¹ "Ada mahakimi nampan naun ada nahakimi. ² Daya sameh kala wangun panghakiman sa napakai naun mahakimi, kalayiru pada naun sagar nahakimi, nelang ukuran sa napakai naun ma ulun lain,pada sagar naukur ma naun. ³ Daya inun naun kadinung huai hang mate pulaksanainu, kude baluk hang matenu raerai puang naun kadinung? ⁴ Atawa, kalaawe naun tau kaeau ma pulakasanainu, 'Elah aku ngaluar huai yiru teka matenu,' kude hang matenu raerai naan baluk? ⁵ Heh, naun ulun sa bapura-pura, ampi kaluar dahulu baluk yiru teka matenu, wau hanyu tau tarang kadinung balalu ngaluar huai teka mate pulaksanainu. ⁶ Ada ngami barang sa barasis ma kawan antahu, kamulek ada medak mutiara ma hadapan iwek nampan here puang ngagijak andri peeni palus iwaleng nyambar hanyu." Lakuleh, antaraleh nelang talitikleh ⁷ "Laku, maka naun sagar naami. Antara, maka naun sagar kahaba. Talitik, maka wanawang sagar nauka ma naun. ⁸ Daya, tiap ulun sa ilaku,sagar narime, ulun sa ngantara sagar kahaba, nelang ulun sa nalitik, wanawang sagar nauka. ⁹ Hie teka naun, dami anakni ilaku rute balalu ngami watu? ¹⁰ Atawa dami anakni ilaku kenah balalu ngami anipe? ¹¹ Jari,amun naun sa jahat kataru ngami sa maeh ma kawan anak naun, duanni Ambahnu sa hang surga, Hanye sagar ngami sa maeh ma ulun sa ilaku teka Hanye." Hukum sa panga utama ¹² "Katuluh sa nakabahumen naun natampalus ulun lain ma naun, kala yiru pada naun nampalus ma ulun lain, daya yiru isi Hukum Moses anri kitab kawan nabi." Lalan nuju ma pamelum ¹³ "Ware asuk mitah wanawang sa hipit daya wanawang anri lalan sa nuju ma pamparei laga nelang buka, rama ulun sa mitah lalan yiru. ¹⁴ Wanawang sa hipit nelang mahadin naasuk yiru lalan sa nginsing ulun ma pamelum, nelang duhu ulun sa kahaba lalan yiru." Paringatan ma kawan Nabi Palasu ¹⁵ "Hati-hati nadap kawan nabi palasu sa hawi nunung naun kala wangun babiri, kude sa tuuni here kala kawan sarigala sa buas. ¹⁶ Teka hasil pagawianni naun sagar kataru here. Taulah ulun kaiyuh kawan wua anggur teka jumpun sa barunrui nelang kawan wua ara teka lasi penu rikut? ¹⁷ Kala hie pada, teka kakau sa maeh mua wua sa maeh, kude kakau sa puang maeh mua wua sa puang maeh. ¹⁸ Kakau sa maeh puang tau mua wua sa puang maeh, kalahie pada kakau sa puang maeh puang tau mua wua sa maeh. ¹⁹ Satiap kakau sa puang mua wua sa maeh sagar nateweng palus natutung ma apui ²⁰ Jari, teka kawan wua ni naun tau kataru here. ²¹ Puang katuluh ulun sa nerau Aku, 'Tuhan, Tuhan,' sagar masuk ma Karajaan Surga, kude ekat ulun sa nampalus kabahumen Ambahku sa hang surga. ²² Hang anrau yiru, hene ulun sa kaeau nengkan Aku, 'Tuhan, Tuhan, angneh kami banubuat hang wuang ngaran-Nu, nelang ngusir kawan roh jahat hang wuang ngaran-Nu, nelang ngulah hene mukjizat hang wuang ngaran-Nu?' ²³ Kude Aku sagar nuing ma here, 'Aku puang suah kataru naun! Hulu tulak teka yiti, naun sa ngulah kajahaten!'" Karengei nelang nakaraja ²⁴ "Daya yiru, katuluh ulun sa nyanrengei lengan-Ku yiti palus ngarajani sameh kala ulun pintar marahati sa ngambuan lewuni hang ambau watu. ²⁵ Tawuk minau uran mehet nelang ranu baah hawi, nelang riwut barat nampuh lewu yiru, lewu yiru puang tumbang daya naambuan hang ambau watu. ²⁶ Kala yiru pada ma ulun sa nyanrengei lengan-Ku yina kude puang ngarajani sameh kala ulun budu sa ngambuan lewuni hang ambau karasik. ²⁷ Tawuk minau uran mehet nelang ranu baah hawi, nelang riwut barat nampuh lewu yiru, lewu yiru tumbang, nelang tuu hante panrusakni." ²⁸ Dami Yesus luput ngajar, kawan ulun rama yiru mandam karengei ajaran-Ni, ²⁹ daya Hanye ngajar here anri kuasa, puang kala kawan guru agama here.