¹ "Udiyiru, Karajaan Surga ialah rarapisan andri sapuluh wawei bujang sa ngenei palita-palitani tulak lepuh panalu pangantin upu. ² Dime hingka here ru lunga, balalu dime salainni pintar marahati. ³ Dami sa lunga ru ngenei palita-palitani, here puang ngenei minyak pakai wasi. ⁴ Kude, sa pintar- marahati here ngenei minyak hang wuang balangai halus baya palita-palita here. ⁵ Taati, dami pangantin upu unte hawini, here katuluh siruru balalu saandre. ⁶ Kude, hang penah malem naan lengan surak-layau alun, 'Pangantin upu hawi! Kaluar tahalu hanye!' ⁷ Udiyiru, katuluh kawan wawei bujang yiru amuan palus ngalap palita here. ⁸ Balalu, kawan sa lunga kaeau ma kawan sa pintar-marahati, 'Ami ma kami babutit minyak naun daya palita-palita kami ka'i pare.' ⁹ Kude, sa pintar-marahati nyangai 'Puang, puang akan sukup ma kami andri manaun. Samaehni, tulak naun matukang ari minyak balalu widi ma hanyu raerai.' ¹⁰ Ganyah here tulak lepuh midi, pangantin upu ru hawi, dan here sa siap, masuk sindrah andri hanye ma unengan pesta balalu wawanawang natutup. ¹¹ Udiyiru, hawi pada kawan wawei bujang salain balalu kaeau, 'Tuan, tuan! Uka wawanawang ma kami.' ¹² Kude, hanye nyangai, 'sabajurni aku kaeau manaun, aku puang kataru andri naun. ¹³ Daya sabab yiru, bajaga-jagalah daya naun puang karasa andrauni atawa jamni." ¹⁴ ''Sabab, Karajaan Surga sameh ialah erangkaulun sa akan tulak ma luar negeri, sa nerau kawan pelayanni balalu nyarah kawan hartani ma here. ¹⁵ Ma erangkaulun,hanye ngami 5 talenta. Ma salainni, 2 talenta, pada ma sa lainni lagi, 1 talenta. Masing masing sesuai kemampuan here. Udiyiru, hanye tulak. ¹⁶ Ulun sa narime 5 talenta ru langsung tulak, balalu menjalankan talenta yiru, balalu hanye kaiyuh hasil 5 talenta lagi. ¹⁷ Kalayiru pada ulun sa narime 2 talenta, hanye kaiuh 2 talenta lagi. ¹⁸ Kude, ulun sa narime 1 talenta yiru tulak, ngadi luwang hang tane, balalu nyimuh duit tuanni. ¹⁹ Lawah udiyiru, tuan hingka kawan pelayan yiru hawi balalu ngulah perhitungan andri here. ²⁰ Ulun sa haut narime 5 talenta yiru nadap dan ngenei 5 talenta lagi, eauni, 'Tuan, hanyu nyarah 5 talenta ma aku. Dinung, aku haut kaiuh 5 talenta lagi.' ²¹ Tuanni kaeau mahanye,'Maeh tuu, pelayan sa maeh nelang setia. Hanyu setia andri hal sa halus, aku akan ngenat hanyu hang hene hal, masuklah ma wuang sukacita tuannu.' ²² Pada, ulun sa narime 2 talenta pada nadap balalu kaeau,'Tuan, hanyu nyarah 2 talenta maaku. Dinung, aku haut kaiuh 2 talenta lagi.' ²³ Tuanni nyangai, 'Maeh tu'u, pelayan samaeh nelang setia. Hanyu setia andri hal sa halus, aku akan ngenat hanyu hang amau hene hal, masuklah hang wuang sukacita tuannu.' ²⁴ Udiyiru, ulun sa narime 1 talenta pada nadap balalu kaeau,'Tuan, aku karasa hanyu ulun sa kejam, masi hang uneng sa hanyu puang ngamule, balalu ngumpulkan hasil hang uneng sa hanyu puang mu'au. ²⁵ Daya yiru,aku takut, balalu tulak balalu nyimuh talentanu hang wuang tane. Dinung, hanyu narime inun sa jari miliknu.' ²⁶ Kude, tuanni nyangai andri kaeau mahanye, Hanyu pelayan sa jahat pada mawule! Hanyu karasa bahwa aku mutik hang uneng aku puang ngamule pada ngumpul hang uneng aku puang mu'au. ²⁷ Daya yiru, seharusni hanyu nyimuh duitku hang bank dami aku mulek, aku akan narime duitku mulek banya bungani. ²⁸ Alap 1 talenta yiru hingka hanye balalu ami ma hanye, sa baisi 10 talenta yiru. ²⁹ Sabab, setiap ulun sa naan baisi akan na ami lagi,balalu hanye akan berkelimpahan. Kude, hingka ulun sa puang uweng, bahkan inun sa naan watni akan na alap. ³⁰ Tumuk pelayan sa puang uweng riran yiru ma wuang piieng sa paling maieng. Hang uneng yiru akan naan kiak tungkau.''' ³¹ ''Dami Anak Murunsia hawi hangwuang kemuliaanNi, andri kawan malaekat baya andri-Hanye, balalu Hanye akan maharung hang tahta kemuliaan-Ni, balalu Hanye akan nampisah here isa andri sa lainni, ialah pakatik misah babiri tika kaming. ³³ Balalu, Hanye akan nganak babiri hang tuhi kawan-Ni balalu kaming hang tuhi kawi. ³⁴ Udiyiru Raja akan kaeau mahere hang tuhi kawanNi,'Mayati, hanyu sa naberkati daya Amah-Ku, warisi Karajaan sanasadiakan mahanyu hingka permulaan dunia. ³⁵ Daya ganyah Aku kalauan, hanyu ngami Aku kuman. Aku haus hanyu ngami Aku nguut ranu. Aku ulun asing, hanyu ngundang Aku masuk. ³⁶ Aku tabentur hanyu mamakai Aku pakaian. Aku mekum hanyu naua Aku. Aku hang penjara hanyu hawi ma-Aku.' ³⁷ Balalu, kawan ulun yiru akan nyangai Hanye,'Tuhan, hantekawe kami kadinung Hanyu kalauan balalu ngami Hanyu kuman, atawa haus balalu ngami Hanyu nguut? ³⁸ Hantekawe kami kadinung Hanyu erangkaulun asing balalu ngenei Hanyu masuk, atawa tabentur balalu makai Hanyu pakaian? ³⁹ Hantekawe kami kadinung Hanyu mekum atawa na penjara balalu kami hawi naua Hanyu?' ⁴⁰ Raja yiru akan nyanga'i,'Aku kaeau sabujurni manaun, kalaawe naun ngulahni nadap isa tika pulaksanai-Ku sa paling hina, naun ngulahni ma-Aku.' ⁴¹ Balalu, Hanye akan kaeau pada ma here sa hang tuhi kawi-Ni,'Hulu hingka hadapan Aku, hanyu sa terkutuk, ma wuang apui sa puang tau pare sa haut na siapkan pakai Iblis andri kawan malaekatni. ⁴² Daya, Aku kalauan hanyu puang ngami Aku kuman. Aku haus hanyu puang ngami Aku nguut. ⁴³ Aku ulun asing hanyu puang ngenei Aku masuk lewu; tabentur hanyu puang makai Aku pakaian; sakit nelang napenjara hanyu puang naua Aku.' ⁴⁴ Balalu here pada akan nyangai,'Tuhan, hantekawe kami kadinung Hanyu kalauan atau haus, atau ulun asing, atau mekum atau tabentur, atau na panjara, balalu puang ngarawah Hanyu?' ⁴⁵ Balalu, Hanye akan nyangai here, "Aku kaeau sabujurni manaun, kalaawe naun puang ngulahni terhadap isa hingka here sa paling hina, hanyu puang ngulahni pada ma Aku.' ⁴⁶ Balalu, here ina akan sagar nahukum abadi hampe kalalawah, kude kawan ulun sa nampalus kabahumen Alatalla sagar hang wuang pamelum kekal abadi hampe kalalawah."