Hukum Alatalla andri Tradisi Murunsia ¹ Balalu, bakumpulah kawan ulun Farisi nunung Yesus sindrah andri papire ahli Taurat sa hawi teka Yerusalem. ² Andri, here kadinung papire murid Yesus kuman ruti makai tangan najis, hanye tangan sa puang nabui. ³ Deya, kawan ulun Farisi andri katuluh ulun Yahudi puang sagar kuman amun tangan here puang nabui hampe gi amau tangani deya yiru haut tradisi mulai hingka nini muyang here. ⁴ Pada, dami kawan ulun Yahudi yiru hawi hingka pulau ulun rama, here puang sagar kuman sa hu'an mu'i tanganni. Nelang masih rama lagi tradisi sa lainni sa masih napakai, kala ngapandrus kawan sangkir, kawan kendi, andri kawan bejana tamaga. ⁵ Udihie, kawan ulun Farisi andri kawan ahli Taurat nunti ma Yesus, "Dayainun kawan murid-Nu puang welum ngalut tradisi nini muyang, kude malah kuman ruti andri tangan najis?" ⁶ Yesus kaeau ma here, "Yesaya banubuat dasar bujur hal hanyu sa munafik, ialah kala naan sa nasurat: 'Bangsa iti nawat hurmat ma Aku andri wawa here, kude atei here lawit teka Aku. ⁷ Here parasuma manyambah Aku deya here ngajar ajaran sa ulah deya murunsia." Yesaya 29:13 ⁸ Nelang angtatahu andri sa nahuyu Alatalla, hanyu ngunu negei tradisi murunsia." ⁹ Balalu, Yesus pada kaeau ma here. "Andri cerdik hanyu manulak sa nahuyu Alatalla hampan kaiyuh batahan makai tradisinu raerai. ¹⁰ Deya, Musa kaeau, ''Hormati amahnu andri inehnu', andri, 'Hie pun sa mangutuk amahni atawa inehni harus nahukum matei.' ¹¹ Kude, hanyu kaeau amun isakaulun kaeau ma amahni atawa inehni, 'Inun-inun kauntungan sa sagar hanyu iyuh teka aku adalah kurban, yaitu persembahan,' ¹² balalu hanyu puang lagi ngijin hanye ngulah inun-inun pakai amahni atawa inehni, ¹³ dagana yiru hanyu haut ngulah firman Alahtalla puang napakai deya tradisinu sa haut turun-temurun. Nelang rama hal lagi sa hanyu ulah sameh yiru." ¹⁴ Udihie, Yesus nerau lagi katuluh ulun balalu kaeau ma here, "Rengei Aku, naun katuluh, andri kataru naun. ¹⁵ Mahi isa pun hingka luar murunsia sa masuk ma wuang tengani iyuh ngulahni najis, kude kawan hal sa kaluar teka murunsia sa ngulahni najis." ¹⁶ "Amun isakaulun ampun silu pakai nyanrengei, elahni hanye nyandrengei!" ¹⁷ Balalu, hantek Yesus masuk ma lewu andri nanan kawan ulun yiru, kawan murid-Ni nunti ma-Hanye hal paribasa yiru. ¹⁸ Balalu, Hanye kaeau ma here, '''Inun hanyu masih puang kataru? Angsah hanyu karasa bahwa inun-inun sa hingka luar masuk ma wuang murunsia puang ta'u ngulahni najis? ¹⁹ Deya, sa masuk yiru puang ma wuang ateini, kude ma wuntungni, udihie kaluar ma wuang jamban." (Iru artini, Yesus nyantarang bahwa katuluh makanan halal.) ²⁰ Balalu Hanye kaeau, "Inun sa kaluar hingka murunsialah sa ngulah hanye najis. ²¹ Deya, hingka wuang, teka atei murunsia, timul kawan pikiran raat, kawan dosa seksual, ngalat, munu, ²² bajinah, sarakah, ngulah sa raat, ipusu, hawa nafsu, bahiri, fitnah, sakah, andri lunga. ²³ Katuluh sa puang maeh yiru hawi teka wuang atei murunsia, irulah sa ngulah hanye najis." Iman Isakaulun Wawei Siro-Fenisia ²⁴ Hingka uneng yiru, Yesus amuan balalu tulak ma wilayah Tirus andri Sidon. Palus, Hanye masuk ma isa lewu nelang pa hakun naan isakaulun pun sa karasa, kude Hanye puang ta'u luput hingka panginian ulun. ²⁵ Dami hantek nyandrengei hal Yesus, isakaulun wawei sa iya waweini karasukan roh najiis hawi andri sujud hang pe'e Yesus. ²⁶ Wawei yiru ulun Yunani, lahir hang Siro-Fenisia. Hanye mamohon ma Yesus hampan ngunur setan yiru kaluar hingka iyani. ²⁷ Udihie, Yesus kaeau ma wawei yiru, "Elahni kawan iya dahulu sa wising. Deya, puang maeh ngalap ruti ampun kawan iya balalu medakni ma kawan antahu." ²⁸ Kude yiru, wawei yiru nyangai andri kaeau ma Yesus, "Tu'u, Tuhan. Kude, kawan antahu sa naan hang ime meja pun kuman le'e kawan iya yiru." ²⁹ Balalu, Yesus kaeau ma wawei yiru, "Deya hanyu ngantuh kairu, hanyu ta'u tulak. Setan yiru haut nanan iyanu." ³⁰ Udihie, wawei yiru mulek ma lewu balalu panalu iyani ganyah mangkading hang uneng mandre, balalu setan yiru haut tulak. Ulun sa marengen Nasamare ³¹ Udihie, Yesus kaluar lagi teka wilayah Tirus balalu tulak itah Sidon nuju ma danau Galilea, hang wilayah Dekapolis. ³² Balalu, here ngenei Yesus isakaulun sa marengen nelang mahadin bapaner. Here mamohon ma Yesus nampan nganak tangan-Ni hang amau ulun yiru. ³³ Udihie, Yesus ngenei ulun yiru tulak hingka kumpulan ulun rama. Hanye na'ampasuk jari-Ni ma wuang silu ulun yiru, udi nua, Hanye negei lela ulun yiru. ³⁴ Balalu, Yesus nantau ma amau langit, Hanye narik hewuk amau andri kaeau, "Efata!", artini "Tawukalah!" ³⁵ Hantek yiru jua, silu ulun yiru tawuka, hurukan hang lelani talapas, balalu hanye ta'u jalas bapaner. ³⁶ Balalu, Yesus nguring here ngesah kajadian yiru ma hie-hie. Kude yiru, samakin hanye nguring here, samakin here nyiarni. ³⁷ Here wauh tatu'u andri kaeau, "'Hanye haut ngulah rama hal sa maeh. Hanye sika ta'u nyamare ulun sa marengen jari nyandrengei andri ulun sa muna bapaner."