¹ Katika yiru, hi Herodes, raja wilayah, nyarengei habar ne'u Yesus. ² Balalu, hanye kaeyau ma kawan walahni, "Ina hi Yohanes Pembaptis. Hanye haut ammuan teka penah ulun matei daya yiru Hanye ngaraja kawan mujizat yiru." KAJADIAN NE'U PAMPATEI HI YOHANES PEMBAPTIS ³ Panyababni, hi Herodes haut nyamma hi Yohanes, nuruk balalu nampasukni ma wuang sel daya hi Herodias, darangan hi Filipus, pulaksanai hi Herodes. ⁴ Hi Yohanes suah kaeyau ma hanye, "Puang maeh saranu ngalap hi Herodias jari darangannu," ⁵ Biar hi Herodes sinni munnu hi Yohanes kude hanye puang heei anri ulun rama daya here ma anggap hi Yohanes ru erang kaulun nabi. ⁶ Kude, pas anrau ulang taun hi Herodes, iya wawei hi Herodias nanrik nampak hadapan here, yiru ngulah arai atei hi Herodes, ⁷ balalu hanye bajanyi sagar ngami inunpun sa na laku iya wawei yiru. ⁸ Daya na dasak inehni, iya wawei yiru kaeyau, "Ammi ma aku hang yina, ulu hi Yohanes Pembaptis hang ammau apar." ⁹ Biar hanang atei raja, kude daya hanye haut bajanyi hang hadapan kawan ulun rama sa maharung kuman baya hanye, hanye balalu marentah nampalus janyini yiru. ¹⁰ Hanye marentah ne'u nyanlepung ulu hi Yohanes hang wuang sel. ¹¹ Udihie, ulu hi Yohanes na ennei hang ammau apar, na surung ma iya wawei yiru balalu hanye ngenneini ma inehni. ¹² Kawan murid hi Yohanes hawi lepuh ngalap tengani, palus masarni. Balalu, here tulak iwara habar yiru ma Yesus. DIME ROTE BAYA RUEH KENAH MA DIME RIBU KAULUN ¹³ Hantek Yesus nyanrengei habar yiru, Hanye palus tulak teka yiru mamai jukung, ma unengan sa suni raeraini. Hantek kawan ulun nyarengei yiru, here nunung Hanye, takia pee teka kawan tumpuk. ¹⁴ Hantek Yesus kaluar, Hanye nantau kalayiru wahai kawan murunsia balalu piahi anri here, Hanye nyamare here sa mekum. ¹⁵ Hantek anrau nadap kamalem, kawan murid hawi nunung Yesus balalu kaeyau "Uneng yena suni suwung baya anrau haut niba maiyeng. Ware huyu kawan ulun rama yiru tulak ma kawan tumpuk lepuh midi makuta ma here raerai." ¹⁶ Kude, Yesus kaeyau ma kawan muridNi, "Here puang usah tulak ma awe-awe. Naun, ami makuta ma here." ¹⁷ Kawan murid kaeyau ma Yesus, "Hang yina kami mahi baisi inun-inun, ekat naan dime rote baya 2 kaukui kenah." ¹⁸ Balalu, Yesus kaeyau, "Ennei katuluhni ma yati, ma Aku." ¹⁹ Balalu, Yesus nunyu kawan ulun rama yiru maharung hang ammau rikut, Hanye ngalap dime rote baya rueh kaukui kenah yiru, nelang nadap ma ammau langit, Hanye ngatuh syukur palus mi'ah-mi'ah rote yiru. Udihie, Hanye ngami ma kawan muridNi palus nunyu here mambagini ma kawan ulun rama hang yiru. ²⁰ Dami, here katuluh haut ikuta anri wising. Balalu, here ngumpul kawan pi'ahan sa ba le'e, naan rueh walas pannuk penu' wahaini. ²¹ Here sa kuman wahaini kakira naan dime ribu upuan, huan na reken baya kawan waweian anri kawan iya. ²² Yesus nunyu kawan muridNi hinang mamai ma jukung balalu tulak dahulu teka Hanye ma subarang, Hanye pada nunyu kawan ulun rama hampan mudi ma lewu here. ²³ Dami kawan ulun rama iru mudi, Yesus mamai ma ammau gunung Hanye raerai lakudua. Katika yiru anrau haut niba kamalem, Hanye raerai hang yiru. ²⁴ Kude, jukung kawan muridNi haut lawit hang penah danau, wuah tatat riwut baya galummang. ²⁵ Hang jam epat subuh, Yesus hawi nunung kawan muridNi hang jukung sa rahat wuah tatat riwut barat baya galummang yiru, Hanye takia hang ammau ranu. ²⁶ Hantek kawan muridNi nantau Hanye takia hang ammau ranu, here gaer nelang rawek, "Iru kamme!" here miuwik daya gaer ²⁷ Kude, Yesus palus bapanner anri here, eyauNi, "Puang usah rawek! Ina Aku, ada gaer." ²⁸ Udihie, hi Petrus kaeyau ma Hanye, "Tuhan, amun iru Hanyu, huyu aku hawi nunung Hanyu hang ammau ranu." ²⁹ Yesus kaeyau, "Mayati!" Balalu, hi Petrus minau teka jukung, takia hang ammau ranu, hawi nunung Yesus. ³⁰ Kude, dami hanye nantau riwut barat, hanye gaer palus mulai uhet. Hanye miuwik, "Tuhan, awat aku!" ³¹ Yesus ngului tanganNi, negei hi Petrus palus kaeyau, "Hanyu sa puang parisaya, daya inun hanyu puang harap?" ³² Hantek here masuk ma wuang jukung, riwut barat palus taduh. ³³ Udihie here sa naan hang wuang jukung yiru suruk sammah hadapan Yesus palus kaeyau "Tu'u, Hanyu yena Iya Alatalla Ammah!" ³⁴ Here nyubarang, hampe ma tane Genesaret. ³⁵ Hantek kawan ulun hang yiru mantaru Hanye, hinang here iwara ma kawan ulun hang daerah yiru palus ngennei kawan ulun sa mekum nunung Yesus. ³⁶ Here laku awat anri Yesus hampan tau sunnah negei hujang pammani, balalu katuluh ulun mekum sa negeini ware.