¹ Tawuk kadinung kawan ulun rama yiru, Yesus mambai ma ambau bukit. Udi Hanye maharung, kawan murid-Ni hawi nunung Hanye. ² Balalu Hanye mulai ngajar here, eau-Ni, ³ "Tuu sanang marauh ulun sa mahi harata banda hang hadapan Alatalla daya here sa ampun Karajaan Surga. ⁴ Tuu sanang marauh ulun sa mahanang atei daya here sagar narariu. ⁵ Tuu sanang marauh ulun sa maeh atei daya here sagar ampun dunia. ⁶ Tuu sanang marauh ulun sa kajuju nelang kakan ranu daya kabanaran daya here sagar na ampi puas. ⁷ Tuu sanang marauh ulun sa miahi ulun lain daya here sagar narime pikaeh atei. ⁸ Tuu sanang marauh ulun sa barasis atei daya here sagar kadinung Alatalla. ⁹ Tuu sanang marauh ulun sa nginsing damai daya here sagar na herau anak Alatalla ¹⁰ Tuu sanang marauh ulun sa wuah kahangen daya kabanaran here sagar ampun Karajaan Surga. ¹¹ Tuu sanang marauh naun amun ulun ngampihala nelang ngahanangen nelang ngapuntaka naun daya gana Aku. ¹² Arai mihewuleh daya hante upa naun hang surga, daya kala yiru pada here ngahanangen kawan nabi kapihuan naun." Rangi andri Piraai Dunia ¹³ "Naun yiri rangi dunia, kude dami rangi yiru jari mapahe, anri inun tau ngampi erangni kamulek? Puang uweng gunani lagi salain naumpe nelang na rarah ulun." ¹⁴ Naun yiri piraai dunia. Tumpuk sa naan hang ambau bukit puang iyuh nadina. ¹⁵ Puang uweng ulun nuntun palita balalu nutup ni hang kapit gantang, himat naelah ni hang ambau palita nampan tau ngampi raai katuluh sa naan hang wuang lewu. ¹⁶ Kalayiru pada raainu basahaya nampan ulun lain tau kadinung ulah gawinu sa maeh balalu nawat Ambahnu sa hang surga." Pangganapan Hukum Moses anri Kitab Kawan Nabi ¹⁷ "Ada minda Aku hawi neu nyamawai Hukum Moses atawa kitab kawan rasul. Aku hawi puang nampan nyamawaini kude ngampi ganapni. ¹⁸ Aku iwara satuuni ma naun, hampe langit anri bumi haut mitah, puang sunah isa huruf sa wawai teka Hukum Moses amun huan tulus katantuluhni. ¹⁹ Daya yiru, hie sa ngampi wawai isa teka kawan parentah sa pangarumis yina balalu ngajar kawan ulun lain ngulah kala yiru pada, hanye sagar jari sa panga rumisni hang wuang Karajaan Surga. Kude hie sa nampalus kawan parentah yiru balalu ngajar ma kawan ulun lain sagar jari sa panga hante hang wuang Karajaan Surga. ²⁰ Jari Aku iwara ma naun amun kabanaran naun puang labis teka kawan guru agama anri kawan ulun Farisi, naun puang sagar masuk ma wuang Karajaan Surga. Hal ulun sa sangit anri pulaksanaini ²¹ Naun haut karengei lengan ajar ma kawan datu nini takam, 'Ada munu ulun,' anri 'Hie sa munu ulun patut na enei ma pangadilan.' ²² Kude, Aku kaeau ma naun, hie sa sangit anri pulaksanaini raerai patut na hukum, daya hie sa kaeau ma pulaksanaini, 'hanyu lunga,' patut na adili, nelang hie sa ngeau, 'hanyu bungul,' patut naumpe mawuang apui naraka. ²³ Daya sabab yiru, amun hanyu nyarah pangamiannu hang ambau mezbah, balalu hanyu kaitung pulaksanainu naan kasangiten anri hanyu, ²⁴ tanan dulu pangamiannu yiru hang hadapan mezbah, balalu tulak lepuh badamai anri pulaksanainu yiru, udi yiru wau hanyu mulek ngami pangamiannu ma Alatalla. ²⁵ rereu badamai anri ulun sa nawa naun katimpulu naun magun hang isa jalanan anri hanye, ada hampe ulun sa nawa naun nyarah naun ma hakim, balalu hakim yiru nyarah naun ma pagawaini, palus ngampasuk naun mawuang panjara. ²⁶ Aku iwara satuuni ma naun, naun puang sagar kaluar teka panjara kapihuan katuluh utang naun punah nabayar. Ulun sa idapa ²⁷ "Naun haut karengei lengan ajar kalayina, "Ada idapa.' ²⁸ Kude Aku kaeau ma naun kawan ulun sa ninung erang kaulun wawei anri kunuan idapa, ulun yiru haut idapa anri wawei yiru hang wuang ateini. ²⁹ Amun matenu tuhi kawan ngulah hanyu badosa, garuit palus umpe mate yiru. Daya, labis maeh hanyu kawawaian isa anggota tenganu teka katuluh tenganu naumpe mawuang naraka. ³⁰ Balalu, amun tangan nu tuhi kawan ngulah hanyu badosa, tetek palus umpe tangan yiru daya labis maeh hanyu kawawian isa anggota tenganu teka katuluh tenganu naumpe mawuang naraka. Aturan sarak ³¹ Haut naan lengan ajar kala yiti: Hie ulun sa nyansarak matueh waweini, harus ngami surat sarak ma hanye. ³² Kude, Aku kaeau ma naun hie sa nyansarak matueh waweini, kacuali daya idapa, hanye haut ngulah matueh weweini idapa. Udi yiru, hie sa narangan anri wawei sa haut sarak yiru, hanye idapa pada. Hal basumpah ³³ Hinra lagi, naun haut karengei sa naajar ma kawan datu nini takam, 'Ada budas basumpah palsu, kude tampalusleh sumpahnu yiru hang hadapan Tuhan. ³⁴ Kude, Aku kaeau anri naun: Ada budas naun basumpah, hau demi surga daya surga yiru padudusan Alatalla, ³⁵ atawa demi bumi daya bumi yiru pirarahan pee-Ni, atawa demi Yerusalem daya yiru tumpuk Raja Hante. ³⁶ Ada pada hanyu basumpah demi ulunu daya hanyu puang tau ngulah sunah erang kawila wulunu, mahilak atawa maintem. ³⁷ Eauleh, amun hiai antuh hiai, amun puang antuh puang, diwi teka yiru hawini teka sa jahat. Hal iwaleh ³⁸ Naun pada haut karengei lengan ajar kalayiti: 'Mate ganti mate, dipen ganti dipen.' ³⁹ Kude, aku kaeau ma naun ada ilawan sa jahat, kabalikanni hie sa nampar pahu nu tuhi kawan, ami pada ma hanye pahu nu tuhi kawi. ⁴⁰ Amun ulun mangadu naun nelang ngalap pamanu, ami pada ma hanye jubahnu. ⁴¹ Hie sa mamaksa naun takia isa mil, takialeh hampe rueh mil anri hanye. ⁴² Ami ma ulun sa ilaku teka hanyu nelang ada na tampik ulun sa hamen ngihau teka hanyu. Sinta anri musuhnu ⁴³ "Naun haut karengei lengan Alatalla kalayiti, ' Sinta ma kawan sasameh naun,' nelang 'Muar ma kawan musuhnu.' ⁴⁴ Kude, Aku kaeau ma naun, sinta ma katuluh kawan musuhnu nelang badoa ma kawan ulun sa ngahanangen naun, ⁴⁵ nampan naun tau jari kawan anak Ambahnu sa hang surga daya Hanye sa ngampi hulet mate anrau-Ni ma kawan ulun sa jahat nelang ma kawan ulun sa maeh, ngampi inau uran ma kawan ulun sa maeh nelang ma kawan ulun sa puang maeh. ⁴⁶ Daya amun naun ekat sinta anri ulun sa pada sinta anri naun, balalu inun upa sa na haba da naun? Angneh kawan tukang tagis pajak pada ngulah kala yiru? ⁴⁷ Balalu amun naun ngami salam ekat ma kawan pulaksanai naun, inun kalabihan parbuatan naun? Angneh kawan ulun sa puang kataru Alatalla pada ngulah kala yiru? ⁴⁸ Daya yiru, naun harus paruna, sameh kala Ambahnu hang surga sa pada paruna."