¹ Udihie, Yesus kaeau ma here, "Aku ngantuh sa tu'uni ma hanyu, naan papire ulun sa ganyah mindri hang yina sa puang sagar matei hampe here kadinung kerajaan Alatalla hawi andri kuasa. "Yesus sindrah hi Musa andri hi Elia. ² Balalu, enem andrau udihie, Yesus nga'yak hi Petrus, hi Yakobus, andri hi Yohanes, balalu, nga'yak here ngara'erai ma gunung sa amau. Udihie, hangyaru Yesus baubah rupa hang hadapan here. ³ Pama-Ni jari tarang andri mahilak tatu'u. Mahi hang dunia na naan kain sa mahilak kala yiru. ⁴ Salenga, naan hang hadapan here, hi Elia sindrah andri hi Musa, nelang here ganyah bapaner andri Yesus. ⁵ Udihie, hi Petrus kaeau ma Yesus, "Rabi, maeh tatu'u kami muneng hang yina. Hayu takam ngulah telu kemah, isa pakai Hanyu, isa pakai hi Musa, andri isa ni pakai hi Elia." ⁶ Deya, hi Petrus puang karasa harus nyangai inun deya here katuluh takut. ⁷ Balalu, hulet rakun ngalinung here, nelang narengei isa lengan hingka rakun yiru, eau-Ni, "Itilah Iya-Ku sa nahayang deya Aku. Narengei eau -Ni!" ⁸ Hantek yiru jua, udi here kadinung pulau yiru, here puang lagi kadinung hie-hie baya here kasuali Yesus. ⁹ Ganyah here minau teka gunung, Yesus ngami perintah ma here nampan ada mawara mahie-hie inun sa haut here tantau, hampe Iya Murunsia amuan hang helang ulun matei. ¹⁰ Deya yiru, here negei antuhan yiru pakai ma here ra'erai nelang nunti-nunti inun artini amuan hingka kapateian yiru. ¹¹ Balalu, here nuntini ma Yesus, "Deya inun kawan ahli Taurat kaeau hi Elia harus hawi badahulu?" ¹² Udihie, Yesus kaeau ma here, "Elia dasar harus hawi badahulu pakai nangkaeh kaluhanni. Andri, kala'awe sa haut nasurat hal Iya Murunsia sa sagar rara rama hal nelang nahina? ¹³ Kude, Aku kaeau ma hanyu bahwa hi Elia memang haut hawi, andri here nyamut hanye sameh andri inun sa naaheng here, ialah kala sanasurat hal hanye." Kawan Murid Puang ka'iyuh Napas Roh Raat teka Isakaulun. ¹⁴ Udihie, hantek Yesus, hi Petrus, hi Yakobus, andri hi Yohanes mulek ma kawan murid, here nantau karumunan ulun rama hang kuliling kawan murid yiru, andri kawan ahli Taurat ganyah basual andri here. ¹⁵ Dami, katuluh karumunan ulun yiru nantau Yesus, here jari emah nelang nempat nunung Hanye. ¹⁶ Balalu, Yesus nunti ma here, "Basual hal Inun hanyu andri kawan ahli Taurat yiru?" ¹⁷ Isakaulun teka karumunan yiru nyangai Hanye, "Guru, aku ngenei iya upuku ma Hanyu deya karasukan roh sa ngulah hanye bisu. ¹⁸ Hantek roh yiru manguasai hanye, roh yiru ngahampas hanye ma tane balalu hingka wawa-ni balua ialah busa, andri dipen-ni ialah girigiten, balalu hanye jari kejang. Aku ilaku ma kawan murid-Nu nampan ngusir roh yiru, kude here pakaiyuh." ¹⁹ Balalu, Yesus nyangai here nelang kaeau, "Hi, generasi sa puang baiman! Pire kalawah lagi Aku harus baya hanyu? Pire kalawah lagi Aku harus batahan baya hanyu? Enei iya iru ma Aku!" ²⁰ Balalu, here ngenei iya yiru ma Yesus. Dami, hantek roh yiru kadinung Yesus, hanye palus ngagunsang-gunsang iya yiru. Iya yiru lawu ma tane andri taguling-guling nelang hingka wawani balua busa. ²¹ Udihie, Yesus nunti ma amah Iya iru, "Haut pire kalawah hanye kala yina?" Sangaini, "Mulai hingka rumis. ²² Nelang, roh iru haut gaha medak hanye ma wuang apui andri ma wuang ranu neu ngahansur hanye. Kude, Amun Hanyu kaiyuh ngulah hanye maeh, awat kami andri laku ahi Hanyu kami." ²³ Yesus kaeau ma hanye, "Amun Hanyu kaiyuh? Katuluh hal mungkin ma here sa parasaya. ²⁴ "Hinang amah iya yiru ngiak andri nantiak, "Aku parasaya! Awat aku sa puang parasaya!" ²⁵ Hantek Yesus nantau ulun rama hinang hawi bakarumun, Hanye maharek roh yiru nelang kaeau ma hanye, "Hanyu roh bisu andri marengen, Aku marintah hanyu kaluar teka iya yina andri ada masuk ma hanye lagi!" ²⁶ Udi nantiak andri ngagunsang-gunsang iya yiru, roh yiru kaluar. Iya yiru jari ialah ulun matei hampe ulun rama yiru kaeau, ''hanye matei!" ²⁷ Kude Yesus negei tangan iya yiru andri ngamuan hanye, hampe iya yiru mindri. ²⁸ Andri, dami Yesus masuk ma wuang lewu, kawan murid-Ni nunti ma-Hanye, "Deya inun kami puang kaiyuh ngusir roh iru?" ²⁹ Balalu Hanye kaeau ma here, "'Jenis iti puang kaiyuh kaluar amun puang andri doa." Yesus Bapaner Lagi hal Kapateian-Ni ³⁰ Hingka yaru, Yesus andri kawan murid-Ni tulak mitah wilayah Galilea. Nelang Hanye puang hakun naan ulun sa karasa. ³¹ Deya Hanye ganyah ngajar kawan murid-Ni andri kaeau ma here, "Iya Murunsia sagar nasarah ma tangan murunsia, andri here sagar munu Hanye. Balalu, udi Hanye nawunu, telu andrau udiyiru Hanye sagar amuan." ³² Kude yiru, kawan murid-Ni puang kataru paneran yiru nelang here puang he'ei nunti ma Hanye. Ipasual hal Hie sa Pangahante ³³ Udihie, Yesus andri kawan murid-Ni hampe ma Kapernaum. dami, Yesus naan hang wuang lewu, Hanye nunti ma here, "Inun sa napaner naun wuang kia'an nien?" ³⁴ Kude, here benyem daya hang kiaan nien here basual isa andri sa lain hal hie sa panga hante. ³⁵ Balalu, Yesus maharung andri nerau karueh walas murid-Ni. Balalu, Hanye kaeau ma here, "Dami isakaulun sini jari sa hang muka, hanye harus jari sa hang wading teka katuluhni andri jari walah ma katuluhni." ³⁶ Udihie, Yesus ngalap isakaulun iya rumis balalu nganak hanye mindri hang helang here. Andri, nelang ngempu iya yiru, Hanye kaeau ma here, ³⁷ "Hie sa nyambut iya rumis kala yina wuang ngaran-Ku, hanye nyambut Aku. Balalu, hie sa nyambut Aku, puang sa nyambut Aku, Kude nyambut Hanye sa mengutus Aku." Ulun sa Mangusir Setan wuang Ngaran Yesus ³⁸ Yohanes kaeau ma Yesus, "Guru, kami kadinung ulun ngusir kawan setan wuang ngaran-Nu, balalu kami nguring-Ni deya hanye puang uma takam." ³⁹ Kude, Yesus kaeau, ''Ada nguring hanye daya mahi ulun sa ngulah kajadian sa wauh wuang ngaran-Ku, ta'u hang hantek iru jua ngahujat Aku. ⁴⁰ Deya, hie sa puang nawan takam, hanye naan hang pihak takam. ⁴¹ Deya, Aku ngantuh sa tu'uni ma hanyu, hie-hie sa ngami hanyu isa galas ranu deya hanyu ngiring Kristus, puang bakal wawai upa-ni." Hal Penyebab Dosa ⁴² Deya hie pun sa ngulah isa teka kawan iya rumis sa parasaya ma Aku iru badosa, maeh ma hanye amun isa watu kilangan sa hante na gantung hang diung-ni balalu na umpe ma wuang laut. ⁴³ Udihie, dami tangan-nu sa ngulah hanyu badosa, ware tetek ai tangan-nu yiru. Ware hanyu masuk ma pamelum andri tangan-nu sa buntung, teka rueh tangan-nu masuk ma naraka, ma wuang apui sa puang sagar pare, ⁴⁴ uneng sa uletni puang sagar matei andri apuini puang sagar pare. ⁴⁵ Balalu, dami pe'enu sangulah hanyu badosa, ware tetek ai pe'enu yiru. Ware hanyu masuk ma wuang pamelum andri pe'e buntung, teka andri rueh pe'enu napedak ma wuang naraka, ⁴⁶ uneng sa uletni puang sagar matei andri apuini puang sagar pare. ⁴⁷ Andri, dami matenu sa ngulah hanyu badosa, ware nacungkil ai matenu iru. Ware hanyu masuk ma kerajaan Alatalla andri isa mate teka andri rueh mate hanyu napedak ma wuang naraka, ⁴⁸ uneng sa uletni puang sagar matei andri apuini sa puang sagar pare. ⁴⁹ Deya, katuluh ulun sagar narangi andri apui. ⁵⁰ Rangi yiru maeh, kude dami rangi iru haut wawai erangni, kalaawe hanyu sagar ngulahni mulek maerang? Najaga rangi sa hang wuang tenganu raerai balalu badamaileh isa andri sa lain."