¹ Udi Yesus nakayaan hang Betlehem, hang tane Yudea, jaman Raja Herodes, kawan ulun Majus teka timur hawi ma Yerusalem. ² Here nunti, "Hang awe Iya yiru, sa nakayaan, Raja ulun Yahudi? Daya kami haut kadinung bintang-Ni hang timur balalu kami hawi lepuh nyambah-Ni." ³ Dami Raja Herodes karengei habar yiru, hanye embah kalayiru pada anri katuluh ulun hang Yerusalem. ⁴ Balalu, hanye ngumpul katuluh imam kapala anri kawan ahli Taurat bangsa yiru. Hanye ngalasir katarangan teka here, hang awe unengan Yesus nakayaan. ⁵ Eau here ma hanye, "Hang Betlehem, wilayah Yudea, daya kalayiti sa naan natulis daya nabi: ⁶ "Hanyu Betlehem, hang tane Yehuda, hanyu budas puang sapanga rumis teka kawan panguasa hang tumpuk Yehuda, daya teka hanyu sagar hawi erang kaulun pamimpin sa sagar mamipin ulun pidian-Ku, Israel." Mikha 5:2 ⁷ Udi yiru, hi Herodes suni suni nerau kawan ulun Majus yiru, laku kapastian teka here hantek awe here kadinung bintang yiru. ⁸ Balalu, hanye nunyu here ma Betlehem, eauni ma here, "Hulu tulak andri salidik tatuu Iya yiru. Udi hie, amun naun haut kahaba Iya yiru, wara ma aku nampan aku pada tau tulak lepuh nyambah Hanye." ⁹ Udi karengei eau raja, balalu here tulak. Here kadinung lagi bintang sa suah wuah dinung here hang timur, bintang yiru badahulu teka here balalu tarie pas hang umung unengan Iya yiru. ¹⁰ Dami kadinung bintang yiru, tuu hante arai atei here. ¹¹ Dami here masuk mawuang lewu, here kadinung Iya yiru baya hi Maria, ineh-Ni, here ileku palus nyambah Iya yiru. Udi yiru, here nguka kawan unengan harata bana balalu nyarah amas, kamanyan anri mur ¹² Daya haut naampi itung hang wuang upi nampan here ada budas miulek nunung hi Herodes, jari here balalu mudi ma tumpuk here mitah lalan sa lain. Parintah nampan rari ma Mesir ¹³ Udi kawan ulun Majus yiru tulak, malekat Tuhan nantarang tenga ma hi Yusef hang wuang upi balalu kaeau, "Ambuan, insing Iya yiru baya ineh-Ni balalu rari basingkir ma Mesir. Unengleh hang yaru hampe Aku bapaner lagi ma hanyu daya hi Herodes ngunu ngantara Iya yiru nampan munu hanye." ¹⁴ Udi yiru, hi Yusef ambuan palus hang anrau malem yiru jua hanye tulak nginsing Iya yiru baya ineh-Ni rari basingkir ma Mesir, ¹⁵ balalu muneng hang yaru hampe hi Herodes matei nampan tulus inun sa haut na wara daya Tuhan itetei nabi: "Teka Mesir Aku nerau Anak-Ku." Hosea 11:1 Munu katuluh iya upu hang Betlehem ¹⁶ Udi yiru, dami hi Herodes karasa amun kawan ulun Majus yiru nipu hanye, haye sangit tatuu balalu marentah nampan munu katuluh kawan iya upu hang Betlehem anri hang katuluh wilayah sekitarni, sa baumur rueh taun ma ime, sasuai anri katarangan sa iyuhni teka kawan ulun Majus. ¹⁷ Jari, tulus inun sa haut nahampe daya Nabi Yeremia: ¹⁸ "Hang Rama naan rengei lengan kiak tungkau. Hi Rahel ngiak kawan anakni, nelang puang hakun narariu daya here haut nanan." Yeremia 31:5 Parentah nampan mulek ma Israel. ¹⁹ Kude, dami hi Heodes matei, malekat Tuhan nantarang tenga hang wuang upi ma hi Yusef hang Mesir, ²⁰ balalu keau, "Ambuan, insing Iya yiru anri ineh-Ni mudi ma Israel daya kawan ulun sa hamen munu Iya yiru haut matei." ²¹ Balalu, hanye ambuan palus nginsing Iya yiru anri ineh-Ni mulek ma Israel. ²² Kude, dami hanye karengei amun hi Arkhelaus sa mamarentah hang Yudea nganti hi Herodes, amahni, hi Yusef puang heei tulak ma yaru. Udi kahaba patitah mitah upi, hanye tulak ma wilayah Galilea ²³ Hi Yusef balalu muneng hang tumpuk sa bangaran Nazaret nampan tulus inun sa na tahampe kawan nabi, "Hanye sagar naantuh 'Ulun Nazaret'."