¹ Udi yiru, Yesus midi pitumpulu kaulun sa uma Hanye pada, balalu Hanye ngutus here tulak barueh-barueh dahulu teka Hanye ma tiap tumpuk anri ma unengan sa kai na tunung-Ni. ² Eau-Ni ma here, "Hasil wasian samula hene tu'u, kude sa bagawi puang rama. dagana yiru, suba laku ma Tuan sa ampun ume yiru himpan nunyu kawan ulun sa bagawi ngumpul hasil wasian-Ni." ³ Tulakleh! Aku ngutus hanyu ialah anak babiri hang penah kawan sarigala. ⁴ Ada ngenei kadut duit, tas, atawa sanal. Nelang, ada ngiai hie-hie jua hawuang pakiaan. ⁵ Ma lewu sa awe jua hanyu masuk, eau dahulu, 'Damai sajahtara ma lewu yiti.' ⁶ Amun ulun sa naan hang yiru sinta damai, damai sajahtaranu sagar muneng hang amauni. Kude, amun puang, damai sajahtaranu yiru sagar mulek pi hanyu. ⁷ Munengleh hang lewu yiru. Kutaleh nelang u'utleh inun sa na surungan here ma hanyu, daya erang ka ulun panyamut upa haut mamudai kaiyuh upani. Ada bapinah hingka isa lewu ma lewu sa lain. ⁸ Hang katika hanyu hampe ma isa tumpuk nelang kawan ulun hang yaru narime hanyu anri maeh, kutaleh makuta sa na surungan here hang hadapannu. ⁹ Samare kawan ulun sakit panyakit sa muneng hang yaru, palus wara ma here, 'Karajaan Alatalla haut riet ma hanyu.' ¹⁰ Kude, amun hanyu masuk ma isa tumpuk nelang kawan ulun hang yaru puang narime hanyu, tulakleh ma kawan lalan tumpuk yiru nelang kaeau, ¹¹ 'Aji dabu hingka tumpuknu sa ireket hang pe'e kami kebas kami hang hadapannu. Kude, itungleh yina: Karajaan Alatalla haut riet.' ¹² Aku iwara ma hanyu: hang anrau yiru, tanggungen Sodom jari labis madinei hingka tanggungen tumpuk yiru." Paringaten Ma sa Puang Narime Yesus ¹³ "Silaka ma hanyu, Khorazim! Silaka ma hanyu, Betsaida! Umpamani Aku ngulah kawan kaajaiben sa sameh hang Tirus anri Sidon, himat here haut lawah batobat nelang maharung makai pama mahanang atei. ¹⁴ kude, hang wayah panghakiman, tanggungen Tirus anri Sidon labis madinei hingka tanggungennu. ¹⁵ Anri ma hanyu, Kapernaum, inunkah hanyu sagar na enat ma surga? Puang, hanyu sagar na tawut ma tumpuk adiaw! ¹⁶ Hie eleh sa nyanrengei hanyu, pada nyanrengei Aku. Kude, hie sa puang narime hanyu, hanye pada puang narime Aku. Anri, hie puang narime Aku, hanye puang narime Hanye sa ngutus Aku." Kawan Setan Tunuk ma Kawan Ulun sa Uma Yesus ¹⁷ Udi hiye kapitumpulu ulun sa uma Hanye yiru mulek anri mihewu palus kaeau, "Tuhan, kawan setan pada tunuk anri kami hawuang ngaran-Nu." ¹⁸ Yesus kaeau ma here, "Aku kadinung Iblis lawu hingka langit ialah kelat. ¹⁹ Himpan hanyu karasa! Aku haut ngami hanyu kuasa narah anipe anri alimangu, pada kuasa hang amau kakuaten musuh. Mahi sa tau ngahanang hanyu. ²⁰ Kude, ada hanyu arai dagana kawan ruh yiru tunuk anri hanyu, labis likan hingka yiru arainu dagana ngarannu haut na surat hang surga." Yesus Laku Dua Ma Alatalla ²¹ Hang katika yiru, Yesus arai pada hawuang Ruh Barasis nelang kaeau,"Aku basyukur ma-Hanyu Amah, Tuhan hang amau langit nelang tane, dagana Hanyu nyanina kawan yina uras hingka ulun maharati nelang pintar. Kude, Hanyu nantarang urasni ma kawan gena, U Amah, dagana yiru sa patut hang hadapan-Nu. ²² Amah-Ku haut nyarah uras ala katantuluhni ma-Aku, anri pauweng erang kaulun jua sa kataru anak amun puang Amah. Anri, pauweng erang ka ulun jua sa kataru Amah, amun puang anak amput kawan ulun sa ma here anak bakabahumen iwara kala yiru." ²³ Udi hiye, Yesus iwaleng ma kawan murid-Ni palus bapaner ma sasameh here, "Mihewuleh mate sa kadinung inun sa na dinungnu, ²⁴ daya Aku kaeau ma hanyu: hene nabi anri raja sa hamen tu'u kadinung inun eleh sa na dinungnu itati, kude here puang tau kadinung. anri, hamen tu'u karengei inun eleh sa rengei naun itati, kude here puang tau karengei yiru." Ulun Samaria sa Maeh Atei ²⁵ balalu, erang kaulun panai Hukum Taurat minri kai nguji Yesus, eauni, "Guru, inun sa patut na ulahku himpan kaiuh pamelum ma kalalawahni?" ²⁶ Sangai Yesus ma hanye, "Inun sa na surat hawuang Hukum Taurat? inun sa na basanu hawuangni?" ²⁷ Ulun yiru nyangai, "Sintaleh Tuhan, Alatallanu, anri katuluh ateinu, anri katuluh amiruenu, anri katuluh kakuatennu, nelang anri katuluh pikirannu. nelang, sintaleh sasamehnu murunsia ialah hanyu sinta ma tenga dagingnu raerai." ²⁸ Yesus kaeau ma hanye, "Sangainu yiru bujur. gawileh yiru, himat hanyu sagar welum." ²⁹ Kude, ulun yiru hamen ngampi bujur dirini, balalu hanye kaeau ma Yesus, "hie sa samehku murunsia yiru?" ³⁰ Yesus nyangai nelang kaeau, "Naan erang kaulun upu minau hingka Yerusalem ma Yerikho, hanye lawu ma tangan parampok sa marampas pama anri ngakasah palus nanan hanye ripu bilang matei. ³¹ Puang na pina, erang kaulun imam mitah lalan yiru. Hantek hanye kadinung ulun yiru, hanye palus tulak takia hang tuhi subarang lalan. ³² Kala yiru pada sa na ulah daya ereng kaulun Lewi, hantek hawi ma unengan yiru palus kadinung ulun yiru, hanye mitah ai takia hang tuhi lalan lainni. ³³ kude, naan erang kaulun Samaria sa ganyah hawuang pakiaan mitah yiru. Nelang, hantek hanye kadinung ulun yiru, hanye kaingkam miahi. ³⁴ Balalu, ulun Samaria yiru naripi palus mambabat kawan batanni. Hanye muhut makai ilau anri anggur, balalu ngenat ulun yiru ma amau keledaini palus ngenei ma losmen, hanye marawat ulun yiru. ³⁵ Ma keunini, ulun Samaria yiru ngalap duit 2 dinar balalu narui ma penjaga losmen yiru nelang kaeau, 'Rawatleh ulun sa batan yiti. Pire jua hanyu nangalis duit pakaini, aku sagar ngantini mun aku mulek yati.'" ³⁶ Balalu, Yesus kaeau, "Manurut hanyu, hie hingka ka telu ulun yiru sa jari sasameh murunsia hingka ulun sa lawu ma tangan parampok yiru?" ³⁷ Sangai panai Taurat yiru, "Ulun sa nantarang piahi ma hanye." balalu, eau Yesus, "Hulu tulak, palus gawi hal sa sameh." Hi Maria andri Hi Marta ³⁸ Tawuk Yesus anri kawan murid-Ni hawuang pakiaan, Yesus masuk ma isa tumpuk balalu erang kaulun wawei sa bangaran hi Marta narime Yesus hang Lewuni. ³⁹ Hi Marta naan pulaksanai wawei sa bangaran hi Maria sa maharung hang riet pe'e Yesus nyanrengei pangajaran Yesus. ⁴⁰ kude, hi Marta sibuk tu'u nanyari uras pagawianni. Balalu hi Marta nyanriet Yesus nelang kaeau, "Tuhan, inun Hanyu puang tatahu mun pulaksanai waweiku maladar aku ngaraja uras pagawian yina raerai? Huyuleh hanye ngarawah aku!" ⁴¹ kude, Tuhan nyangai, "Marta, Marta, hanyu adingan nelang ngampi hanang ulunu raerai anri hene hal. ⁴² Ekat isa hal sa parlu. Hi Maria haut midi bagian sa paling maeh, nelang bagianni yiru puang sagar tau na alap hingka dirini."