Hal Basarak ¹ Udihie, Yesus nanan uneng yiru balalu tulak ma wilayah Yudea andri ma sabarang hungei Yordan. Balalu, ulun rama bakumpul bakarumun nunung Hanye. Andri, kalalanani, Hanye here lagi. ² Udihie, kawan ulun Farisi hawi nunung-Ni, neu nyansuba Hanye nelang nunti, "Inunkah ta'u matue upu nyarak matue wawei-ni?" ³ Yesus nyangai here, "Inun sa haut na parintah hi Musa ma hanyu?" ⁴ Here kaeau, "Hi Musa puang nguring isakaulun matue upu ngulah surat sarak pakai nyarak darangan'ni." ⁵ Kude yeru, Yesus kaeau ma here, "Deya ateinu sa karas, hi Musa hampe ngulah surat sarak yiru ma hanyu. ⁶ Sabujurni hingka awal dunia naulah, Alatalla haut ngulah here isa pasang upu andri wawei. ⁷ Dagana yirulah, isakaulun kawan upu sagar nanan ambah andri inehni. ⁸ Balalu kareuhni jari isa tenga. 'yiru ngulah here puang na antuh lagi rueh, kude isa tenga. ⁹ Jari, inun sa haut na ulah isa deya Alatalla, ada naan murunsia sa misah here." ¹⁰ Udihie, hang wuang lewu, kawan murid-Ni nunti ma Hanye hal yiru. ¹¹ Balalu, Hanye kaeau ma here, "Hie sa nyarak daranganni balalu pa'adu andri wawei lain, hanye ngulah zina ma daranganni. ¹² Dami matue wawei nyarak matue upuni, balalu pa'adu andri upu lain, hanye ngulah zina." Yesus Ngabarakat Kawan Iya ¹³ Andri, Here ngenei kawan iya rumis ma Yesus himpan Hanye negei kawan iya yiru, kude kawan murid-Ni nguring here. ¹⁴ Dami, hantek Yesus kadinung, Hanye sangit balalu kaeau ma kawan murid-Ni, "Elahni kawan iya rumis ru hawi nunung Aku ada ngahalang here deya kerajaan Alatalla wat kawan ulun sa kala here. ¹⁵ Aku bapaner andri sabujurni ma hanyu, hie pun sa puang nyambut kerajaan Alatalla kala isakaulun iya, puang sagar masuk ma wuangni." ¹⁶ Udihie, Yesus ngempu kawan iya yiru, balalu nganak tangan-Ni hang amau here nelang ngabarakat here. Ulun Sugih sa Puang hakun Uma Yesus ¹⁷ Balalu, hantek Yesus rahat ka'i tulak, naan isakaulun nempat nunung Hanye nelang basujud hanye nunti, "'Guru sa maeh, inun sa harus aku ulah himpan kaiyuh warisan pamelum salawahni? ¹⁸ Balalu, Yesus kaeau ma hanye, "Deyainun hanyu nerau Aku maeh? Mahi isakaulun pun sa maeh, kasuali Alatalla ra'erai. ¹⁹ Hanyu haut karasa kawan parintah: 'Ada munu, ada bazina, ada ngalat, ada ipusu, ada manipu, nahormati ambah andri inehnu,'' ²⁰ Udihie, ulun yiru kaeau ma Hanye, "Guru, aku haut ngunu katuluh yiru hingka aku lagi rumis.'' ²¹ Kude, Yesus nantau ma upu bujang yiru nelang ma'ahi hanye, balalu kaeau, "Isa hal sa kurang teka hanyu. Tulak balalu ari katuluh inun sa naan witu hanyu, ami ma ulun sa miskin, dagana yiru hanyu sagar ampun harata hang surga. Udihie, ma'inaleh uma Aku." ²² Kude, antuhan yiru ngulah hanye mahanang atei balalu hanye tulak deya hanye rama harata banani. ²³ Udihie, Yesus nantau ma kuliling balalu kaeau ma kawan murid-Ni, "Tu'u mahadin here sa sugih masuk ma Kerajaan Alatalla!" ²⁴ Kawan murid-Ni emah nyanrengei eau-Ni yiru. Kude, Yesus kaeau lagi ma here, "Hi kawan iya, tu'u mahadin neu masuk ma kerajaan Alatalla! ²⁵ Labih mara'oh isakaukui unta masuk itah luang jarum teka ulun sugih masuk ma kerajaan Alatalla." ²⁶ Kawan murid-Ni samagin emah balalu kaeau isa andri sa lain, "Amun ka'yiru, hie sa iyuh na salamatkan?" ²⁷ Yesus nantau ma here balalu kaeau, ma murunsia yiru puang mungkin, kude puang ma Alatalla. Deya, katuluh hal mungkin ma Alatalla." Upa Uma Yesus ²⁸ Hi Petrus balalu kaeau ma Yesus, " Dinung, kami haut nanan katuluh hal balalu uma Hanyu!" ²⁹ Yesus kaeau, "Aku ngeau sabujurni ma hanyu, mahi isakaulun sa haut nanan lewuni, atawa kawan pulaksanai kawan upu, atawa kawan pulaksanai kawan wawei, atawa ineh atawa ambah, atawa kawan iya, atawa kawan ume'ni dagana Aku andri deya Injil, ³⁰ sa hang wayah yina puang sagar narime jatuh kali lipat-kawan lewu, andri kawan pulaksanai kawan upu, andri kawan pulaksanai kawan wawei, andri kawan ineh, andri kawan iya, andri kawan ume, andri kararaen; andri hang wayah sa sagar hawi die, pamelum salawahni. ³¹ Kude yiru, rama ulun sa badahulu sagar jari sa handrian, balalu sa handrian sagar jari sa awalni." Yesus Bapaner Lagi hal Kapateian-Ni ³² Here rahat wuang kiaan ma Yerusalem , Yesus takia hang muka here. Balalu, here kaingkam wauh, kawan ulun sa ngiring Hanye kaingkam takut pada. Balalu, Yesus ba'asa ngenei karueh walas murid-Ni, Hanye mulai iwara ma here inun sa sagar terjadi ma-Hanye, ³³ eau-Ni, "Dinung, takam rahat mamai ma Yerusalem balalu Iya Murunsia sagar nasarah ma kawan Imam kepala andri kawan ahli Taurat. Here sagar nukum Hanye hampe matei balalu nyarah Hanye ma kawan ulun sa lain ulun Yahudi. ³⁴ Here sagar ngahina Hanye, andri nura Hanye, andri ngakasah Hanye, andri munu Hanye. Kude, dami haut kateu andrauni, Hanye sagar amuan." Permohonan hi Yakobus andri hi Yohanes ³⁵ Udihie, hi Yakobus andri hi Yohanes, kawan iya hi Zebedeus, hawi ma Yesus andri kaeau, "Guru, kami sini Hanyu ngunu inun sa sagar kami laku." ³⁶ Balalu, Yesus kaeau ma here, " Inun sa hanyu sini himpan Aku karaja pakai hanyu?" ³⁷ Here kaeau ma Hanye, "Kami laku isakaulun hingka kami rueh na maharung hang tuhi kawan-Nu andri sa isakaulun hang tuhi kawi-Nu, wuang Pihantean-Hanyu." ³⁸ Kude, Yesus kaeau ma here, "Hanyu puang kataru inun sa nalaku hanyu. Sanggupkah hanyu ngu'ut teka galas sa musti Aku u'ut atawa napandrus andri pandrusan sa na tuju ma Aku?" ³⁹ Here kaeau ma Hanye, "Kami sanggup" Udihie Yesus kaeau ma here, "Galas sa Aku u'ut dasar hanyu u'ut pada, nelang hanyu sagar napandrus andri pandrusan sa napandrus ma Aku. ⁴⁰ Kude, sa sagar maharung hang tuhi kawan Ku andri tuhi kawiKu, puang hak Aku neu ngamini, kude uneng yiru ialah pakai here sa haut napersiapkan." ⁴¹ Nyandrengei yiru, sapuluh murid sa lain jari sangit ma hi Yakobus andri hi Yohanes. ⁴² Balalu, Yesus nerau here nelang kaeau, ''Hanyu haut karasa here sa na parasaya marintah kawan ulun sa lain Yahudi ngulah saolah-olah bakuasa amau here. Andri, kawan petinggi here makai kuasani amau here. ⁴³ Kude, puang saharusni hang penah naun. Kalahie pada, hie pun sa sini jari hante hingka penah hanyu, harus jari walahnu, ⁴⁴ andri hie pun sa sini jari sa awalni hang penah hanyu, harus jari walah hingka katuluhni. ⁴⁵ Deya, Iya Murunsia pun hawi puang neu nalayani, kude pakai melayani, andri pakai ngami pamelum-Ni nampan pakai newuh rama ulun." Yesus Nyamare hi Bartimeus sa Pehe ⁴⁶ Udihie, here hampe hang Yeriko. Hantek Yesus nanan Yeriko sindrah andri kawan murid-Ni andri ulun rama, isakaulun pengemis pehe bangaran hi Bartolomeus, iya Timeus, rahat maharung hang iring lalan. ⁴⁷ Hantek hanye nyandregei naan Yesus teka Nazaret, hanye pun mulai nantiak andri kaeau, "Yesus, Iya Daud, aku laku ahi-Nu!" ⁴⁸ Balalu, rama ulun nguring hanye nelang nunyu hanye benyem. Kude, hanye samakin nantiak, "Iya Daud, aku laku ahi Hanyu!" ⁴⁹ Balalu, Yesus tarie andri kaeau, "herau hanye." here pada nerau ulun pehe ru andri kaeau ma hanye, "Kuatleh ateinu! Mindrileh, Hanye nerau hanyu." ⁵⁰ Nelang ngalapas lamani, ulun pehe ru mindri balalu hawi nunung Yesus. ⁵¹ Balalu, Yesus kaeau ma hanye, "Inun sa kahamen hanyu himpan Aku ngarajani?" Ulun pehe ru nyangai, ''Rabi, aku sini ta'u kadinung." ⁵² Balalu, Yesus kaeau ma hanye, "Tulakleh. Imannu haut nyamare hanyu." Hantek yiru jua, hanye kaiyuh kadinung, balalu hanye ngiring Yesus eleh.