¹ Jari, inun sa sagar na eau takam neu hi Abraham, datu nini bangsa takam? ² Amun hi Abraham na ampi wuah mitah ulah gawini, hanye naan alasan nampan iwawara, kude puang iwawara hang hadapan Alatalla. ³ Inun sa nasurat hang wuang Surat Barasis? "Hi Abraham parisaya ma Tuhan balalu Tuhan mamparhitungkannhal yiru ma hanye sabagai kabanaran." ⁴ Ma kawan ulun sa bagawi, upa sa naami ma here puang yalah pangamian,malenkan dasar hak here. ⁵ Balalu, ma here sa puang bagawi, kude parisaya ma Alatalla sa ngampi wuah ulun fasik, iman here na perhitungkan sabagai kabanaran. ⁶ kalayiru pada hi Dawid kaeau tuu sanang ulun sa na benarkan daya Alatalla puang badasarkan inun sa nakarajani: ⁷ "Tuu sanang kawan ulun sa naampuni kawan kahalaenni, nelang natutup kawan dusani. ⁸ Tuu sanang kawan ulun sa dusani puang naperhitungkan daya Alatalla!" (Mazmur 32:1-2) ⁹ Inunkah berkat yina natuju ekat ma ulun sa ba sunat? Atawa pada ma kawan ulun sa puang ba sunat? Daya kami haut kaeau kapihuanni "Iman hi Abraham nahitung sabagai kabanaran." ¹⁰ Balalu, kaawe hal yiru na perhitungkan ma hanye? sahuan atawa sahaut hanye na sunat? Puang udi hanye na sunat,malenkan kapihuanni. ¹¹ Hi Abraham narime tanda sunat sabagai kabanaran iman sahuan hanye basunat nampan hanye kaiyuh jari amah ma katuluh ulun sa parisaya sa puang ba sunat nampan kabanaran yiru pada naperhitungkan ma here; ¹² palus jari amah ma kawan ulun sa ba sunat, hanye yiru here sa puang ekat ba sunat kude pada uma takia hang lalan iman hi Abraham, sa huan hanye ba sunat. Hi Abraham narime janji Alatalla mitah imanni. ¹³ Janji ma hi Abraham andri ma katurunanni amun here sagar ampun katuluh dunia puang daya mitah Hukum Taurat, kude mitah kabanaran iman. ¹⁴ Sabab, amun here sa hawi teka Hukum Taurat tau jari ahli waris, iman jari puang bariran nelang janji Alatalla tau batal; ¹⁵ Hukum Taurat ngampi hawi murka, kude amun mahi Hukum Taurat, hang yiru pada mahi palanggaran. ¹⁶ Irulah dainun janji hawi teka iman, janji yiru badasarkan sinta lelu nampan janji yiru pada hampe ma katuluh katurunan hi Abraham; Puang ekat teka Hukum Taurat, kude pada teka iman hi Abraham, hanye yiru amah takam katuluh. ¹⁷ (ialah sa naan nasurat, "Aku haut ngampi jari hanyu amah ma hene bangsa") hang hadapan Alatalla, sa ngami pamelum ma ulun matei andri sa ngampi jari mitah lenga-Ni inun sa mahi jari naan. ¹⁸ Hang wuang pangharapan hanye parisaya, daya yiru hanye tau jari amah hene bangsa sasuai andri sa haut na antuh, "Sagar jari rama katurunannu." ¹⁹ Imanni puang ba kurang, meskipun hanye karasa amun tengani raerai haut matueh daya umur ni haut sakitar 100 taun kamulek hi Sara tamanang; ²⁰ hanye parisaya nelang puang bembang andri janji Alatalla. Kabalikanni, imanni batambah kuat nelang hanye nawat hurmat ma Alatalla, ²¹ hanye yakin Alatalla bakuasa nampalus inun sa haut na janjini. ²² Yiru sababni, imanni " naperhitungkan sabagai kabanaran." ²³ Hal yiru puang natulis ekat ma hi Abraham raerai, ²⁴ kude pada ma takam. Hal yiru sagar na perhitungkan ma here sa parisaya ma Hanye sa haut nyamelum Yesus, Tuhan takam teka penah ulun matei. ²⁵ Hanye yiru, Yesus sa haut na sarah nampan matei daya dusa takam, balalu sa haut na samelum kamulek demi pembenaran takam.