¹ Papire ulun Farisi anri kawan ahli Taurat teka tumpuk Yerusalem hawi nunung Yesus balalu kaeyau, ² "Daya inun kawan muridNu salenga puang nu'u ajaran datu nini? Here puang mu'i tangan hantek nguta rote!" ³ Yesus kaeyau ma here, "Daya inun pada naun nawan parentah Alatalla daya makai ajaran datu nini naun? ⁴ Daya lengan Alatalla kala yina, 'Ware naun hurumat ma ineh ammah naun,' anri, 'Hie sa ngutuk ineh atawa ammahNi, sagar na hukum matei.' ⁵ Kude, eyau naun, "Hieleh sa kaeyau ma ineh atawa ammahni, 'Inunleh sa na ami dayanu ne'u na sarah ma Alatalla,"' ⁶ hanye puang usah lagi hurumat ma ineh atawa ammahni. Daya yiru, naun haut nawan lengan Alatalla daya makai ajaran datu nini naun. ⁷ , Naun, kawan ulun munafik, tu'u inun sa na wara daya nabi Yesaya ne'u naun : ⁸ 'Bangsa ina hurumat ma Aku makai wawa here, kude atei here lawit teka Aku. ⁹ Sasia here nyuruk nyammah Aku amun here masih ngajar makai kawan parentah murunsia.' ¹⁰ Balalu, Yesus nerau kawan ulun rama iru nelang kaeyau, "Sanrengei anri pantaru! ¹¹ Puang inun sa masuk ma wuang wawa sa puang maeh ma ulun, kude inun sa kaluar teka wawani, iru sa puang maeh ma ulun ¹² Balalu kawan muridNi hawi nunung Yesus palus nunti, "RasaNu sah amun kawan ulun Farisi tasinggung nyanrengei pannerNu huni?" ¹³ Kude, Yesus kaeyau, "Tiap amulean sa puang na amule daya Alatalla AmmahKu hang surga sagar galis na bunnat hampe kawan wakatni. ¹⁴ Puang usah naun ngurus here. Here yiru kawan panuntun pehe' teka kawan ulun pehe'. Amun ulun pehe' nuntun ulun pehe', here rueh sagar lawu ma wuang luwang." ¹⁵ Petrus kaeyau ma Yesus, "Awat iwara ma kami arati rarapisan yiru." ¹⁶ Yesus kaeyau, "Inun sah naun huan kataru pada? ¹⁷ Inun naun puang karasa amun inunleh sa masuk ma wuang wawa sagar minau ma wuang wuntung balalu na umpe ma wuang wisi? ¹⁸ Kude, inun sa kaluar teka wuang wawa yiru hulet teka wuang atei, yiru sa puang maeh ma ulun. ¹⁹ Daya teka wuang atei hulet kawan kunu'an puang maeh, munu' ulun, ngalap darangan ulun, dusa lunek, ngalat, paner puang maeh, anri panner puang tu'u. ²⁰ Kawan hal yiru puang maeh ma ulun, amun kuman puang mu'i tangan yiru puang kalayiru." ²¹ Udi hie, Yesus tulak teka yiru palus basingkir ma daerah tumpuk Tirus anri tumpuk Sidon. ²² Erang kaulun wawei teka tumpuk Kanaan hawi balalu kaeyau, "Ware ahi leluNu ma aku, Tuhan, Iya Dawid! Iya waweiku karasukan ruh ala murun sa tamam tu'u." ²³ Kude, Yesus ekat suni. Balalu kawan muridNi hawi anri mandasak Hanye, eyau here, "Ware huyu hanye tulak daya hingka huni hanye nantiak eleh hang wading takam." ²⁴ Yesus kaeyau, "Aku ekat nahuyu hawi ne'u kawan babiri sa wawai teka penah kawan ulun Israel." ²⁵ Erang kaulun wawei teka tumpuk Kanaan yiru balalu nunung palus suruk sammah hang hadapan Yesus, eyauni, "Tuhan, awat karawah aku!" ²⁶ Kude, Yesus kaeyau, "Puang patut ngalap rote teka kawan iya balalu ngammini ma kawan antahu,." ²⁷ Wawei iru kaeyau, "Tu'u, Tuhan, kude kawan antahu yiru nguta kawan rateh makuta sa lawu teka ammau meja ampuni." ²⁸ Balalu, Yesus kaeyau ma hanye, " U wawei, iman parisayanu tu'u hante! Ware inun sa na aheng dayanu jari." Hantek yiru pada iya waweini ware. ²⁹ Yesus tulak teka yiru, takia hang iring Danau Galilea. Udihie Yesus mamai ma ammau bukit, balalu maharung hang yiru. ³⁰ Ulun rama hawi nunung Hanye, ngennei kawan ulun sa puang tau takia, cacat, pehe', muna, anri wahai lagi panyakit lainni. Here ngampikading kawan ulun yiru hang riet pe'e Yesus balalu Hanye nyamare here sa mekum yiru. ³¹ Wahai kawan ulun ngawauh daya here nantau, ulun sa muna tau bapanner, sa cacat nasamare, sa puang tau takia jari tau takia, sa pehe' tau ninung. Here balalu nawat Alatalla Israel. ³² Yesus nerau kawan muridNi balalu kaeyau, "Aku piahi ma kawan ulun rama yina daya here haut baya AKu telu anrau lawahni nelang mahi makuta. Aku puang tau nunyu here mudi nelang kalauwan daya tau ngulah here tariah hang lalan." ³³ Eyau kawan murid ma Hanye, "Teka awe kami tau kahaba rama rote hang unengan sa suni sinuk kala yina ne'u miwit kawan ulun sa tu'u rama yina." ³⁴ Yesus nunti ma here, "Pire rama rote sa naan anri naun?" Eyau here, "Naan pitu rote anri papire kenah rumis." ³⁵ Balalu Yesus nunyu kawan ulun rama yiru maharung hang ammau tane. ³⁶ Udi hie, Yesus ngalap pitu rote baya kawan kenah yiru. Nelang ngantuh syukur, Hanye mi'ah kawan rote yiru, ngami ma kawan muridNi, balalu kawan muridNi mambagini ma kawan ulun rama yiru. Here katuluh kuman hampe wising, balalu here ngumpul kawan pi'ahan rote sa ba le'e, naan pituh pannuk penu wahaini. ³⁸ Here sa kuman hang yiru naan epat ribu kawan upuan, huan tahitung kawan waweian baya kawan iya. ³⁹ Dami udi nunyu kawan ulun rama yiru mudi, Yesus mamai ma jukung balalu tulak ma daerah tumpu Magadan.