¹ Hantek yiru, hawilah hi Yohanes Pambaptis balalu bakhotbah hang padang gurun Yudea. ² Eauni, "Ware naun batobat daya Karajaan Surga haut riet." ³ Hanye na sa namaksud daya Nabi Yesaya hantek bapaner, "Naan lengan erang kaulun sa nanterau hang padang gurun 'Sadia lalan ma Tuhan, ulah lalanni mawitu'" Yesaya 40:3 ⁴ Hi Yohanes na makai pama teka wulu unta anri pihuruk pinggangni teka kudit . Kutaenni kawan angkalap anri riu wani jumpun. ⁵ Kawan ulun teka Yerusalem hawi nunung hanye, teka katuluh Yudea anri teka katuluh wilayah hang sakitar Yudea. ⁶ Balalu hi Yohanes mambaptis here hang hungei Yordan, nelang here mangaku kawan dosa here. ⁷ Kude, tawuk hi Yohanes kadinung hene kawan ulun Farisi anri Saduki hawi nampan nabaptis, hanye kaeau nengkan here, "Naun, katurunan tadung, hie sa iwara naun kaiyuh bakilah teka hukum Alatalla hang hanrian anrau? ⁸ Daya gana yiru, ami kawan wua sa sapantar anri partobatan, ⁹ ada naun minda tau kaeau hang wuang atei naun, 'Abraham yiru datu nini kami,' aku iwara ma naun teka kawan watu yiti Alatalla sanggup ngulah kawan anak ma hi Abraham! ¹⁰ Puang ekat yiru, taati, kapak haut tasadia hang wakat kawan kakau kayu, satiap kakau sa puang mua wua sa maeh nateweng palus naumpe ma wuang apui. ¹¹ Aku mambaptis naun makai ranu neu partobatan, kude Hanye sa sagar hawi udi aku labis bakuasa teka aku, nginsing sarumpah-Ni likan aku puang patut. Hanye sagar mambaptis naun makai Roh Alatalla anri apui. ¹² Dahuru haut naan hang tangan-Ni, Hanye sagar ngitap hampe barasis, udi hie Hanye sagar ngumpul parei ma wuang wirang. Kude, kawan ata sagar natutung mawuang apui sa puang tau pare." Yesus nabaptis daya Yohane Pambaptis ¹³ Udi hie, Yesus hawi teka Galilea ma hungei Yordan nunung hi Yohanes nampan nabaptis daya hi Yohanes. ¹⁴ Kude, hi Yohanes ngaheng nampik pilakuan-Ni balalu kaeau, "Aku sa saharusni nabaptis daya-Nu, dainun maka Hanyu sa hawi nunung aku?" ¹⁵ Kude Yesus nuing ma hanye, "Tampalusleh taati, daya anri kalayiru takam tau nampalus katuluh kabahumen Alatalla." Balalu, hi Yohanes nuu eau-Ni. ¹⁶ Udi nabaptis, Yesus palus kaluar teka wuang ranu, salenga udi yiru surga pauka balalu Hanye kadinung Roh Alatalla minau kasameh wurung dara minau ma ambau Hanye. ¹⁷ Balalu, naan rengei lengan teka surga sa kaeau, "Hanye yiti Anak-Ku sa nasintaKu, Hanye sa ngampi sanang atei-Ku."