari Raya Paskah, Yesus ampus ka Betania, tampat diap Lazarus, nang udah Ia mbangkitkan dari kematian. ² Ka ngaan, udah li'siapkan jamuan makat malam ntuk Yesus; wan Marta gik ngelayan, tapi Lazarus na salah sote dari mpu'ya nang duduk ka meja basama Yesus. ³ udah na, Maria nangkam satangah kati nang asa mahal, lalu mere minyak ka batis Yesus wan ngeringkan ya ngan buuk ya. Maka, rumah na panuh ngan bau arum minyak wangi na. ⁴ Tapi, Yudas Iskariot, salah seorak murid Ya, nang nak menghianati Ia, bakata, ⁵ "Ngapeh minyak wangi na angin li nyual saja saharga tiga ratus dinar wan li mere ka orak-orak miskin"? ⁶ Ia madah kalo macam na ukat ka'ena ia peduli ka orak miskin, melainkan ka'ena ia na seorak pencuri, ka'ena ia maba kotak duin, ia biasa nangkam duin nang li tama ka dalap kotak na. ⁷ Lalu, Yesus njawab,"Biarlah mbini na, ia nang muat ya sebage persiapan ntuk ngubur Ku. ⁸ Sabab, orak miskin salalu ada basama wan kau, tapi Aku angin salalu ada basama kau." ⁹ Pas sajumlah aya orak Yahudi nangar kalo Yesus ada ka Betania, mpu'ya ampus ka ngaan, ukat hanya ka'ena Yesus, melainkan ugak ka'ena mao nele Lazarus nang udah Ia mbangkitkan dari kematian. ¹⁰ Lalu, imam-imam kepala berencana ntuk munuh Lazarus ugak. ¹¹ Ka'ena Lazarus, banyak orak Yahudi napuk mpu'ya wan pecaya ka Yesus. ¹² Pas nalap ya, orak banyak nang atak ka pesta na, pas nangar kalo Yesus nak atak ka Yerusalem, ¹³ mpu'ya nangkap dao-dao palem lalu ampus ka luar ntuk nyambut Ia lalu mulai rami-rami,"Hosana! li'berkatilah Ia nang atak dalap nama Tuhan, Raja Israel." ¹⁴ Satalah namu seko keledai muda, Yesus duduk ka atas ya, macam nang tetulis: ¹⁵ "Usah gali, hai putri Sion! Telelah! Raja kau atak, duduk ka atas seko keledai muda." ¹⁶ Awal ya, murid-murid Ya angin ngerati samua hal na, tapi pas Yesus li muliakan, mpu'ya udah na lalu ngerati kalo samua na udah tetulis tentang Ia, kalo mpu'ya udah muat samua na ntuk Ia. ¹⁷ Jadi, orak-orak nang basama Yesus wa'tu na Ia nyaru Lazarus ka luar dari kubur wan mbangkitka ia dari kematian tarus besaksi. ¹⁸ Oleh sabab na, banyak orak nyambut Yesus ka'ena mpu'ya nangar kalo Ia lah nang udah muat mujizat na. ¹⁹ Maka, orak-orak Farisi bakata sote sama lain ya, "Kau nele, apeh nang diri rencanakan angin berasil. Telelah, saluruh dunia udah nuna Ia." ²⁰ Pas wa'tu na, ada ugak orak-orak Yunani li ntara mpu'ya nang ampus ntuk ibadah pas ari perayaan na. ²¹ Mpu'ya batamu wan Filipus, nang barasal dari Betsaida li Galilea, wan bakata ka ia, "Tuan, orak kitu mao batamu ngan Yesus." ²² Filipus ampus wan mere tau Andreas; ampus lalu mere tau Yesus. ²³ Yesus njawab mpu'ya,"Wa'tu ya udah atak ntuk Anak Kaleno ntuk li muliakan. ²⁴ Ngan sabanar ya, A ku madah ka kau, kecuali bugi gandum labuh ka tanah lalu mati, bugi na tatap sote aja; tapi kalo bugi na mati, ia ngasel banyak buah. ²⁵ Orak nang cinta nyawa ya, bisa ilang nyawa ya, tapi orak nang angin cinta nyawa ya li dunia ntu, bisa ntuk lihara ya ntuk idup kekal. ²⁶ Kalo seorak ngelayan Aku, ia arus nuna Aku; ka mane Aku diap, ka sana lah tampat pelayan-Ku diap;tapi kalo seorak ngelayan Aku, Bapa nang ngormati ia." ²⁷ "Ntu nyan, jiwa-Ku galisah. Apeh nang nak Ku madah?'Bapa, selamatkanlah Aku dari ntu nyan?' Tapi, ntuk tujuan ntulah Aku atak saat ntu. ²⁸ Bapa, muliakan nama-Mu!" Lalu, tedangar lah suara dari surga,"Aku udah muliakan nama-Ku wan Aku nak muliakan ya agik." ²⁹ Orak banyak nang dadek ka sana wan nangar ya madah kalo na suara guntur, tapi nang lain bakata,"seorak malaikat udah ngomong ka Ia!" ³⁰ Yesus njawab wan bakata,"Suara na tadangar ukat ntuk kepentingan-Ku, melainkan ntuk kepentingan kau. ³¹ Ntu nyan lah penghakiman ntuk dunia ntu, ntu lah penguasa dunia nak li nguser. ³² Kalo Aku li ninggikan dari dunia ntu, Aku nak narik samua orak ka-Aku." ³³ Yesus madah hal ntu ntuk nunjukkan ngan kematiam ,macam apeh Ia nak mati. ³⁴ Orak bantak na njawab Ia,"Orak kitu udah nangar dari hukum Taurat kalo Kristus nak tatap diap salama-lama ya; bagemane mungkin Kau bakata,'Anak Kaleno na arus li ninggikan?' Siapehkah Anak Kaleno na?" ³⁵ Yesus njawab mpu'ya,"Diap sabantar agik tarang na ada basama kau. Bajalatlah salagi tarang na masih ada suapaya patak angin bisa nak nguasai kau; sabab orak nang bajalat ka dalap patak angin tau ka mane ia ampus. ³⁶ Saat kau punya tarang na, pecayalah ka tarang na supaya kau njadi anak-anak tarang." Satalah madah na, Yesus ampus lalu sembunyi diri dari mpu'ya. ³⁷ Meskpun Yesus udah muat banyak tande ajaib ka dapan mpu'ya, mpu'ya tatap angin pecaya ka Ia, ³⁸ Supaya ganaplah pekata nang li sampe kan na oleh Nabi Yesaya,"Tuhan, siapehkah nang pecaya ka pemberitaan orak kitu? lalu, ka sapeh kah langan Tuhan udah li nyatakan?" ³⁹ Na lah sabab ya, mpu'ya angin bisa pecaya ka'ena Yesaya ugak bakata, ⁴⁰ "Ia udah mbuta mata mpu'ya wan ngaras ati mpu'ya, supaya mpu'ya usah nele ngan mata mpu'ya wan paham ngan ati mpu'ya, lalu bebalek sampe Aku nyambuh mpu'ya." ⁴¹ Yesaya madah samua ntu ka'ena ia udah nele kemuliaan Yesus wan ia ngomong soal Yesus. ⁴² Meski macam na, banyak ugak kobo pemimpin nang pecaya ka Yesus, tapi ka'ena gali ka orak-orak Farisi, mpu'ya angin madahkan ya tarus tarang ka'ena gali li jauh dari sunagoge. ⁴³ Sabab, mpu'ya labih suka narima kemuliaan dari kaleno daripada kemuliaan dari Allah. ⁴⁴ Udah na, Yesus beseru, kata-Ya, "Satiap orak nang pecaya ka-Aku, angin pecaya ka-Aku, melainkan ka Ia nang ngutus Aku. ⁴⁵ satiap orak nang udah nele Aku, udah nele Ia nang ngutus Aku. ⁴⁶ Aku udah atak sebage Tarang ka dunia ntu, supaya satiap orak nang pecaya ka Aku angin diap dalap utat patak. ⁴⁷ Kalo seorak nangar omong Aku ntu, tapi ia angin nurut ya, Aku angin ngakim ia; sabab Aku tak ukat ntuk ngakim dunia, melainkan ntuk nyelamat dunia. ⁴⁸ Siapeh nang nolak Aku wan angin narima apeh kata Ku, maka firman nang Aku omongkan na ngakim ia pada akhir zaman. ⁴⁹ Ka'ena Aku angin ngomong atas apeh mao ya Aku, melainkan Bapa nang ngutus Aku mere Aku parintas atas apeh nang arus Aku madah dan apeh nang Aku ngomongkan. ⁵⁰ Aku tau kalo parintah-Ya na adalah idup kekal. Sabab na, hal nang Aku sampekan, Aku sampekan na macam nang li madah Bapa ka Aku."