¹ "Ingat amun naun ngaraja kawajiban agama naun hang hadapan murunsia, ada ngaheng nampan nadinung ulun. Amun kala yiru, naun puang sagar narime upa teka Ambahnu hang surga. ² Daya yiru, amun naun ngami sadakah, ada iwawara sameh kala kawan ulun sa bapura-pura hang kawan lewu sumbayang anri hang lanan nampan natawat da ulun lain. Aku iwara sa tuuni ma naun amun here haut narime upani. ³ Kude, amun naun ngami sadakah, ada hampe tangannu sa kawi karasa inun sa nakaraja tangannu sa kawan, ⁴ nampan sadakahnu yiru puang usah rasa ulun balalu Ambahnu sa kadinung sadakahnu sa suni-suni yiru ngami upani ma hanyu." Ajaran hal badoa ⁵ Balalu, amun naun badoa, ada kala kawan ulun sa bapura-pura daya here ru sindi minri nelang badoa hang kawan lewu sumbayang anri hang kawan tumpa lalan nampan nadinung ulun. Aku iwara sa tuuni ma naun, here haut narime upani. ⁶ Kude, amun naun badoa, asuk ma wuang kamar palus tutup wanawang, balalu badoa ma Ambahnu sa puang dinung yiru, Ambahnu sa kadinung pagawiannu sa suni-suni yiru sagar ngami upani ma hanyu. ⁷ Amun naun badoa, ada menye-menye kakulek kala wangun kawan ulun sa puang kataru Alatalla, daya here minda anri doa sa ambau pilakuan here sagar nasanrengei. ⁸ Daya yiru, ada kala here daya Ambahnu haut karasa inun sa naparlu daya naun kapihuan naun ilaku ma Hanye. ⁹ Jari badoaleh kalayiti, 'Ambah kami sa hang surga: Hanyu Alatalla sa tungkan, Hanyu sa nasambah nelang nahormat. ¹⁰ Hanyu Raja kami. Wuah Hanyu marentah hang ambau tane, nelang kabahumennu ngalut nuu kala hang surga. ¹¹ Ami ma kami, hang anrau yiti kutaen sa na parlu daya kami. ¹² Ampun kami teka kahalaen kami, kala kami haut ngampun ulun sukat bakahalaen anri kami. ¹³ Ada maladar kami kawawian kaparisayaan tawuk kami napurija, kude sanepah kami teka kuasa sa jahat. Hanyu Raja sa bakuasa nelang mulia hampe kalalawahni. Amen." ¹⁴ Amun naun ngampun ulun sa bakahalaen ma naun, Ambahnu sa hang surga pada sagar ngampun kahalaen naun. ¹⁵ Kude, amun naun puang ngampun kahalaen ulun lain, Ambahnu pada puang sagar ngampun kahalaen naun. Hal bapuasa ¹⁶ Amun naun bapuasa, ada wangun uruwawa naun raruuk kala ulun sa bapura-pura daya here ngubah wangun uruwawani nampan katuluh ulun karasa here bapuasa. Aku iwara sa tuuni ma naun amun here haut narime upani ¹⁷ Kude, amun naun bapuasa, ami minyak wulunu nelang saawui uruwawanu ¹⁸ nampan puang uweng sa karasa naun bapuasa, kasuali Ambahnu sa puang dinung yiru, Ambahnu sa kadinung pagawiannu sa suni-suni yiru sagar ngami upani ma hanyu. Ware ngumpul harata hang surga ¹⁹ "Ada ngumpul harata ma diri naun hang dunia, uneng kametei anri tagar tau nanrusakni, kamulek uneng maling tau hawi ngalatni. ²⁰ Kabalikanni, kumpulleh harata ma diri naun hang surga, uneng kametei anri tagar puang tau nanrusakni, kamulek uneng maling puang tau hawi ngalatni. ²¹ daya hang awe unengan harata naun, hang yiru pada atei naun." ²² "Mate yiru palita ma tenga. Jari amun matenu maeh, maraai katuluh tenganu. ²³ Kude, amun matenu jahat, maieng katuluh tenganu." Jari, amun palita hang wuang tenganu maieng, maka tuu tamam piieng yiru. ²⁴ "Puang uweng sunah erang kaulun tau malayani rueh tuan daya hanye sagar muar anri tuan sa isa balalu sinta anri tuan sa lain, atawa hanye sagar satia ma tuan sa isa balalu maremeh tuan sa lain. Naun puang tau malayani ma Alatalla nelang ma harata banda pada." Ada naun adingan ²⁵ "Daya yiru Aku iwara ma naun, ada adingan anri pamelum naun, inun sa sagar nakuta atawa inun sa sagar na uut. Kala hie pada anri tenga naun, inun sa sagar napakai naun. Angneh pamelum diwi teka kutaen, nelang tenga diwi teka pakaian? ²⁶ Dinung naun kawan wurung hang langit sa angaan miamulean, puang masi, nelang puang pada ngumpul hasil miamulean mawuang wirang, kude Ambahnu sa hang surga ngami here kuman. Angneh naun diwi baharaga teka here? ²⁷ Hiekah teka naun sa daya adingan tau ngampambau umurni sunah hena butit? ²⁸ Dainun naun adingan neu pakaian? Dinung kawan wunge bakung hang lasi, kalaawe here welum, wunge yiru puang bagawi, nelang puang nawai, ²⁹ kude Aku iwara ma naun amun hi Salomo sa tamam panatau puang makai pakaian kala kaeh kawan wunge yiru. ³⁰ Jari, amun rikut hang lasi, sa naan anrau yina kaiyat uni natutung ma apui, Alatalla mahias rikut kalayiru kaehni, duanni naun, kawan ulun sa puang parisaya? ³¹ Daya yiru, ada naun adingan nelang kaeau, 'Inun sa sagar nakuta takam?', atawa "Inun sa sagar nauut takam?', atawa 'Inun sa sagar napakai takam?' ³² Daya kawan bangsa lain saratang ngantara hal yiru padahal Ambahnu sa hang surga karasa naun parlu katuluh yiru. ³³ Jari, angkali dahulu Karajaan anri kabanaran-Ni, balalu katuluhni sagar natambah ma naun. ³⁴ Daya gana yiru, ada naun adingan neu anrau kauni daya kauni haut naan kasusahenni raerai. Kasusahen anrau yiti sukupleh pakai anrau yiti."