¹ Udiyeru, Yesus nerau karuehwalas murid-Ni balalu ngami here kuasa nelang wawenang amau kawan ruh jahat, pada pakai nyamare panyakit. ² Hanye nugas here mambarita neu Karajaan Alatalla anri nyamare. ³ Eau-Ni ma here, "Ada ngenei inun jua hang pakiayaannu, ada ngenei tungkeh, tas, rute, duit, atawa malah rueh karawen pama. ⁴ Ma lewu awe jua sa hanyu masuk, tananleh hang yaru hampe hanyu tulak teka unengan yeru. ⁵ Ma here sa puang hakun narime hanyu, tananleh tumpuk yeru anri kebas dabu teka peenu tanda ngitung here." ⁶ Balalu tulakleh kawan rasul bakaliling ma kawan tumpuk ngabar Barita Salamat nelang nyamare ulun sakit hang awe-awe. ⁷ Herodes, raja wilayah, karengei neu katuluh kajadian yeru ngulah hanye bingung dagana papire ulun ngantuh Yohanes Pambaptis haut kaelan teka penah ulun matei, ⁸ Sa lain lagi iwara Elia haut mulek lagi, naan jua maner isa teka kawan nabi sa welum hang jaman sadi haut amuan. ⁹ Herodes kaeau, "Aku haut nyamitus ulu Yohanes. Jari, hiyesah Ulun sa neu Hanye rengeiku barita hampe kalayeru ni?" maka ni, Herodes hamen tatuu panalu Yesus. ¹⁰ Hantek kawan rasul mulek, here nyarita ma Yesus neu sa haut naulah here balalu Hanye ngayak here nyunitenga ma tumpuk bangaran Betsaida. ¹¹ Kude, ulun rama karasa neu yiru balalu here pada naharak-Ni. Parayan nyamut here Yesus bapaner ma here rama neu Karajaan Alatalla nelang pada here sa laku na samare. ¹² Wayah anrau niba kamalem, ruehwalas murid Yesus hawi nunung Hanye balalu kaeau, "Huyuleh kawan ulun ru tulak ma kawan tumpuk hang litar yena ngantara uneng amalem anri kuman daya hang yena takam muneng hang unengan suni." ¹³ Kude, Yesus paner ma here, "Hanyuleh sa ngami here kuman." Eau kawan murid-Ni, "Kami ekat naan dime rute anri rueh kenah, kasuali kami tulak midi makuta ma katuluh ulun ti. ¹⁴ Hang yaru naan kurang labis dime ribu kaulun kawan upu. Yesus maharek ma kawan Murid-Ni, "Huyu here maharung ngulah asing-asing kalumpuk sa jumalah kurang labis dimempulu kaulun hang isa kalumpuk." ¹⁵ Here ngaraja inun sa huyu daya Yesus balalu laku katuluh maharung. ¹⁶ balalu, Yesus ngalap dime rute anri rueh kenah yeru, mihangut ma langit, mamberkatni, palus ngamini ma kawan murid himpan mambagini ma ulun rama. ¹⁷ Here katuluh kuman hampe wising. Udiyeru, kawan lee tetekan rute sa nakumpul naan ruehwalas tampawan jubung. ¹⁸ Hinra wayah, hantek Yesus rahat lakudua ngaraerai, kawan murid-Ni naan baya Hanye. Balalu, Hanye nunti ma here, "Hiyesah Aku yena kunuan ulun rama?" ¹⁹ Eau here, "Yohanes Pambaptis, sa mehe ngantuh Elia, sa mehe lagi ngantuh Hanyu yena isa teka kawan nabi jaman hurap sa welum mulek." ²⁰ Balalu, Yesus maharek ma here, "Kude, amun eaunu, hiyesah Aku?" Eau Petrus, " Hanyu hanyeru Kristus teka Alatalla." ²¹ Kudeyeru, Yesus bahimat ngampiitung here nelang ilaku himpan here ada iwara ma hiye jua neu yena. Yesus Maner Pampatei-Ni ²² Balalu Yesus kaeau, "Anak Murunsia samula rara hang hene pakara anri puang natarime daya kawan tueh, kawan imam kapala, anri kawan ahli Taurat, balalu na wunu anri sagar welum hang anrau katelu." ²³ Eau Yesus ma here katuluh, "Jaka erang kaulun hamen nguma Aku, hanye siap nawan piaheng tengani, nelang sangup mikul balasangarni tiap anrau anri naharak Aku. ²⁴ Dagana, hiye jua sa bausaha nyalamat pamelumni, sagar kawawaian pamelumni. Kude, hiye sa kawawaian pamelumni dagana Aku, hanye sa na salamatni. ²⁵ Inunsah untungni jaka erang kaulun kaiyuh katuluh dunia, tapi matei atawa kawawaian pamelumni? ²⁶ Ma ulun sa amangan daya Aku anri paner-Ku, Anak Murunsia sagar amangan ngaku ulun ru hantek Hanye hawi hawuang Kamuliaen-Ni anri kamuliaen Amah-Ni, baya kawan Malekat brasih. ²⁷ Aku iwara tarung tuu ma hanyu, naan papire kaulun hang helang naun sa minri hang yena puang sagar matei sahuan kaindi Karajaan Alatalla." ²⁸ Kurang labis, walu anrau udi Yesus nampe watang ajar-Ni, Hanye ngenei Petrus, Yohanes, anri Yakobus mamai ma wungkur lepuh lakudua. ²⁹ Hantek Yesus rahat lakudua, uruwawa-Ni baubah anri pama-Ni jari mahilak basahaya. ³⁰ Udiyeru, tantauleh rueh kaulun rahat paner anri Hanye. Karueh ulun ru hanyeru Muses anri Elia, ³¹ Sa nantarang tenga hawuang kamuliaen nelang bapaner neu pampatei Yesus sa sagar natansukup hang Yerusalem ³² Hantek yiru, Petrus baya kawan hengauni rahat tamam siruru, tapi wayah here sadar tatuu, here katantau kamuliaen Yesus anri rueh kaulun sa minri baya Hanye. ³³ Hantek Muses anri Elia kai tulak nanan Yesus, Petrus maharek, "Guru, tatapleh takam muneng hang yena. Kami sagar ngapinri telu kemah, isa ma Hanyu, isa ma Muses, balalu sa isa ni ma Elia." Kude, Petrus puang sadar inun sa na tahampeni ru. ³⁴ Hantek Petrus rahat paner neu yiru, hawi awan nampayung here ngulah Petrus, Yohanes anri Yakobus hawi takut hantek kaindi here masuk ma wuang awan yiru. ³⁵ Udiyeru, rengei suara teka awan ru, "Yenaleh Anak-Ku, Hanyeleh sa napidi-Ku, rengei leh Hanye." ³⁶ Udi suara yeru lilap, ekat tantau Yesus raerai ai. Here nyimuh rahasia anri puang nampe ma hiye jua neu kawan kajadian sa haut na saksi here. ³⁷ Hang anrau ketunini, hantek here minau teka wungkur, erang kumpulan hante ulun rama hawi nunung Yesus. ³⁸ Erang kaulun teka ulun rama ru kaeau, "Guru, aku laku ma Hanyu, tantauleh anakku sa ekat isa yena ai. ³⁹ Tantauleh, naan ruh sa manguasaini, ngulah hanye tatarusan nantiak. Ruh yeru pada manyiksa hanye ngulah wawani iwure, ruh yeru pahakun nanan hanye. ⁴⁰ Aku haut laku kawan murid-Nu nyamare, kude here puang tau nagarajani." ⁴¹ Eau Yesus, " Ui, naun ganarasi sa puang parisaya nelang tawang! Pire lawah lagi Aku muneng penah naun ngenei kasabar nadap naun? Endei anaknu ma yati." ⁴² Hantek anak yeru rahat nyanriet Yesus, ruh jahat ru mantingni ma tane nelang ngagagunsang tengani. Kude, Yesus nampalak ruh jahat yeru, nyamare anak yeru, balalu ngampulek ma amahni. ⁴³ Katuluh ulun uras mandam kaindi kuasa Alatalla, kude wayah here masih manga-manga anri katuluh sa naulah Yesus, Hanye maharek ma kawan murid-Ni, ⁴⁴ "Rengei mamaeh eau-Ku yena, "Anak Murunsia sagar nasarah ma tangan murunsia." ⁴⁵ Kude, kawan murid puang paham wusi lengan ru, anri hal yeru iyalah rahasia sa ngulah here puang tau nyantaruni. Here takut nunti ma Yesus neu arati lengan paner ru. ⁴⁶ Hang isa katika, kawan murid Yesus basual neu hiye sa paling tamam teka katuluh here yeru. ⁴⁷ Kude, Yesus karasa pikir akal here, balalu Yesus negei erang kaulun iya rumis sa minri hang lapeh-Ni. ⁴⁸ Balalu, Hanye kaeau anri kawan murid-Ni, "Ulun sa narime iya yena hawuang ngaran-Ku, hanye narime Aku. Hiye pada sa narime Aku, hanye pada narime Hanye sa ngutus Aku. Dagana, sa paling hina teka helang naun, hanyeleh sa utama." ⁴⁹ Yohanes nyangai-Ni nelang kaeau, " Guru, kami kaindi erang kaulun mure ruh jahat hawuang ngaran-Nu, kami bausaha nguring hanye daya hanye puang masuk kalumpuk takam." ⁵⁰ Kude, Yesus kaeau, "Ada nyantaduhni daya hiye jua sa puang nawan hanyu, hanye mamihak hanyu. ⁵¹ Hantek wayahni sasar riet ma Yesus na apamai piuanengan sa pangaamau, Hanye pisegah atei lepuh tulak ma Yerusalem. ⁵² Hanye nunyu papire kaulun dahulu teka Hanye. Balalu, kawan huyuan yeru tulak balalu masuk ma isa tumpuk hang Samaria himpan tau nyadia kantantuluh ma Hanye. ⁵³ Kude, kawan ulun hang unengan yeru puang narime Yesus daya Hanye rahat nuju ma Yerusalem. ⁵⁴ Hantek kawan murid-Ni, hanyeru Yakobus anri Yohanes, kaindi yeru, here kaeau, "Tuhan, Inunsah Hanyu hamen kami marintah apui minau teka langit nyanrupuh here? ⁵⁵ Yesus ngulik ma wading nelang nagur here. ⁵⁶ Balalu, Yesus anri kawan murid-Ni tulak ma tumpuk lain. ⁵⁷ Hantek here rahat hawuang pakiayaan, naan erang kaulun paner ma Yesus, "Aku sagar uma Hanyu ma awe jua Hanyu tulak." ⁵⁸ Yesus kaeau ma hanye, "Antahu jumpun naan luwang unengni muneng kahiye pada kawan wurung naan hanaini. Kude, Anak Murunsia mahi unengan pakai ngetat tenga." ⁵⁹ Yesus kaeau ma sa lain, "Taharak Aku!" Kude, ulun yeru kaeau, "Tuhan, ijin aku tulak lepuh masar amahku dulu." ⁶⁰ Kude, Yesus kaeau ma hanye, " Elah leh ulun matei masar ulun matei here, tapi hanyu tatap tulak nampe barita neu Karajaan Alatalla." ⁶¹ Naan erang kaulun paner, " Aku sagar uma Hanyu, Tuhan, tapi ijinleh aku paramisi dahulu anri keluargaku." ⁶² Yesus kaeau ma hanye, " Mahi erang kaulun sa haut ngandak tangan negei tajak, tapi masih ngulik ma wading, sa patut ma Karajaan Alatalla.'