¹ Daya yiru, naun puang tau lagi bakilah, hie sa tau ngampi hala ulun lain, sameh ngaranni ngampi hala dirini raerai; Daya naun sa ngampi hala ulun lain sameh miulahan kala yiru pada. ² Takam karasa amun Alatalla nyanawu hukuman sa adil ma ambau katuluh ulun sa miulahan kawan hal kala yiru. ³ Inun naun minda naun kaiyuh lapas teka hukuman Alatalla, naun sa ngampi hala here, kude ulahan naun pada sameh kala yiru? ⁴ atawa, inun naun nganggap enteng ahi lelo-Ni, kasabaren-Ni anri kalapangan atei-Ni balalu papura puang karasa pikaeh atei Alatalla nampan naun batobat? ⁵ Kude, naun mape silu nelang puang hakun batobat, naun sameh kala nyimuh kasangiten ma ambau naun raerai hang anrau kiamat dami hukuman sa bujur hawi teka Alatalla. ⁶ Hanye sagar iwaleh ma tiap ulun sasuai anri pigawianni: ⁷ hanye yiru pamelum sa kalalawah ma here sa utul ngulah maeh nampan kaiyuh sa mulia, anri kahormatan, ⁸ kude murka anri kasangiten ma here sa ekat mamikir tengani raerai nelang puang nuu ma sa maeh, malengkan umba sa hala. ⁹ Sagar naan kahanangen anri uyuh rara ulun sa ngulah kajahaten, sa mambatang ma ulun Yahudi kala yiru pada ma ulun Yunani. ¹⁰ Kude kamuliaan, kahormatan, anri damai sejahtera sagar na ami ma ulun sa ngulah maeh, sa mambatang ma ulun Yahudi kala yiru pada ma ulun Yunani. ¹¹ Daya Alatalla puang mambeda-bedakan murunsia. ¹² Ma kawan ulun sa badosa anri puang karasa Hukum Taurat, here sagar nahakimi hang luar Hukum Taurat. Kude, kawan ulun sa badosa sa karasa Hukum Taurat sagar na hakimi makai Hukum Taurat. ¹³ Puang daya ulun karengei Hukum Taurat sa kahaba pikaeh hang hadapan Alatalla, kude ulun sa nampalus inun sa naan hang wuang hukum yiru sa kahaba pikaeh. ¹⁴ Kawan ulun puang Yahudi sa puang karasa Hukum Taurat, kude here nampalus inun sa naparentah Hukum Taurat, here haut jari Hukum Taurat ma diri here raerai. ¹⁵ Hal yiru nantarang parentah Hukum Taurat tasurat hang wuang atei here, atei akal here umba ngami kasaksian, kunuan here naan wayahni ngampihala atawa naan wayahni ngalun here, ¹⁶ hang anrau Alatalla mangadili pikiran rasia atei murunsia itetei Yesus Kristus sasuai anri Kabar Maeh. Ulun Yahudi anri Hukum Taurat ¹⁷ Kude, amun naun mangaku ulun Yahudi anri itegei hang Hukum Taurat, nelang iwawara gana hubungan naun anri Alatalla, ¹⁸ karasa kabahumen-Ni, tau nukas saawe sa maeh, haut naajar teka Hukum Taurat, ¹⁹ balalu yakin amun naun sa mimpin ulun pehe, piraai ma here sa muneng hawuang piieng, ²⁰ ngajar kawan ulun budu, ngajar kawan iya, naun tuu karasa kaawe pangatahuan andri kabanaran hang wuang Hukum Taurat, ²¹ Naun ngajar ulun lain, kude daya inun naun puang ngajar diri naun raerai? Naun ngajar ulun nampan ada ngalat, dainun naun raerai ngalat? ²² Naun nyangit ulun ibela, dainun naun raerai ibela? Naun muar anri kawan barhala, dainun naun raerai ngalat teka lewu barhala? ²³ Naun iwawara naan Hukum Taurat dainun naun ngampi ngumangan Alatalla anri puang nampalus hukum-Ni! ²⁴ Naan nasurat: "Daya naun, ngaran Alatalla natangkurun hang penah bangsa lain ." ²⁵ Sunat naan riranni amun naun ngalut nuu Hukum Taurat, kude amun naun puang ngalut nuu Hukum Taurat, sunat naun yiru jari puang bariran. ²⁶ Jari, amun ulun sa puang basunat nampalus kawan parentah hawuang Hukum Taurat, angneh hanye naanggap kala ulun sa basunat? ²⁷ Amun kalahie, angneh kawan ulun sa puang basunat, kude nampalus Hukum Taurat, sagar ngampi hala naun, daya naun karasa Hukum Taurat nelang naun basunat, kude naun malanggar hukum yiru? ²⁸ Daya ulun sa naantuh ulun Yahudi puang ekat kadinungan teka luarni, nelang basunat sabujurni puang ekat nasunat ma tenga daging. ²⁹ Erang kaulun Yahudi sajati hanye yiru ulun sa batinni tuu Yahudi, sunat sa sajati hanye yiru sunat hang atei, sa nakaraja daya Roh, puang daya gana hukum sa nasatat. Tawat hormat ma ulun sa kalayiru puang natarime teka murunsia, malengkan teka Alatalla.