¹ Ada seorak ngelaki nang gik sakin, nama ya Lazarus dari Betania, kampong Maria wan sayadi ya, Marta. ² Maria ntulah mbini nang parnah mere minyak ka batis Yesus ngan minyak wangi wan maso'k batis Yesus ngan bu'uk ya, nang sabanyadi ngelaki ya, Lazarus, wa'tu na sakin. ³ Sabab, kedua sabanyadi na ngirim kabar ka Ia, nang bakata,"Tuhan, orak nang Kau kasihi na gik sakin." ⁴ Tapi, pas Yesus nangar kabar na, Ia bakata,"Penyakin ntu angin sampe mati, tapi bisa mentakan kemuliaan Allah supaya Anak Allah li'muliakan lewat Ia." ⁵ Yesus memang mengasihi Marta, wan sabanyadi mbini ya, wan Lazarus. ⁶ Jadi, pas Yesus nangar kalo Lazarus sakin, Ia sengaja diap 2 ari agik ka tampat Ia diap. ⁷ Udah na, Yesus bakata ka murid-murid-Ya, "Ayok diri ampus agik ka Yudea." ⁸ Kobo murid bakata ka Ia, "Guru, orak-orak Yahudi gik angin lama ntu barusaha nabak Kau ngan batu, apehkah Kau tatap ampus ka ngaan agik?" ⁹ Yesus njawab,"Ukatkah asa 12 jam dalap sahari? kalo seorak bajalat wa'tu siak ari, ia angin tesandung ka'ena ia nele tarang dunia ntu. ¹⁰ Tapi, kalo seorak bajalat pas malam ari, ia tesandung ka'ena tarang ntu angin ada ka ia." ¹¹ Udah Yesus bakata macam na, Ia bakata ka mpu'ya,"Kawan diri, Lazarus, udah tidur, tapi Aku nak ampus ntuk ngelompek ia." ¹² Murid-murid bakata ka Ia,"Tuhan, kalo ia udah tidur, ia bisa baik." ¹³ Yesus sabanar ya ngomong tentang kematian Lazarus, tapi murid-murid ngira Ia ngomong tentang tidur dalap arti istirahat. ¹⁴ Ka'ena na, Yesus bakata ngan tarus tarang ka mpu'ya,"Lazarus udah mati, ¹⁵ Aku sanang demi kepentingan kau, Aku angin ada ka ngaan supaya kau bisa pecaya. Jadi, ayok diri ampus ka ia." ¹⁶ Udah na, Tomas, nang d li sabut Didimus, bakata ka murid-murid nang lain,"Ayok diri ugak ampus supaya diri bisa mati wan Ia." ¹⁷ Pas Yesus atak, Ia namu Lazarus udah ada dalap kubur salama 4 ari. ¹⁸ Adapun Betania telatak lima balas stadia jauh ya dari Yerusalem. ¹⁹ Banyak orak Yahudi udah atak namu Maria wan Marta, ntuk ngibur mpu'ya bekait ngan sabanyadi ya na. ²⁰ pas nangar kalo Yesus udah atak, Marta ampus wan nyambut'Ya, tapi Maria tatap diap ka rumah. ²¹ Marta bakata ka Yesus,"Tuhan, seandai ya wa'tu na Kau ada ka kia, sabanyadiku pasti angin bisa mati. ²² Tapi, ntu aku tau kalo apehpun nang Kau minta dari Allah, Allah bisa mere ka Kau." ²³ Yesus bakata ka ia, "Sabanyadi kau nak bangkit." ²⁴ Marta njawab Ia, "Aku tau ia bisa bangkit pas ari kebangkitan akhir zaman." ²⁵ Yesus bakata ka ia, "Akulah kebangkitan wan kehidupan; siapeh pun nang pecaya ka Aku, ia bisa idup walaupun ia udah mati, ²⁶ wan satiap orak nang idup wan pecaya ka Aku angin nak parnah mati. Apehkah kau pecaya ntu hal ntu?" ²⁷ Marta bakata ka Ia,"Ya Tuhan, aku pecaya kalo Kau lah Kristus, Anak Allah, nang atak ka dunia." ²⁸ Satalah madah hal na, Marta ampus wan nyaru Maria, sabanyadi ya, wan bakata secara pribadi, "Guru ada ka kia Ia nyaru kau." ²⁹ Nangar hal na, Maria capan dadek lalu batamu wan Yesus. ³⁰ Saat ntu, Yesus angin sampe ka desa na, tapi masih kka tampat Marta namu Ya. ³¹ Orak-orak Yahudi nang basama Maria ka rumah na, nang gik ngibur ia, nele Maria capan lumpat lalu ampus keluar; mpu'ya nuna ia ka'ena ngira ia nak ampus ka kubur ntuk nangis ka ngaan. ³² pas Maria sampe ka tampat Yesus diap, ia nele Yesus gik tersungkur ka batis Ya, sarta bakata ka Ia, "Tuhan, seandainya Kau ada ka kitu wa'tu na, sabnyadiku angin nak mati." ³³ Pas Yesus nele Maria nangis, orak-orak Yahudi nang basama ya uga lalu nangis, lalu Yesus dalam Roh terganggu. ³⁴ Yesus batanya, "Ka mane Lazarus kau ngubur ya?" mpu'ya njawab Ia, "Tuhan, ayok nuna wan nele." ³⁵ Yesus pun nangis. ³⁶ Maka, orak-orak Yahudi bakata,"Telelah! Betape Ia mengasihi Lazarus!" ³⁷ Tapi, beberapeh orak li ntara mpu'ya bakata,"Angin bisakah Ia nang udah muka mata orak buta ntu ugak muat Lazarus angin mati?" ³⁸ Yesus, nang sakali agik mengerang dalap diri Ya, ampus ka kubur. Kuburan na adalah sabuag gua, wan sabuah batu li'lantak nutup ya. ³⁹ Yesus bakata,"Singkir lah batu na!" Marta, sabnyadi orak nang mati na, bakata ka Ia,"Tuhan, ntu pasti bisa ada bau bonto ka'ena ia udah mati salama 4 ari." ⁴⁰ Yesus njawab ia, "Ukatkah Aku udah madah ka kau kalo kau pecaya, kau bisa nele kemuliaan Allah?" ⁴¹ Jadi, mpu'ya ngangkat batu na. Lalu, Yesus ngkadah lalu bakata,"Bapa, Aku bersyukur ka Kau ka'ena Kau udah nangar Aku. ⁴² Aku tau kalo Kau salalu nangar Aku, tapi ka'ena orak-orak nang ddek ka sekeliling Ku, Aku madah hal ntu supaya mpu'ya pecaya kalo Kau lah nang udah ngutus Aku." ⁴³ Satalah madah na, Yesus ngampak ngan suara karas,"Lazarus, keluarlah!" ⁴⁴ Orak nang udah mati na kaluar, langan wan tali ya masih gtekaban tali kafan, mua ya masih tatutup kain kafan. Yesus bakata ka mpu'ya," Lapaslah kain-kain na dari kau lalu mbiar ia ampus." ⁴⁵ Orak-orak Yahudi nang atak ngunjung Maria, nele apeh nang udah Yesus muat, njadi pecaya ka Ia. ⁴⁶ Tapi, beberapeh dari mpu'ya ampus ka orak-orak Farisi wan mere tau mpu'ya apeh nang udah li'muat Yesus. ⁴⁷ Maka, imam-imam kapala wan orak-orak Farisi ngadakan petemuan Sanhedrin bakata,"Apeh nang bisa diri muat? Sabab, Orak ntu muat banyak tande ajaib. ⁴⁸ kalo diri mbiar Ia tarus macam ntu, samua orak bisa pecaya ka Ia wan orak-orak Roma bisa atak ntuk ngerampas tampat ntu wan bangsa diri." ⁴⁹ Tapi, seorak dari mpu'ya nang banama Kayafas, nang njadi imam aya pas wa'tu taun na, bakata ka mpu'ya,"orak sana angin tau apeh-apeh, ⁵⁰ atopun nak mempertimbangkan kalo labih baik sote orak mati ntuk saluruh bangsa, daripada saluruh bangsa binasa." ⁵¹ Ia angin madah dari diri Ya sorak, tapi sebage Imam Aya taun ntu, ia benabuat kalo Yesus nak mati ntuk bangsa ntu. ⁵² ukat hanya ntuk bangsa Yahudi, melainkan ugak ntuk ngumpulkan njadi sote anak-anak Allah nang tesabar. ⁵³ Maka, sajak ari na, mpu'ya sapakat ntuk munuh Yesus. ⁵⁴ Ka'ena na, Yesus angin agik bajalat secara tarang-tarangan li'ntara orak Yahudi, tapi Ia ampus dari ngaan ka wilayah samak padang belantara ka sabuah kota banama Efraim; Ia diap ka ngaan basama nurid-muruid Ya. ⁵⁵ Wa'tu na, Paskah orak Yahudi udah samak, banyak orak dari wilayah na ampus ka Yerusalem sabalum Paskah ntuk nyuci diri mpu'ya. ⁵⁶ Lalu, mpu'ya ngago Yesus wan ngomong sote ka nang lain samantara mpu'ya dadek dalap bait Allah, mpu'ya saling batanya,"Bagemane menurut kau? Apehkah Ia ngaan sama sekali angin bisa atak ka perayaan ntu?" ⁵⁷ Adapun imam-imam kapala wan orak-orak Farisi udah ngeluar parintah kalo seorak tau ka mane Ia barada, orak na arus ngelaporkan ya supaya mpu'ya bisa nangkap Ya.