¹ Balalu, kawan ulun Farisi anri kawan ulun Saduki hawi nunung Yesus ne'u manjabak Hanye. Here ilaku hampan Yesus ngampidinung ma here siri teka Surga. ² Kude, Yesus kaeyau, "Hantek niba kamalem, naun iwara, 'Anrau barasis daya ammau langit mariang.' ³ Hantek kaayat, naun iwara, 'Anrau yena sagar naan riwut barat daya ammau langit mariang nelang maiyeng.' Naun karasa sarani mambeda uruwawa ammau langit, kude puang karasa sarani mambeda kawan siri zaman. ⁴ Generasi sa murun atei nelang penzinah yena laku Aku ngulah siri, kude puang sagar na ami ma naun isa siripun, ekat siri teka hi Nabi Yunus." Balalu, Hanye tulak teka yiru nanan here. ⁵ Hantek kawan murid Yesus hampe ma subarang danau here puang kaitung ngennei rote. ⁶ Yesus kaeyau ma here "Suba naun nantau nelang bajaga nadap ragi kawan ulun Farisi anri kawan ulun Saduki." ⁷ Here mulai ngamaner ne'u hal yiru hang penah here raerai nelang kaeyau, "Ina daya takam puang ngennei rote." ⁸ Kude, Yesus karasa inun sa na paner here balalu kaeyau, "U, naun kawan ulun sa puang parisaya, daya inun naun bapaner ne'u rote sa mahi hang naun? ⁹ Inun naun masih huan kataru atawa puang kaitung lagi ne'u dime rote sa sukup ma dime ribu kaulun, anri pire pannuk le'e sa na himpun naun? ¹⁰ Atawa, pitu rote sa sukup ma epat ribu kaulun, anri pire pannuk le'e sa na himpun naun? ¹¹ Kalaawe wangun naun hampe puang kataru amun aku puang rahat bapanner ma naun ne'u rote? Aku kaeyau ma naun, hampan bajaga ne'u nadap ragi kawan ulun Farisi anri kawan ulun Saduki." ¹² Wa'u here kataru amun Hanye puang bapanner ne'u bajaga nadap ragi rote, kude nadap ajaran kawan ulun Farisi anri kawan ulun Saduki. ¹³ Hantek Yesus hampe ma niba daerah tumpuk Kaisarea Filipi, Hanye nunti ma kawan muridNi, "Amun eyau ulun, hie sah Iya Murunsia yiru?" ¹⁴ Here manjawab, "Papire kaulun kaeyau hi Yohanes Pembaptis, sa lain kaeyau hi Elia, naan pada sa lain lagi kaeyau hi Yeremia, atawa erang kaulun teka kawan nabi." ¹⁵ Udi hie, Yesus nunti ma here, "Kude, amun manurut naun, hie sah Aku yena?" ¹⁶ Hi Simon Petrus kaeyau, "Hanyu ri Mesias, Iya Alatalla sa welum!" ¹⁷ Balalu Yesus kaeyau ma hi Simon Petrus, "Berkat ma hanyu, Simon iya Yunus, puang daya lunek baya ira' sa iwara hal yena ma hanyu, kude daya Alatalla AmmahKu hang surga. ¹⁸ Aku pada iwara ma hanyu amun hanyu ri hi Petrus. Hang ammau watu yena, Aku sagar ngam'muan jemaatKu kalahie kawan gerbang Hades puang sagar bakuasa. ¹⁹ Aku sagar ngami ma hanyu kawan kunsi Karajaan Surga. Inunpun sa na huruknu hang wuang dunia sagar pahuruk hang wuang surga. Kalahie pada, inunpun sa na lapasnu hang wuang dunia sagar palapas pada hang wuang surga." ²⁰ Balalu, Yesus ngampiitung kawan muridNi hampan puang iwara ma hiepun amun Hanye yiru Mesias. ²¹ Teka hantek yiru, Yesus mulai iwara ma kawan muridNi amun Hanye harus tulak ma tumpuk Yerusalem anri sagar nangung kahanangen hang wuang wahai hal daya kawan tueh, kawan imam kapala, pada kawan ahli Taurat, hampe na wun'nu kude welum kamulek hang anrau katelu. ²² Balalu, Petrus nyujut Yesus ma lapehni, nelang kaeyau ma Hanye, "Tuhan, ware Alatalla nyanawit hal yiru teka Hanyu! Hal yiru pang sagar bakajadian nadap Hanyu." ²³ Kude, Yesus bapaling nadap Petrus nelang kaeyau, "Hulu tulak teka hadapanKu, u Iblis! Hanyu ri watu sandungan ma Aku, daya hanyu puang batatap kunuannu ma kawan hal teka Alatalla, kude ma kawan hal teka murunsia." ²⁴ Udihie Yesus kaeyau ma kawan muridNi, "Amun hamen umma Aku, naun harus puang mangaku tenga daging raerai, ngumme kayu balasangar naun, balalu umma Aku. ²⁵ Daya hieleh sa hamen nyalamat amirueni sagar kawawaian amirueni. Kude hie sa kawawaian amirueni dayaKu, hanye nyalamat amirueni. ²⁶ Inun hujungni amun ulun baisi katuluh dunia, kude hanye kawawaian amirueni? Atawa, inun sa kaiyuh na ammi ulun yiru ne'u nganti amirueni? ²⁷ Daya, Iya Murunsia sagar hawi hang wuang pihante Alatalla AmmahNi baya kawan malaikatNi balalu maleh tiap kaulun ne'u ulah gawini raerai. ²⁸ Aku iwara ne'u hal sa tu'uni ma naun, naan papire kaulun sa minri hang yena tatap welum hampe here kadinung Iya Murunsia hawi hang wuang KarajaanNi."