Pitu Ruti neu labih teka Epat Ribu Ulun ¹ Hang isa kaandrau, hantek rama ulun bakumpul nelang pas mahi inun-inun sa ta'u pakai nakuta, Yesus nerau kawan murid-Ni andri kaeau ma here, ² "Aku ma'ahi ma ulun rama yiru deya hampe wayah iti here haut telu andrau baya takam, nelang mahi inun-inun pakai nakuta. Kude, ³ dami Aku nunyu here mudi ma lewu here ganyah kalauan, here ta'u pisa wuang perjalanan deya papire teka here tumpukni lawit." ⁴ Balalu, kawan murid-Ni nyangai Hanye, "Hie ulun sa ta'u ngami here ruti hang uneng suni sameh yina?" ⁵ Balalu, Yesus nunti ma here, "Pire ruti sa naan witu hanyu?" Here Nyangai, "Pitu roti." ⁶ Udihie, Yesus marintah ulun rama yiru maharung hang tane, balalu Hanye ngalap pitu ruti yiru, nelang ngantuh syukur, balalu Hanye ngapuhi'ni udiyiru ngami ma kawan murid-Ni pakai nasurung ma ulun rama. Here pada nyurungni ma ulun rama. ⁷ Andri, kawan murid pada naan butit kenah sa rumis. Udi ngantuh syukur ma kenah ru, Yesus nunyu kawan murid-Ni mambagi kawan kenah ru ma ulun rama. ⁸ Ulun rama ru kuman hampe wising, balalu here nyimuh le'e ruti yiru pitu karanyang penu. ⁹ Kakira naan epat ribu ulun sa kuman. Udi yiru, Yesus nunyu here tulak. ¹⁰ Balalu Yesus hancap masuk ma jukung sindrah kawan murid-Ni hampe hawi ma daerah Dalmanuta. Yesus Nalaku Nutui Siri Teka Surga ¹¹ Udihie, kawan ulun Farisi hawi basual andri Yesus, nelang nunyu Yesus nutui siri hingka surga, pakai mensuba Hanye. ¹² Balalu Yesus mihewuk amau wuang Roh-Ni, Hanye kaeau, "Wahinun generasi iti ngantara siri? Aku iwara sa tu'uni ma hanyu, mahi isa pun siri sa sagar na ami ma generasi yina." ¹³ Udihie, Yesus nanan here, mulek masuk ma wuang jukung, tulak ma sabarang. Ragi Ulun Farisi andri Ragi Herodes ¹⁴ Kawan murid puang kaitung ngenei ruti, ekat naan isa ruti ai wuang jukung. ¹⁵ Balalu, Yesus ipesen ma here, "Basiap! andri ati-ati naun nadap ragi kawan ulun Farisi andri ragi Herodes." ¹⁶ Balalu here mulai ipakat isa andri sa lain soal here sa mahi ruti. ¹⁷ Udi, karasa hal yiru, Yesus kaeau ma here, "Deya inun hanyu bapaner hal hanyu sa puang ngenei ruti? Inun hanyu hu'an kataru jua? Inun atei-nu haut mape? ¹⁸ Inun sa hanyu naan mate, kude puang kadinung? Andri naan silu, kude puang karengei? puang kaitung sa hanyu, ¹⁹ hantek Aku ngabagi lime ruti pakai lime ribu ulun, pire naan karanyang sa baisi penu andri le'e ruti sa nakumpul hanyu?" Here nyangai, "Rueh walas karanyanf." ²⁰ Nelang, hantek pitu ruti pakai epat ribu ulun yiru, pire karanyang sa penu andri le'e ruti sa nakumpul hanyu?" Here nyangai, "Pitu karanyang." ²¹ Balalu, Hanye kaeau ma here, "Inunsah hanyu masih puang kataru?" Yesus Nyamare Ulun Pehe hang Betsaida ²² Udihie, Yesus andri kawan murid-Ni hawi hang Betsaida. Balalu, papire ulun ngenei isakaulun pehe nampan Yesus negei-ni. ²³ Yesus pada negei tangan ulun pehe yiru balalu ngenei-ni ma luar tumpuk. Udihie, Yesus nura mate ulun pehe ru balalu nganak tangan-Ni hang amau hanye. Hanye nunti ma ulun pehe ru, "Inun hanyu haut ta'u kadinung?" ²⁴ Balalu, ulun yiru nantau ma amau andri kaeau, ''Aku kadinung kawan ulun, kude here ialah kawan kakau sa ganyah takia." ²⁵ Udiyiru, Yesus nganak tangan-Ni lagi hang amau mate ulun yiru, balalu ulun yiru nguka mate-ni, pangini'an-ni ware, balalu hanye ta'u jalas nantau inun-inun. ²⁶ Udihie, Yesus nunyu hanye mudi ma lewu-ni nelang kaeau, "Ada masuk ma wuang tumpuk." Yesus adalah Kristus ²⁷ Udiyiru, Yesus tulak, sindrah kawan murid-Ni, ma kawan desa hang Kaisarea Filipi. Hang penah kia'an, Yesus nunti ma kawan murid-Ni andri kaeau ma here, "Eau kawan ulun, hie Aku na?" ²⁸ Here nyangai, "Yohanes Pembabtis, naan sa kaeau Elia, andri sa lain ngantuh isakaulun hang helang bilangan kawan nabi." ²⁹ Udihie, Yesus nunti ma here, ''Kude, manurut hanyu, hie Aku yina?" Petrus nyangai-Ni, "Hanyu adalah Kristus." ³⁰ Balalu, Yesus marintah here nampan ada iwara ma hie-hie hal tenga-Ni. Yesus Maiwara hal Kararaen-Ni ³¹ Udihie, Yesus mulai ngajar kawan murid-Ni hal Iya Murunsia harus rara rama hal balalu na tolak deya kawan tua Yahudi, kawan imam kepala, kawan ahli Taurat, balalu nawunu, balalu udi andrau katelu Hanye ulek amuan. ³² Yesus ngantuh hal yina tarang-tarangan. Deya iru, hi Petrus narik Yesus ma wading andri nagur Hanye. ³³ Kude, nelang nantau kawan murid-Ni, Yesus nagur hi Petrus balalu kaeau, "Mahulu teka Aku, hi Iblis! deya, hanyu puang mamikir kawan perkara Alatalla, kude kawan perkara murunsia." ³⁴ Udi yiru, Yesus nerau kawan ulun rama, andri kawan murid-Ni, nelang kaeau ma here, "Dami isakaulun sini uma Aku, hanye harus menyangkal tenga-ni ra'erai, mamikul salib-ni, balalu uma Aku. ³⁵ Deya, hie hie sa sini nyalamat amirue-ni sagar wawai amirue-ni. Kude, hie hie sa wawai amirue-ni deya Aku andri Injil sagar salamat. ³⁶ Deya, inun untungni ulun kaiyuh katuluh dunia, kude wawai amirue-ni? ³⁷ Inun sa ta'u ulun ami pakai newuh amirue-ni? ³⁸ Deya, hie hie sa mangan daya Aku andri firman-Ku hang generasi sa puang ngunu andri badosa yina, Kalahie pada Iya Murunsia mangan ngaku ulun yiru hantek Hanye hawi wuang pihante Ambah-Ni sindrah kawan malaikat sa barasis."