¹ Hantek Yesus haut nyanluput kawan ajaran"Ni, Hanye tulak teka tumpuk Galilea ma tiba wilayah tumpuk Yudea, hang subarang hungei Yordan. ² Kawan ulun rama nunung Hanye, Hanye nyamare here hang yaru. ³ Papire kawan ulun Farisi hawi nunung Yesus ne'u manjabak Hanye nelang nunti, "Inun manurut Hanyu, wuah sah amun erang kaulunm upu ngampisarak daranganni makai wahai alasan?" ⁴ Eyau Yesus, "Inun naun puang suah mambasa amun Hanye, sa ngampijari here teka mula sarita, upu anri wawei, ⁵ Hanye haut kaeyau, 'Daya yiru, kawan upuan sagar nanan ammahni anri inehni, balalu kumpul jari isa baya daranganni, hampan here jari isa tenga?' ⁶ Jari here puang lagi rueh, kude haut jari isa tenga. Daya yiru, inun sa haut na ampi isa daya Alatalla, puang iyuh na pisah sarak daya murunsia." ⁷ Here kaeyau ma Yesus, " Balalu, inun ngulah hi Moses marentah hampan ngami surat sarak anri ngampisarak darangan?" ⁸ Yesus kaeyau ma here, "Iru daya kakarasen ateinu, hampe hi Musa ngampi hiai hanyu nyansarak darangannu. Kude, teka mula sarita puang kalayiru. ⁹ Aku iwara ma naun katuluh, hieleh sa ngampi sarak daranganni, padahal daranganni puang idapa, udi hie narangan lagi, hanye haut idapa." ¹⁰ Kawan muridNi kaeyau ma Hanye, "Amun kalayiru ulun pana darangan, ware ang usah narangan." ¹¹ Kude, Yesus kaeyau ma here, "Puang katuluh ulun kaiyuh narime ajaran yena, ekat here sa bahikmat. ¹² Daya, naan ulun sa puang narangan daya teka nakayaan haut kalayiru, naan pada ulun sa puang narangan daya hanye mula na ulah kalayiru daya ulun lain, naan pada ulun sa puang narangan daya ahengni raerai ne'u Karajaan Surga. Hieleh sa kaiyuh narime ajaran yena, ware hanye narimeni." ¹³ Papire kawan iya rumis na ennei nunung Yesus hampan Hanye ngami berkat palus lakudoa ma here, kude kawan muridNi nyangit kawan ulun yiru. ¹⁴ Yesus kaeyau, "Herau kawan iya rumis yiru. Ada naun nguring here hawi nunung Aku daya Karajaan Surga yiru ampun kawan ulun sa iyalah kawan iya rumis yena." ¹⁵ Udihie Yesus ngami berkatNi ma kawan iya rumis yiru, balalu tulak teka yiru. ¹⁶ Hawi erang kaulun nunung Yesus balalu nunti, "Guru, hal maeh inun sa harus na karajaku hampan aku tau kaiyuh welum palus ma kalalawah?" ¹⁷ Balalu, Yesus kaeyau ma ulun yiru, "Daya inun hanyu nunti ma Aku ne'u hal sa maeh? Ekat naan Isa sa maeh. Kude, amun hanyu hamen welum palus ma kalalawah, ware hanyu nu'u kawan ajaran yiru." ¹⁸ Ulun yiru nunti ma Yesus, "Ajaran sa awe?" 'Eyau Yesus, "ada munu, ada idapa, ada ngalat, ada iwara habar sa puang tu'u, ¹⁹ hurumat ma ineh ammahnu, lelu sinta ma sasameh murunsia iyalah ma hanyu raerai." ²⁰ Ulun yiru kaeyau ma Yesus, "Katuluh hal yiru haut na karaja dayaku, inun masih huan sukup?" ²¹ Balalu Yesus kaeyau ma hanye, "Amun hanyu hamen sampuraka katuluhni, tulak anri ari' katuluh harata sa naan baya hanyu. Udihie baginu maka kawan ulun paua, daya yiru hanyu sagar baisi harata hang surga, hayu umma Aku." ²² Dami nyanrengei kalayiru, balalu ulun yiru tulak nelang mahanang atei daya hanye tatau tu'u. ²³ Balalu, eyau Yesus ma kawan muridNi, "Aku iwara sa tu'u ni ma naun katuluh, tu'u mahadin kawan ulun tatau tau masuk ma Karajaan Surga. ²⁴ Daya labis marauh erang kaukui unta masuk ma luwang pilus hingka ulun tatau masuk ma Karajaan Alatalla." ²⁵ Dami nyanrengei piwaraan yiru, kawan muridNi uras ngawauh nelang nunti, "Amun kalayiru balalu hie sa iyuh nasalamat?" ²⁶ Nelang nantau here, Yesus kaeyau, "Baya murunsia, hal yena puang mungkin, kude baya Alatalla, hal yena tau jari." ²⁷ Balalu, hi Petrus kaeyau ma Hanye, "DinungNu, kami haut nanan katuluhni anri umma baya Hanyu. Jari, inun kami sagar na salamat?" ²⁸ Yesus kaeyau ma here, "Aku iwara sa tu'uni ma naun katuluh, hie sa umma Aku hang dunia sa wau, hantek Iya Murunsia maharung hang piharunganNi, naun pada sagar maharung hang rueh walas piharungan ne'u jari hakim ma rueh walas suku Israel. ²⁹ Tiap ulun sa nanan lewuni, pulaksanaini upu, pulaksanaini wawei, inehni, ammahni, kawan iyani baya katuluh harata bannani ne'u ngaranKu sagar narime jatuh kali wahaini nelang sagar narime welum hampe kalalawahni. ³⁰ Wahai kawan ulun sa mula ni sagar jari sa pangalisanni, kalahie pada sa pangalisanni sagar jari sa mula ni."