¹ Enem anrau udihie, Yesus ngayak hi Petrus, hi Yakobus, baya hi Yohanes pulaksanai hi Yakobus, palus ngennei here mamai ma ammau gunung. ² Balalu Yesus baubah uruwawaNi hang hadapan here. UruwawaNi mara'ai matalak iyalah mate anrau nelang pammaNi baubah mahilak basahaya. ³ Here kadinung hi Musa anri hi Elia, rahat bapanner baya Yesus. ⁴ Hi Petrus kaeyau ma Yesus, "Tuhan, tu'u maeh takam tau naan hang yena, aku sagar ngampinri telu kemah hang yena, isa ma Hanyu, isa ma hi Musa, isa ni lagi ma hi Elia." ⁵ Hantek Petrus masih bapanner, hawi awan sa mara'ai hang ammau here, balalu here karengei lengan teka wuang awan yiru kaeyau, "Ina IyaKu sa na sintaKu, Hanye ngampisanang ateiKu. Ware naun nyanrengei Hanye." ⁶ Hantek kawan murid nyanrengei yiru, here uras suntup sammah nelang takut. ⁷ Kude, Yesus hawi nelang negei here, eyauNi, "Ammuan, ada naun takut." Hantek here ammuan, here puang kadinung hiepun, ekat Yesus raerai. ⁹ Hantek here minau teka ammau gunung, Yesus ipesen ma here, eyauNi, "Ada naun iwara ma hiepun ne'u paninungan naun huni hampe Iya Murunsia welum kamulek teka penah ulun matei." ¹⁰ Balalu, kawan muridNi nunti ma Hanye, "Daya inun kawan ahli Taurat kaeyau amun hi Elia sagar hawi badahulu?" ¹¹ Yesus kaeyau, "Tu'u hi Elia sagar hawi badahulu ne'u nangkaeh katuluh hal. ¹² Kude, Aku iwara ma naun amun hi Elia hawi, here puang sagar kataru anri hanye balalu here pada maraduni iyalah aheng here raerai. Kalahie pada Iya Murunsia sagar nakahanangen daya here." ¹³ Balalu, kawan murid karasa amun Hanye bapanner ne'u hi Yohanes Pembaptis. ¹⁴ Hantek Yesus baya kawan muridNi mulek ma penah ulun rama, erang kaulun upu hawi nunung Yesus nelang suruk sammah hadapanNi pada kaeyau, ¹⁵ "Tuhan, ware ahileluNu ma iyaku daya hanye iweken nelang tu'u kahanangen. Hanye gaha lawu ma wuang apui anri ma wuang ranu. ¹⁶ Aku haut ngennei hanye ma kawan muridNu, kude here huan kaiyuh nyamare hanye." ¹⁷ Yesus kaeyau, " U naun generasi sa puang parisaya nelang tawang! Pire lawah lagi Aku sagar muneng baya naun? Pire lawah lagi aku harus sabar nadap naun? Ennei iya yiru ma Aku." ¹⁸ Balalu Yesus nyangit ruh ala murun yiru nelang nunyu hanye hampan kaluar teka tenga iya upu yiru, hantek yiru pada iya yiru ware'. ¹⁹ Udihie kawan murid hawi nunung Yesus, here raerai baya Hanye nelang nunti, "Daya inun kami puang tau nunyu tulak ruh ala murun yiru?" ²⁰ Eyau Yesus ma here, "Daya iman parisayanu puang hante. Aku kaeyau sa tu'uni ma hanyu, amun hanyu baisi iman parisaya mahena diki sasawi ai, hanyu haut tau kaeyau ma gunung yiru, 'Baidar ma yaru!' balalu gunung yiru sagar baidar. Mahi hal sa puang tau na karaja dayanu. ²¹ [Kude ruh ala murun sa iyalah yiru ekat tau na huyu tulak makai lakudua anri puang ikuta."] ²² Hantek Yesus baya kawan muridNi bakumpul hang wilayah tumpuk Galilea, Hanye kaeyau ma here, "Iya Murunsia sagar na sarah ma tangan murunsia, ²³ here sagar mun'nu Hanye, balalu Hanye sagar welum kamulek hang anrau sa katelu." Kawan muridNi tu'u mahannang atei nyanrengeini. ²⁴ Hantek here hampe ma tumpuk Kapernaum, kawan ulun sa nimpun pajak rueh dirham hawi nunung hi Petrus balalu nunti, "Inun sah gurunu puang babayar pajak rueh dirham? ²⁵ Hi Petrus kaeyau, "Hiai." Hantek hanye masuk ma wuang lewu, Yesus bapanner ma hanye, "Kalaawe manurutnu, Simon? Teka hie kawan raja dunia yena laku bea anri pajak? Teka kawan iyani atawa teka ulun lain?" ²⁶ Hi Petrus manjawab, "Teka ulun lain," Yesus balalu kaeyau ma hanye, "Amun kalayiru, kawan iyani puang babayar. ²⁷ Kude, hampan takam puang ngampikasiwa here, hulu naun tulak ma danau balalu tawut wintan. Alap kenah sa na iyuh naun pamulaanni daya hantek kenah yiru nguka wawani, naan erang kapeng stater. Alap duit yiru balalu ammi ma here, ma Aku anri ma hanyu."