¹ Balalu Yesus nainsing daya Roh Alatalla ma padang gurun lepuh napurija daya Iblis. ² Hanye puang ikuta epat pulu anrau epat pulu malem, balalu Hanye kaingkam kalauan. ³ Iblis hawi palus kaeau ma Yesus, "Amun Hanyu Anak Alatalla, huyu kawan watu yiti jari rute." ⁴ Kude Hanye nuing, "Naan nasurat, puang ekat teka rute murunsia welum, kude teka satiap lengan sa naantuh daya Alatalla." Ulangan 8:3 ⁵ Udi hie, Iblis nginsing Hanye ma tumpuk barasis balalu ngelah Hanye hang tampuk Bait Alatalla, ⁶ balalu kaeau nengkan Hanye, "Amun Hanyu Anak Alatalla, itun ma imbe daya naan nasurat: " Alatalla sagar marentah kawan malekat-Ni neu nyambut Hanyu hang ambau tangan here nampan pee-Nu puang pahantuk ma watu." Mazmur 91:11-12 ⁷ Yesus nuing, "Naan pada nasurat, "Ada hanyu murija Tuhan Alatallanu." Ulangan 6:16 ⁸ Hinra lagi, Iblis nginsing Yesus ma ambau gunung sa panga ambau palus ngampi dinung ma Hanye katantuluh karajaan hang dunia anri kawan kasegahanni, ⁹ balalu kaeau ma Hanye, "Katantuluh yiti sagar amiku ma Hanyu, amun hanyu saujud nelang nyambah aku." ¹⁰ Yesus nuing, "Hulu hanyu Iblis! Naan nasurat, 'Hanyu ekat nyambah Tuhan Alatallanu, ekat ma Hanye hanyu saujud.'" Ulangan 6:13 ¹¹ Udi yiru, Iblis nanan Hanye, balalu kawan malekat hawi malayani Hanye. Yesus mamulai palayanan-Ni hang Galilea ¹² Dami Yesus karengei amun hi Yohanes haut najama, Hanye balalu basingkir ma Galilea. ¹³ Hanye nanan Nazareth balalu muneng hang Kapernaum, hang iring danau, hang perbatasan Zebulon anri Naftali, ¹⁴ nampan tulus inun sa na antuh mitah Nabi Yesaya: ¹⁵ "Tane Zebulon anri tane Naftali, lalan ma danau, hang sabarang Yordan, Galilea, wilayah kawan ulun sa puang Yahudi, ¹⁶ bangsa sa muneng hang wuang piiyeng ninung piraai sa hante, balalu here sa muneng hang wuang tumpuk pampatei, haut hulet piraai. Yesaya 9:1-2 ¹⁷ Hengka tawuk yiru, Yesus mulai bakhotbah, "Batobatlah daya Karajaan surga haut riet!" Yesus nerau epat murid-Ni sa partama ¹⁸ Tawuk Yesus takia hang iring danau Galilea, Hanye kadinung rueh ipulaksanai, hanye yiru hi Simon sa naherau Petrus anri hi Anderas, rahat malunta hang danau daya here rueh ru pangenah. ¹⁹ Hanye kaeau nengkan here, "Hayu umba Aku, Aku sagar ngajar naun malunta murunsia." ²⁰ Here palus nanan kawan lunta balalu umba Hanye. ²¹ Udi tulak teka yiru, Hanye ninung rueh ipulaksanai sa lain, hi Yakobus anak Zebedeus anri hi Yohanes, pulaksanaini. Here hang wuang jukung anri hi Zebedeus, ambah here, rahat naragu kawan lunta. Hanye nerau here pada. ²² Balalu here nanan jukung anri amah here, palus umba Yesus. Yesus ngajar palus nyamare ulun rama. ²³ Udi hie, Yesus bakaliling ma katuluh daerah Galilea, ngajar hang kawan Sinagoge, iwara Kabar Maeh Karajaan Alatalla, nelang nyamare kawan hene masam panyakit anri kawan hene masam kahanangen hang penah ulun rama. ²⁴ Balalu, kabar neu Hanye tasiar hampe ma katuluh Siria. Balalu here nginsing ma Hanye katuluh kawan ulun sa mekum sa ngaret kawan hene masam panyakit anri kahanangen, ulun sa karasukan setan, sa iweken, sa lumpuh, balalu Hanye nyamare here katuluh. ²⁵ Kawan ulun rama hawi teka Galilea, Dekapolis, Yerusalem, Yudea, teka subarang Yordan pada umba Hanye.