¹ Hantek yiru, kawan murid hawi nunung Yesus palus nunti ma Hanyem, "Hie sah paling hante hang wuang Karajaan Surga?" ² Balalu, Yesus nerau erang kaulun iya rumis hampan hawi nunung Hanye, Hanye ngannak iya rumis yiru hang penah-penah here, ³ nelang kaeyau, "Aku iwara sa kapinu'uni ma naun, ekat amun naun laku ampun anri jari kala kawan iya, naun puang sagar masuk ma wuang Karajaan Surga. ⁴ Hie sa jari iyalah kawan iya yena hanye yirulah sa labis hante hang wuang Karajaan Surga. ⁵ Anri, hie sa narime kawan iya yena hang wuang ngaranKu, hanye narime Aku." HAL SA NGULAH KAWAN ULUN BADUSA ⁶ "Kude, hie sa ngampitawang erang kaulun teka kawan iya yena sa haut parisaya ma Aku, patut amun hang diyungni na huruk watu kilangan balalu na ampi uhet hang wuang ranu sa paling lalem' ⁷ Silaka dunia daya kawan ulun sa ngampitawang naan hang wuangni! Daya, hal tawang mula harus, kude silaka ma kawan ulun sa ngulahni. ⁸ Amun tangan atawa pe'enu ngulah dusa, ware tetek anri umpe tangan atawa pe'enu yiru. Daya ware hanyu masuk hang wuang pamelum anri tangan sa lepung atawa pe'e sa kepa hingka baisi rueh tangan anri rueh pe'e, kude hanyu na umpe ma apui sa puang tau pare' ⁹ Amun matenu ngulah dusa, sungkil anri umpe' matenu yiru. Daya ware hanyu masuk ma wuang pamelum anri isa mate, hingka baisi rueh mate kude na umpe' ma wuang apui sa puang tau pare'." ¹⁰ Sampining, ada naun puang maanggap erang kaulunpun teka kawan iya rumis yena. Daya, Aku iwara ma naun amun kawan malaikat hang surga palus balajur nantau uruwawa Alatalla AmmahKu hang surga. ¹¹ [Daya, Iya Murunsia haut hawi ne'u nyalamat kawan ulun sa wawai.] ¹² Kalaawe kakira naun? Amun erang kaulun baisi jatuh kaukui babiri, kude isani tawang, puang sah ulun yiru sagar nanan sa suwei pulu suwei kaukui lainni hang ammau gunung balalu tulak ngantara erang kaukui sa tawang yiru? ¹³ Dami hanye kahaba babiri sa tawang yeru, hanye palus miarai mihewu ne'u erang kaukui sa tawang yiru hingka sa suwei pulu suwei kaukui sa puang tawang. ¹⁵ "Amun pulaksanainu ngulah hala, tunung palus wara inun kahalaenni, ekat hanyu anri hanye raerai bahadapan. Amun hanye nyanrengei hanyu, hanyu haut kahaba pulaksanainu. ¹⁶ Kude amun puang, ware ennei isa atawa rueh kaulun lagi baya hanyu ne'u sameh-sameh bapanner ma hanye. ¹⁷ Amun hanye tatap puang hakun nyanrengei naun, wara ne'u hal yena ma kawan ungkup. Amun hanye pada puang hakun nyanrengei kawan ungkup, elahleh hanye jari iyalah kawan bangsa lain anri kawan ulun sa nimpun pajak. ¹⁸ Aku iwara sa kapinuuni ma naun amun inun sa na huruk naun hang dunia sagar pahuruk pada hang surga. Kalahie pada, sa na lapas naun hang dunia sagar palapas pada hang surga." ¹⁹ Hinra lagi, Aku iwara ma naun, amun rueh kaulun hang penah naun haut pakat hang dunia ne'u hal sa na laku here, hal iru pada sa sagar jari ma here daya Alatalla AmmahKu hang surga. ²⁰ Daya, hang awe rueh atau telu kaulun bakumpul hang wuang NgaranKu, Aku naan hang penah-penah here. ²¹ Petrus hawi nunung Yesus balalu nunti, "Tuhan, pire kali sabujurni aku harus ngami ampun ma pulaksanaiku sa haut ngulah hala ma aku? Hampe pitu kali?" ²² Yesus kaeyau ma hanye, "Aku iwara ma hanyu puang ekat hampe pitu kali kude hampe pitumpulu kali pitu kali. ²³ Daya yirulah, Karajaan Surga iyalah erang kaulun raja sa bahitung anri kawan walahni. ²⁴ Hantek hanye mulai bahitung, ulun sa baisi utang sapuluh ribu talenta na ennei nadap hanye. ²⁵ Daya hanye puang kaiyuh ngampi punah utangni, ampu'ni marentah hampan hanye na ari', baya darangan anri kawan iyani, pada katuluh inun sa masih naan hang hanye, ne'u ngampi punah utangni yiru ²⁶ Balalu, walah yiru suruk sammah ma ampu'ni nelang kaeyau, 'Awat sabar daya aku sagar ngampi punah katuluh utangku yiru ma hanyu.' ²⁷ Ampu'ni balalu pi ahi anri hanye nelang palus napas anri ngami ampun ma katuluh utangni yiru. ²⁸ Kude, dami walah yiru kaluar anri panalu baya walah lain sa bautang jatuh dinar ma hanye, hanye palus nyamma nelang nge'at walah lain yiru, nelang kaeyau, 'Ampulek duit sa haut na ihaunu teka aku!" ²⁹ Balalu, walah lain yiru suruk sammah nelang ilaku ma hanye, 'Awat sabar daya aku sagar ngampi punah katuluh utangku yiru ma hanyu.' ³⁰ Kude walah yiru puang narime anri nampasuk walah lain yiru ma wuang sel hampe hanye kaiyuh ngampi punah katuluh utangni. ³¹ Hantek kawan walah sa lain nantau kajadian yiru, here tu'u mahanang atei balalu hawi nunung anri iwara na ampu'ni ne'u kajadian yiru. ³² Balalu, ampu'ni nerau walah huni nelang kaeyau ma hanye, "Hanyu walah sa murun atei. Aku haut ngampi punah katuluh utangnu daya hanyu laku awat anri aku. ³³ Puang sah saharusni hanyu pada pi ahi baya sasameh naun walah, iyalah aku pada haut pi ahi anri hanyu?' ³⁴ Balalu, anri bapanyangit ampu'ni nyarah walah yiru hampan na tampasuk ma wuang sel hampe hanye kaiyuh ngampi punah utangni. ³⁵ Alatalla AmmahKu hang surga pada sagar kalayiru nadap naun, amun naun puang ngami ampun ma pulaksanai naun teka wuang atei naun."