¹ Amun kala yiru, inun sa labis teka ulun Yahudi? atawa inun kauntunganni basunat? ² Hene tatuu, hang hene masam hal; sa mambatang, ma here naparisaya lengan Alatalla. ³ Balalu kala awe, amun papire ulun puang parisaya? inunkah kapuang parisayaan here ru tau ngampi batal kasatiaan Alatalla? ⁴ Budas puang! Alatalla tuu bujur biar tiap ulun pangapusu. Ialah naan nasatat: "Hanyu tabukti bujur hang wuang katuluh sa naantuh-Nu, balalu Hanyu sagar manang tawuk Hanyu nahakimi." Mazmur 51:6 ⁵ Kude, amun takam sa puang bujur yina justru ngampi dinung kabanaren Alatalla, inun sa hamen na eau takam? Inun iyuh takam kaeau Alatalla puang adil amun nukum takam? (Aku kaeau kala sara murunsia) ⁶ Budas puang! Amun kala hie, kala awe ALatalla tau mahakimi dunia? ⁷ Kude, amun mitah pigawianku sa puang bujur, kabanaran Alatalla magin natawat, dainun aku magun nahakimi kala ulun badusa? ⁸ Nelang (sameh kala sa nadawa papire kaulun ma kami) dainun puang kaeau, "Hayu, takam ngaraja sa jahat nampan hulet pikaeh." Here sa kaeau kala yiru patut nahukum! Katuluh ulun nakuasai dusa ⁹ Balalu kala awe? Inunkah takam na diwi teka ulun lain? Budas puang! Daya, kami haut suah kaeau sahuan yina ma kawan ulun Yahudi atawa ma kawan ulun puang Yahudi, katuluhni hang wuang kuasa dusa ¹⁰ Kala naan natulis, "Puang sunah erang kaulun sa bujur. ¹¹ Puang sunah erang kaulun sa baakal budi. Puang sunah erang kaulun sa ngantara Alatalla. ¹² Katuluh ulun haut iwaleng teka Hanye, puang sunah erang kaulun sa bariran. Puang sunah erang kaulun sa ngulah kaeh, puang sunah erang kaulun." Mazmur 14:1-3 ¹³ "Gugurungan here kala pasaran sa wawanga, lela here ngaluar tipu akal, wisa anipe naan hang wiwi here." Mazmur 5:10; 140:3 ¹⁴ "Wawa here penu sapa sumpah anri kapaiten." Mazmur 10:7 ¹⁵ "Pee here hinang ngunu ngampi tunrak ira, ¹⁶ Kasusahen anri kahansuren naan hang lalan here ¹⁷ Puang here karasa kaawe welum damai." Yesaya 59:7-9 ¹⁸ "Takut anri Alatalla puang uweng hang here." Mazmur 36:2 ¹⁹ Taati takam karasa katuluh sa nasurat hang wuang Hukum Taurat, natuju ma here sa welum hang kapit Hukum Taurat nampan patutup katuluh wawa balalu dunia naan hang kapit penghakiman Alatalla ²⁰ Puang sunah isa murunsia sa bujur hang hadapan Alatalla daya gana ngaraja Hukum Taurat, kabalikanni mitah Hukum Taurat ulun kataru dusa. Alatalla ngampi bujur murunsia mitah iman ma Yesus Kristus ²¹ Kude taati, biar mahi Hukum Taurat, Alatalla haut iwara palus nasaksikan mitah Kitab Taurat andri kawan nabi. ²² Daya yiru,kabanaren Altalla mitah iman ma Yesus Kristus na ami ma katuluh ulun sa parisaya, daya puang uweng bedani. ²³ Daya katuluh ulun haut badusa nelang kawawaian kamuliaan Alatalla, ²⁴ andri nabenarkan daya ahi lelu-Ni mitah penebusan hawuang Yesus Kristus; ²⁵ Sa haut nawara daya Alatalla neu lalan pendamaian hawuang ira-Ni itetei iman. Hal yena nantarang keadilan-Ni, daya hawuang kasabaren-Ni, Alatalla haut mambiar kawan dusa tajadi. ²⁶ Hal yiru pada naaheng neu nantarang kaadilan-Ni hang masa itati nampan Hanye tabukti bujur palus ngampi bujur ulun sa baiman ma Yesus. ²⁷ Amun kala hie, hang awe katamaman takam? Haut na umpe! Mitah hukum inun? Mitah hukum parbuatan takam? puang, malengkan daya hukum iman. ²⁸ Daya gana yiru, takam parisaya, amun murunsia na ampi wuah hang hadapan Alatalla mitah iman, puang teka ulah gawi sa nasurat hawuang Hukum Taurat ²⁹ Atawa, inunkah Alatalla ekat jari Alatalla ulun Yahudi? Angneh Hanye pada jari Alatalla ma bangsa puang Yahudi? Yai, Hanye pada jari Alatalla ma bangsa puang Yahudi, ³⁰ daya Alatalla ekat isa, Hanye sa ngampi wuah kawan ulun sa basunat daya iman, andri ma kawan ulun sa puang basunat sa pada daya iman. ³¹ Jari, inunkah takam ngampi wawai Hukum Taurat daya iman? Budas puang! Kabalikanni, takam justru maneguhkan Hukum Taurat.