¹ "Usahlah ati kau njadi galisah; pecaya lah ka Allah, pecayalah ugak ka Aku. ² Ka rumah Bapa-Ku ada banyak tampat diap; Kalo angin bagena, Aku tantu udah madah ya ka kau ka'ena Aku ampus ntuk nyiapkan sabuah tampat ntuk kau. ³ kalo Aku ampus wan nyiapkan ya sabuah tampat ntuk kau, Aku nak atak agik maba kau ka Aku suapaya ka mane Aku ada, kau pasti ada. ⁴ Kau tau jalat Aku ampus." ⁵ Lalu, Tomas bakata ka Ia,'Tuhan, orak kitu tau ka mane Kau ampus, bagemane orak kitu tau jalat na?" ⁶ Yesus bakata ka ia, "Akulah jalat,wan kebanaran, wan kehidupan. Angin ada ka Bapa, kalo ukat lewat Aku. ⁷ Kalo kau udah nganal Aku, kau ugak pasti udah nganal Bapa-Ku; mulai ntu nyan, kau udah nganal Bapa wan udah nele Ia." ⁸ Filipus bakata ka Ia, "Tuhan, bere lah orak kitu nele Bapa na ka orak kitu, na pun udah cukum ntuk orak kitu." ⁹ Yesus njawab ia,"Filipus, udah lama Aku basama-sama wan kau, kau masih gik angin nganal Aku? Barangsapeh udah nele Aku, ia udah nele Bapa, bagemane kau bisa bakata,'nyuruh Aku nunjuk Bapa na ka orak kitu?' ¹⁰ Apehkah kau angin pecaya Aku ka dalap Bapa wan Bapa ka dalap Aku? pekata-pekata nang Aku madah na ka kau, Aku angin madah dari diri-Ku sorak, tapi Bapa nang diap ka dalap Aku lah nang muat pegawe ya. ¹¹ Pecaya lah ka Aku, kalo Aku ka dalap Bapa wan Bapa ka dalap Aku; ato setidak ya, pegawe-pegawe na sorak. ¹² Ngan sabanar ya, Aku madah ka kau, satiap orak nang pecaya ka Aku, pegawe-pegawe nang Aku muat, ia ugak nang nak muat ya; wan pegawe-pegawe nang labih aya daripada samua na ka'ena Aku ampus ka Bapa. ¹³ Apeh pun nang kau minta dalap nama-Ku, na bisa Aku muat supaya Bapa limuliakan ka dalap Anak. ¹⁴ Kalo kau narima apeh pun ka Aku dalap nama-Ku, Aku pasti muat kan ya. ¹⁵ "Kalo kau mengasihi Aku, kau pasti nurut samua parintah-Ku. ¹⁶ Aku nak minta ka Bapa, Ia nak mere ka kau penolong nang lain, supaya Ia basama wan kau salama ya, ¹⁷ Ya na Roh Kebenaran, nang angin bisa litarima dunia, ka'ena dunia angin nele Ia ato nganal Ia; tapi kau nganal Ia ka'ena Ia diap basama wan kau pasti ada dalap diri kau. ¹⁸ Aku angin nak napuk kau bage yatim piatu; Aku nak atak ka kau. ¹⁹ Angin lama agik, dunia angin nak nele Aku agik, tapi kau nak nele Aku; ka'ena Aku idup, kau pun nak idup. ²⁰ Pas ari na, kau nak tau kalo Aku ka dalap Bapa-Ku, wan kau dalap Aku, wan Aku dalap kau. ²¹ Siapeh pun nang migak parintah-Ku wan melakukan ya, ia mengasihi Aku; wan orak nang mengasihi Aku pasti li kasihi Bapa-Ku, wan Aku pasti mengasihi ia wan nyatakan diri-Ku ka ia." ²² Yudas, nang ukat Iskariot, bakata ka Ia,"Tuhan, bagemane Kau nak nyatakan diri Kau ka orak kitu wan ukat ka dunia?" ²³ Yesus njawab wan bakata ka ia, "Kalo seorak mengasihi Aku, ia nak nurut firman-Ku; wan Bapa-Ku nak mengasihi ia, wan orak kitu nak atak ka ia wan nak diap basama wan ia. ²⁴ Tapi, orak nang angin mengasihi Aku, angin nurut firman-Ku. Wan, firman nang kau nangar na ukat dari-Ku, melainkan dari Bapa nang ngutus Aku. ²⁵ Samua hal ntu udah Aku madah ka kau salama Aku masih basama wan kau. ²⁶ Tapi, penolong na, ya na Roh Kudus, nang nak Bapa utus dalap nama-Ku, Ia nak ngajar sagala suatu ka kau, wan nak ngingatkan kau ka samua nang udah ku madah ka kau. ²⁷ Damai sejahtera Ku napuk basama wan kau; damai sejahtera-Ku Kumere ka kau, ukat bage nang dunia mere nang Aku mere ka kau. Usah mbiar ati kau galisah atopun gamatar. ²⁸ Kau udah nangar kalo Aku bakata ka kau,'Aku nak ampus, wan Aku nak atak agik ka kau.' Kalo kau mengasihi Aku, kau pasti besukacita ka'ena Aku ampus ka Bapa, sabab Bapa labih aya daripada Aku. ²⁹ Aku udah mere tau kau ntu sabalom hal na tejadi supaya pas hal na tejadi, kau pasti pecaya. ³⁰ Aku angin nak ngomong labih banyak agik ngan kau ka'ena penguasa dunia ntu gik nak atak. Ia angin bekuasa sedamuk pun atas -Ku. ³¹ Tapi supaya dunia tau kalo Aku mengasihi Bapa, Aku muat tampat bagena nang Bapa parintah ka Aku. Lumpatlah ayok diri ampus dari utat ntu."