¹ Daya yiru, takam haut nabenarkan daya iman, nelang takam haut badamai andri Alatalla itetei Tuhan takam, Yesus Kristus; ² itetei Hanye, takam kaiyuh lalan masuk nuju iman ma anugerah Alatalla sa taati jari dasar takam, nelang miarai hang wuang pangharapan kamuliaan Alatalla. ³ Diwi teka yiru, takam pada miarai hang wuang kahanangen daya takam karasa amun kahanangen yiti tau ngulah katekunan, ⁴ katekunan sagar ngulah tahan uji, tahan uji sagar jari kaharapen, ⁵ balalu kaharapen puang sagar ngulah kasiwa, daya sinta Alatalla haut na huang ma wuang atei takam mitah Roh Barasis sa haut na karuniakan ma takam. ⁶ Tawuk takam mahi kakuaten, Kristus matei ma takam kawan ulun durhaka wayahni tangar tuu. ⁷ Daya gana, jarang naan ulun sa hakun matei ma erang kaulun sa bujur, kude tau sa pada naan ulun sa hakun matei ma erang kaulun sa maeh. ⁸ Kude, Alatalla nantarang sinta-Ni ma takam, tawuk takam masih jari ulun badusa, Kristus matei ma takam. ⁹ Diwi teka yiru, daya takam haut nabenarkan itetei ira-Ni, takam pada sagar na salamat teka murka Alatalla. ¹⁰ Tawuk takam masih jari musuh Alatalla, takam haut badamai andri Alatalla itetei pampatei Anak-Ni, likan itati daya takam haut badamai andri Hanye, pasti takam nasalamat mitah welum-Ni ¹¹ Puang ekat yiru, takam pada miarai hang wuang Alatalla itetei Tuhan takam Yesus Kristus, daya itetei Hanye takam itati tau narime pendamaian teka Alatalla. Matei itetei hi Adam, welum itetei Kristus. ¹² Daya yiru, sameh ialah dusa sa haut masuk hang wuang dunia itetei erang kaulun balalu maut masuk mitah dusa yiru, kala yiru jua maut mihampit ma katuluh ulun, daya katantuluh ulun haut badusa. ¹³ Dusa haut naan hang dunia kapihuan Hukum Taurat hi Moses, kude dusa yiru puang nahitung daya Alatalla salawah mahi Hukum Taurat. ¹⁴ Kude, maut bakuasa teka jaman hi Adam hampe jaman hi Moses, likan ma kawan ulun sa puang ngulah dusa kasameh hi Adam, hanye yiru gambaran teka Hanye sa sagar hawi handrian. ¹⁵ Kude, pangamian teka Alatalla puang sabanding andri dusa. Daya gana, amun daya dusa erang kaulun, hene murunsia haut matei, labis lagi ahi lelu andri pangamian teka Alatalla itetei ahi lelu erang kaulun yiru, hanye yiru Yesus Kristus. ¹⁶ Ahi lelo puang sameh andri dusa erang kaulun yiru. Daya panghakiman ma isa palanggaran sagar ngenei hukuman, kude ahi lelu ma kawan palanggaran ngenei pembenaran. ¹⁷ Amun daya dusa erang kaulun, maut bakuasa ma erang kaulun yiru, labis lagi ma kawan ulun sa narime ahi lelu andri kabenaran sa sagar bakuasa hang wuang pamelum itetei isa kaulun, hanye yiru Yesus Kristus. ¹⁸ Jari, sameh kala isa palanggaran katuluh ulun narime hukuman, kala yiru pada daya isa parbuatan kabenaran katuluh murunsia narime welum andri pambenaran. ¹⁹ Daya erang kaulun sa puang taat, hene murunsia jari badusa. Kude daya erang kaulun sa taat, hene murunsia sagar nabenarkan. ²⁰ Hukum Taurat natamah nampan dusa magin hene. Kude, hang awe hene dusa, ahi lelu Alatalla magin balimpah-limpah, ²¹ nampan sameh iyalah dusa sa bakuasa hang wuang maut, kala yiru pada ahi lelu bakuasa itetei kabenaran sa mamimpin ma welum kekal hawuang Kristus Yesus Tuhan takam.